Мыекъопэ къэралыгъо технологическэ университетым республикэ спортивнэ зэнэкъокъухэр дрон зэпэгъэчъэнхэмкIэ (пилот зэрымыс къухьэбыбхэмкIэ) щыкIуагъэх, ахэр Адыгэ Республикэм изэнэкъокъоу «Лъагэу быбырэр»зыфиIорэм иапэрэ едзыгъоу щытых.

Зэнэкъокъум хэлэжьагъэх МКъТУ-м и Дзэ егъэджэн гупчэ истудентхэр ыкIи Тэхъутэмыкъое, Джэджэ районхэм, къалэу Мыекъуапэ къарыкIыгъэхэр.

Зэнэкъокъухэр гъэшIэгъонэу рекIокIыгъэх, ащ хэтыгъэх зэпэчъэнхэу ыкIи зэпэгъэбыбынхэу техническэ амалхэр къызщагъэлъэгъуагъэхэр, скорость лъэш къызщарагъэтыгъэхэр. Хэлажьэхэрэмэ IэпэIэсэныгъэ ахэлъэу пилот зэрымыс аппаратхэр агъэIорышIагъэх, уахътэ гъэнэфагъэм гъэцэкIэнхэр ашIыгъэх.

Программэм лъэныкъуитIу къыдиубытыщтыгъэр — классэу мм 75-рэ ыкIи техническэ симуляторхэр, ахэмэ амал къатыгъ хэлажьэрэмэ практическэ ыкIи виртуальнэ шIыкIэхэр агъэфедэхэзэ дронхэр агъэIорышIэнхэр, шъыпкъэм пэблагъэу зэнэкъокъугъэх. Зэфэхьысыжьэу турнирым фэхъугъэмкIэ МКъТУ-м хэхьэрэ Дзэ егъэджэн гупчэм икурсантэу Никита Вакулиным я III-рэ чIыпIэр къыдихыгъ, ащ пилотированиемкIэ шIэныгъэ ыкIи шIыкIэ дэгъу дэдэхэр къыгъэлъэгъуагъэх, техникэр егъэIорышIэшъу.

Iофтхьабзэм изэхэщэкIуагъэхэр: Шъолъыр Адыгэ Республикэм ифизкультурнэ-спортивнэ общественнэ организациеу «Дронхэм язэпэгъэчъэн Федерацие  (пилот зэрымыс къухьэбыбхэр) ыкIи Мыекъопэ къэралыгъо технологическэ университетыр.

Мыщ фэдэ Iофтхьабзэхэм яшIуагъэкIэ техническэ спорт лъэпкъхэм заушъомбгъу, ныбжьыкIэхэм яинженернэ гупшысэ хегъахъо, ахэр непэрэ технологическэ лъэныкъохэм нахь афэщагъэхэ мэхъух.

Тыгу къыддеIэу текIоныгъэ къыдэзыхыгъэмэ тафэгушIо! ТапэкIэ джыри гъэхъэгъабэ ашIынэу, текIоныгъакIэхэр къыдахынхэу тафэлъаIо!