Непэ Мыекъопэ къэралыгъо технологическэ университетым торжественнэ зэхахьэ щыкIуагъ, ар зыфэгъэхьыгъагъэр программэу «Къулыкъу ахьызэ егъэджэгъэнхэр» зыфиIорэр 2024-2025-рэ илъэсхэм зэрагъэцэкIагъэм изэфэхьысыжьхэр ары.

Iофтхьабзэм хэлэжьагъэх структурнэ подразделениехэм япащэхэр, кIэлэегъэджэ-гъэсакIохэр, джащ фэдэу студентхэр — апшъэрэ еджапIэхэм азыфагукIэ я II-рэ ЗэIухыгъэ зэнэкъокъухэу социальнэ проектхэм афэгъэхьыгъэхэм ащытекIуагъэхэр.

МКъТУ-м ипроектнэ офис иIофышIэхэр — Болэкъо Мариэтта, КIыржьын Светлана ыкIи Надежда Продиблох — лъэтегъэуцо къашIыгъ, ащ къыщыраIотыкIыгъэх гъэсэныгъэ процессым «Къулыкъу ахьызэ егъэджэгъэнхэр» зыфиIорэ моделыр зэрэщызэхэщагъэм изэфэхьысыжьхэр.

Зэфэхьысыжь шъхьаIэхэр:

— МКъТУ-м икIэлэегъэджэ 70-мэ егъэджэнхэр программэу «Къулыкъу ахьызэ гурыт ыкIи апшъэрэ гъэсэныгъэм щылажьэхэрэр егъэджэгъэнхэр» зыфиIорэр акIугъ ыкIи ащ елъытыгъэу сертификатхэу платформэу ДОБРО.РФ зыцIэм къафигъэхьазырыгъэхэр къыдахыгъэх;

— Адыгеим и Ресурснэ гупчэ дэлажьэхэ хъугъэ, ащ елъытыгъэу студенческэ командхэмрэ Адыгэ Республикэм имыкоммерческэ организациехэмрэ язэпхыныгъэхэр агъэпытагъэх;

— организацие пчъагъэр — социальнэ гъусэу университетым иIэхэм ахэхъуагъ 37-м нэсэу;

— программэм къыдыхэлъытагъэу платформэу ДОБРО.РФ зыцIэм социальнэ проектэу 8 щатхыгъ.

Къэбар жъугъэм иамалхэм программэм игугъу лъэшэу ащашIыгъ: федеральнэ чатхэм тхыгъэ 20-м ехъу, материал 57-рэ шъолъырхэм къарыхьагъ, социальнэ хъытыухэм тхыгъэ 150-рэ къащыхаутыгъ, видеохостингэу RUTUBE зыцIэм зэдэгущыIэгъу 27-рэ къихьагъ.

Программэм игъэцэкIэнкIэ анахьэу къахэщыгъэр экономикэмрэ гъэIорышIэнымрэ яфакультет истудент къыгъэхьазырыгъэ проектыр ары, ащ ыцIагъэр: «Студентхэм агу регъэхьыгъэныр ыкIи къещэлIэгъэнхэр программэу «Къулыкъу ахьызэ егъэджэгъэнхэр» зыфиIорэр МКъТУ-м щагъэцэкIэным». Проектыр едзыгъуитIукIэ агъэцэкIагъ: 2024-рэ илъэсым ишэкIогъу мазэ ыкIи 2025-рэ илъэсым игъэтхапэ-мэлылъфэгъу мазэхэм. Ащ Iоф дашIэфэ информационнэ-гъэсэныгъэ Iофтхьабзэ 36-рэ рагъэкIокIыгъ, ахэмэ студент нэбгырэ 2000 ахэлэжьагъ. Проектым игъэцэкIэн къихьащт илъэсми лъагъэкIотэщт.

Программэу «Къулыкъу ахьызэ егъэджэгъэнхэр» зыфиIорэм дэлажьэхэзэ студентхэми кIэлэегъаджэхэми гъэхъагъэхэр ашIыгъэх:

— Студенткэу Дана Киятовар Урысые зэнэкъокъоу «Инносоциум» зыцIэм ифинал ихьагъ, проектэу «Этно-видеоджэгукIэу «Нартскэ эпосыр: Кавказым икIэн» зыфиIорэр къыгъэлъэгъуагъ (гъэсакIор — экономикэ шIэныгъэхэмкIэ докторэу, профессорэу Iэшъынэ Марин);

— Доцентэу Къыздырмыш Сулиет я II-рэ чIыпIэр Урысые зэнэкъокъоу «Къулыкъу ахьызэ егъэджэгъэнхэр» зыфиIорэм ипрактикэ къыщихьыгъ, шIэныгъэмрэ апшъэрэ гъэсэныгъэмрэкIэ УФ-м иминистрэ игуадзэ дипломыр къыритыжьыгъ, ащ игъусагъ сертификатыри;

— Проектэу «Сэнэхьатым екIурэ лъэубэкъу» зыфиIорэм лауреат щыхъугъ ландшафтнэ архитектурэм ыкIи мэз Iофым икафедрэ икIэлэегъэджэ шъхьаIэу Надежда Сазонец зипащэр;

— 2024-рэ илъэсым итыгъэгъэзэ мазэ МКъТУ-м истудентмэ заявкэ 23-рэ атыгъ зэнэкъокъоу «Инносоциум» зыцIэм хэлэжьэнхэу;

— МКъТУ-м икIэлэегъаджэмэ заявкэ 12 агъэхьыгъ практикхэм я Урысые зэнэкъокъу хэлэжьэнхэу.

Программэу «Къулыкъу ахьызэ егъэджэгъэнхэр» зыфиIорэр 2024-2025-рэ илъэсхэм зэрагъэцэкIагъэм зэфэхьысыжь фэхъугъ еджапIэхэм азыфагукIэ я II-рэ ЗэIухыгъэ зэнэкъокъухэу социальнэ проектхэм афэгъэхьыгъэхэр зэрэзэхащагъэхэр. Ащ студенческэ командэ 65-рэ хэлэжьагъ, ахэр Урысыем ишъолъыриймэ къарыкIыгъагъэх. Iофтхьабзэм текIоныгъэ къыдэзыхыгъэ проект 33-рэ къыгъэнэфагъ. Зэхахьэм икIэухым текIоныгъэ къыдэзыхыгъэ кIэлэегъаджэхэмрэ студентхэмрэ къыхагъэщыгъэх.

Программэу «Къулыкъу ахьызэ егъэджэгъэнхэр» зыфиIорэр къихьащт еджэгъу илъэсми лъагъэкIотэщт, кIэлэегъаджэхэми студентхэми, социальнэ гъусэхэми яамалхэр зэхалъхьащтых апшъэрэ пшъэрылъхэр агъэцэкIэнхэм фэшI.