Мыекъопэ къэралыгъо технологическэ университетым иректорэу Къуижъ Саидэ аIукIагъ Мединститутым истудентхэу хэгъэгум иклиническэ базэ анахь дэгъухэм ащыщ стажировкэ щызыхьыгъэхэм — гражданскэ авиацием иклиническэ сымэджэщ Гупчэу Москва дэтым, джащ фэдэу ащ кIонэу зызгъэхьазырхэрэм.

ЖъоныгъуакIэм и 12-м къыщыублагъэу и 23-м нэс МКъТУ-м иапэрэ курс щеджэрэ студент анахь дэгъуипшIымэ ащ производственнэ практикэр ащахьыгъ — гражданскэ авиацием иклиническэ сымэджэщ Гупчэу Москва дэтым.  Неущрэ врачхэм IэпэIэсэныгъэм зыфагъэсагъ ыкIи непэрэ уахътэм диштэрэ медицинскэ технологиехэр агъэфедагъэх, непэрэ клиническэ медицинэм практикэм хищагъэх.

ЗэIукIэгъум хэлэжьагъэх егъэджэн IофшIэнымкIэ проректорэу Людмила Задорожнаяр, лечебнэ факультетым идеканэу Беслъангъур Заремэ, деканым игуадзэу Нэгъой Джэнэт, джащ фэдэу кIэлэегъаджэхэр ыкIи студентхэр. Онлайн шIыкIэмкIэ зэIукIэм къыхэлэжьагъ ПшыхьакIэ Ахьмэд — медицинэ шIэныгъэхэмкIэ докторыр,  урологыр ыкIи онкологыр, Гражданскэ авиацием исымэджэщ медицинэ лъэныкъомкIэ иврач шъхьаIэ игуадзэ, МКъТУ-м  илечебнэ факультет урологием ыкIи общэ хирургием икафедрэ ипащэр.

Практическэ Iахьэу студентмэ акIугъэм зэIукIэм зэфэхьысыжьхэр щыфашIыгъэх ыкIи тапэкIэ клиникэм зэрэдэлэжьэщтхэмкIэ пшъэрылъыкIэхэр агъэуцугъэх. Саидэ Казбек ыпхъум предложение къыхьыгъ гъэсэныгъэ трекхэр МКъТУ-м истудент анахь дэгъухэм апае атIупщынхэу. Ар проектыкIэ уплъэкIунэу щытыщт, студентэу гъэсэныгъэ трек зиIэ пэпчъ гъэсакIохэу кIэлэегъаджэхэмрэ врачхэмрэ ышъхьагъ итыщтых. МКъТУ-м гъусэгъу къыфэхъущтых анахь клиникэ ыкIи апшъэрэ еджэпIэ дэгъухэу хэгъэгум итхэр, Москва, Санкт-Петербург, Краснодар, Налщыкъ адэтхэр.

Мы гъэмафэм, шышъхьэIум и 5-м къыщыублагъэу и 16-м нэс практикэ ахьынэу джыри студентыкIэхэр гражданскэ авиацием иклиническэ сымэджэщ Гупчэу Москва дэтым ыкIи ГБУЗ «Научно-исследовательский институт неотложной детской хирургии и травматологии — Клиника доктора Рошаля» зыфиIорэм кIощтых.

Мыщ фэдэ Iофтхьабзэхэр Шъолъыр общественнэ организациеу «Врачхэм я Хасэ» ыпкъ къикIэу агъэцэкIэшъухэ хъугъэ. МКъТУ-м имедицинскэ факультетхэм ястудентхэм апае ренэу «Врач ныбжьыкIэм иеджапI» зыфиIорэр щакIу, научнэ-практическэ конференциехэр зэхащэх, джащ фэдэу курсэу «Сэнэхьатым хэзыщэрэри» агъэфедэ. А проектхэр зэкIэ гъэцэкIэгъэнхэм ауж ит «Врачхэм я Хасэ» итхьаматэу, псауныгъэр къэухъумэгъэнымкIэ къалэу Москва и Департамент кIэлэцIыкIухэмкIэ штатым хэмыт ихирургэу, медицинэ шIэныгъэхэмкIэ докторэу,  ГБУЗ «НИИ неотложной детской хирургии и травматологии» зыфиIорэм иотделение ипащэу Жанна Семеновар. Джары мыщ фэдэ зэфэхьысыжьхэр непэ зыкIытиIэхэр: хэгъэгум иклиникэ анахь дэгъухэм гъусэныгъэ адэтэшIы, зэлъашIэрэ специалист-практикхэм ягъэсэныгъэ процесс тыхэлажьэ, врач ныбжьыкIэхэм япрофессиональнэ сообществэ тэгъэпсы ыкIи шъолъырхэм азыфагукIэ зэфыщтыкIэхэр тэгъэпытэх.