Федеральнэ программэу «Къулыкъу ахьызэ егъэджэгъэнхэр» зыфиIорэм ыкIи проектэу «Сэнэхьатым екIурэ лъэубэкъу» зыцIэм ягъэцэкIэн къадыхэлъытагъэу Мыекъопэ къэралыгъо технологическэ университетым маркетингымкIэ, сервисымкIэ ыкIи туризмэмкIэ икафедрэ Адыгэ республикэ еджапIэ-интернатэу макIэу зэхэзыхырэ ыкIи зылъэгъурэ сабыйхэр зыщеджэхэрэм туризмэмкIэ кружокыр щызэхащагъ.

Еджэгъу илъэсым къыкIоцI кIэлэеджакIохэр хъызмэтшIэпIэ зэфэшъхьафхэм ащыIагъэх, культурнэ ыкIи чIыопс объектхэр къаплъыхьагъэх, непэрэ уахътэм диштэрэ технологиехэм нэIуасэ афэхъугъэх, практическэ шIэныгъэхэр зэрагъэгъотыгъэх.

Сэнэхьатым икъыхэхын фэгъэхьыгъэ программэм елъытыгъэу мыщ фэдэ Iофтхьабзэхэр рагъэкIокIыгъэх:

— МКъТУ-м хэхьэрэ Дзэ егъэджэн гупчэр — кIэлэеджакIомэ егъэджэн аудиториехэр къакIуахьыгъэх ыкIи пилот зэрымыс аппаратхэм нэIуасэ афэхъугъэх.

— МКъТУ-м и Политехническэ колледж — кIэлэеджакIохэр гъэсэныгъэ программэмэ нэIуасэ афэхъугъэх, непэрэ уахътэм диштэрэ технологиехэр алъэгъугъэх, кулинарнэ ыкIи ветеринарнэ лъэныкъомэ афытегъэпсыхьэгъэ площадкэхэм ащыIагъэх.

— Тепличнэ комплексэу КФХ «Савосько» — цумпэ лъэпкъхэм якъэгъэкIынкIэ щыIэ технологиякIэхэм нэIуасэ кIалэхэр афэхъугъэх.

— АО Санаториеу «Здравница «Лаго Наки» — санаторнэ-курортнэ фэIо-фашIэхэм ыкIи псауныгъэм фэгъэхьыгъэ туризмэм язытет ныбжьыкIэхэр щыгъозагъэх, джащ фэдэу адыгэ къашъомэ афэгъэхьыгъэ мастер-классмэ ахэлэжьагъэх.

— МэшIо-ухъумэкIо частэу № 2 — экскурсием хахьэщтыгъэх мэшIогъэкIосэ къулыкъум итарихъ щыгъозэнхэр, ахэмэ ятехникэ, яIэмэ-псымэхэм нэIуасэ афэшIыгъэнхэр.

— Кинологическэ лъэпкъ гупчэу къулыкъу зыхьырэ хьэхэм зыщапылъхэр — хьэхэр едзыгъо-едзыгъоу зэрагъасэхэрэ шIыкIэм щыгъозагъэх, МВД-м икинологхэм яIофшIэн зэрагъэлъэгъугъ.

— Свято-Михайловскэ чылысыр — экскурсием къыщаIотагъ Кавказ православиер къызэрихьагъэ шIыкIэр, хьэджашIэ туризмэ Iофхэм хэушъхьафыкIыгъэу апылъыр.

— Дендропаркэу П.В. Букреевым ыцIэ зыхьырэр — ландшафтнэ дизайныр ыкIи экологическэ лъэсгъогухэр зыфэдэхэр алъэгъугъэх, уц лъэпкъхэр зэрагъэшIагъэх.

— Экофермэу «Нелама» — экзотическэ псэушъхьэмэ кIэлэеджакIохэр нэIуасэ афэхъугъэх, экотуризмэр зыфэдэр зэрагъэшIагъ.

— Ретро-музеир — советскэ лъэхъаным ипкъыгъохэмкIэ шъолъырым итарихъ зэрагъашIэ.

— КъокIыпIэ лъэпкъхэм я Къэралыгъо музей — дышъэидэ искусствэмкIэ мастер-класс зэхащагъ ыкIи гъэсэныгъэ программэу «Загадочный Восток» рагъэкIокIыгъ.

— АР-м и Лъэпкъ музей — адыгэ лъэпкъым ылъапсэ зэрагъэшIагъ археологическэ пкъыгъохэр зэрагъэлъэгъугъэх.

— Кавказскэ къэралыгъо чIыопс биосфернэ заповедникэу Христофор Шапошниковым ыцIэ зыхьырэр — экологическэ гъэсэныгъэмкIэ методистэу Валентина Куцаям заповедникым ипсэукIэ зыфэдэр къафиIотагъ, къаригъэплъыхьагъ.

Ащ фэшъхьафэу, Мыекъопэ къэралыгъо технологическэ университетым истудентмэ интерактивнэ IофтхьабзитIу зэхащагъ, ахэр джэгукIэ шIыкIэкIэ агъэкIуагъэх.

Проектэу «Сэнэхьатым екIурэ лъэубэкъу» зыфиIорэр къадэIэпыIагъ профессиональнэ лъэныкъохэм зэрагъэушъомбгъунымкIэ. Студентхэм, кIэлэегъаджэхэм ыкIи зэхэщакIохэм яшIуагъэкIэ неущрэ мафэм сэнэхьатэу зэрагъэгъотыщтымкIэ экскурсиехэр мэхьанэ зиIэ Iофыгъо кIэлэеджакIомэ афэхъугъэх.