Мыекъопэ къэралыгъо технологическэ университетым ипсихологическэ къулыкъу ипащэу, психологие шIэныгъэхэмкIэ кандидатэу Людмила Красновар гъэ къэс зэхащэрэ семинар-зэхэсыгъом хэлэжьагъ, ащ апшъэрэ гъэсэныгъэм епхыгъэ организациехэм ялIыкIохэр зэфищагъэх. Iофтхьабзэр Москва щыкIуагъ.

Iофтхьабзэм нэбгырэ 500-м ехъу хэлэжьагъ — апшъэрэ еджапIэмэ япсихологическэ къулыкъуи 173-мэ япащэхэу ыкIи яспециалистхэу шъолъыр 70-мэ къарыкIыгъэхэр. Апэрэу, форумым къыдыхэлъытагъэу, ащ студентхэр хэлэжьагъэх, психологием фырагъаджэхэрэр.

Тульскэ къэралыгъо университетыр наукэмрэ апшъэрэ гъэсэныгъэмрэкIэ УФ-м и Министерствэ иIэпыIэгъоу форумым изэхэщэкIуагъ. ЗэIукIэм иапшъэрэ пшъэрылъыр — зыкI психологическэ системэм хэхъоныгъэхэр егъэшIыгъэнхэр, специалистхэм яIэпэIэсэныгъэ зыкъегъэIэтыгъэныр, анахьэу студенческэ ныбжьыкIэмэ адэлажьэрэмэ.

Мэфищым къыкIоцI форумым хэлажьэхэрэр гъэсэныгъэ ыкIи практическэ программэм хэлэжьагъэх, ащ тематическэ зэхэгущыIэжьхэр, семинархэр, тренингхэр, Iэнэ хъураехэр къыдыхэлъытэгъагъэх. ЗещакIохэм ащыщыгъэх специалистхэу гъэсэныгъэмкIэ Урысые академием, Лъэпкъ ушэтэкIо университетэу «Экономикэм иапшъэрэ еджапIэ», Московскэ къэралыгъо университетэу М.В. Ломоносовым ыцIэ зыхьырэм, РАН-м психологиемкIэ и Институт, ныбжьыкIэ IофхэмкIэ Федеральнэ агентствэм, Движения Первых зыфиIорэм, психологическэ ыкIи междисциплинарнэ ушэтынхэмкIэ Федеральнэ научнэ гупчэм, МЧС-м ыкIи ухъумэнымкIэ Урысыем и Министерствэ къарыкIыгъэхэр.

— 2025-рэ илъэсым гъэсэныгъэмкIэ Урысые академием ыкIи Лъэпкъ ушэтэкIо университетэу «Экономикэм иапшъэрэ еджапIэм» ныбджэгъуныгъэ адытиIэу ыкIи тызэгъусэу проектыкIэ тэгъэцакIэ, ар студентхэмкIэ Iэрыфэгъу хъущт  социальнэ-психологическэ лъэныкъом хэхъонгъэхэр егъэшIыгъэнхэм фэгъэхьыгъ. Университетхэм психологическэ системэр ащыгъэпытэгъэнымкIэ ар зы лъэубэкъу, — къыхигъэщыгъ наукэмрэ апшъэрэ гъэсэныгъэмрэкIэ УФ-м и Министрэ иапэрэ гуадзэу Ольга Петровам.

2020-рэ илъэсым къыщыублагъэу апшъэрэ еджапIэмэ ащылажьэрэ психологическэ къулыкъухэм ахэхъуагъ, 256-рэ хъущтыгъэхэмэ, джы пчъагъэр 522-м нэсыгъ, а системэм щылажьэрэ специалистмэ япчъагъэ нэбгырэ 2 300-м шъхьадэкIыгъ. Ахэмэ яIофшIэн бэ зэлъиубытырэр — студентхэм упчIэжьэгъу афэхъунхэм къащегъэжьагъэу кIэлэегъаджэхэм, IофшIакIохэм, хэушъхьафыкIыгъэ дзэ операцием хэлажьэрэмэ яунагъомэ анэсыжьэу адэлэжьэнхэр.

Профессиональнэ сообществэр гъэпытэгъэнымкIэ, психологическэ IэпыIэгъум зегъэушъомбгъугъэнымкIэ, ныбжьыкIэхэм екIолIэкIэ хэушъхьафыкIыгъэ къафэгъотыгъэнымкIэ семинарыр площадкэ шIагъо хъугъэ.