Мыекъопэ къэралыгъо технологическэ университетым и «Точка кипение» Iэнэ хъурае щыкIуагъ, ар темэу «Адыгэ Республикэм ландшафтнэ архитектурэмкIэ иобъектхэм япроектированиерэ яшIынрэ япхыгъэ непэрэ гумэкIыгъохэр» зыфиIорэм фэгъэхьыгъагъ.

Экологическэ факультетым ландшафтнэ архитектурэмкIэ ыкIи мэз IофымкIэ икафедрэ ипащэу Наталья Трушевам шIуфэс псалъэ къышIыгъ.

Iофтхьабзэм хэлэжьагъэх архитектурэмрэ къэлэгъэпсынымрэкIэ къалэу Мыекъуапэ и ГъэIорышIапIэ, архитектурэмрэ къэлэгъэпсынымрэкIэ Адыгэ Республикэм и Комитет, МУП «Культурэмрэ зыгъэпсэфынымрэкIэ къэлэ паркыр» зыфиIорэм ялIыкIохэр, унэе предпринимательхэр, профессорскэ-кIэлэегъэджэ купэу «Ландшафтнэ архитектурэр» зыфиIорэ лъэныкъом студентхэр фезгъаджэхэрэр.

УпчIэ шъхьаIэхэу зытегущыIагъэхэр зыфэгъэхьыгъагъэхэр архитектурнэ-планировочнэ организациехэу къалэм дэтхэм, общественнэ хъоум хэхъоныгъэ егъэшIыгъэным, профильнэ организациехэм адэлэжьэгъэным япхыгъагъэх.

Докладхэр къэзышIыгъэхэр:

— архитектурэмрэ къэлэгъэпсынымрэкIэ къалэу Мыекъуапэ и ГъэIорышIапIэ ипащэ игуадзэу Ацумыжъ Мадина — зыгъэпсэфыпIэ паркэу Мэздахэ, Лениным игупчэ, чъыгдэкIыпIэу Шварцым язэтегъэпсыхьан фэгъэхьыгъэ планхэм ягъэцэкIэн, джащ фэдэу мэзпаркым ирайон гъэкIэжьыгъэнымкIэ гугъапIэу щыIэхэр;

— архитектурэмрэ къэлэгъэпсынымрэкIэ Адыгэ Республикэм и Комитет итхьаматэ игуадзэу Марина Градковар, — поселкэу Гончаркэм дэт дендропаркэу П.В. Букреевам ыцIэ зыхьырэм гъэцэкIэжьынхэр щышIыгъэнхэмкIэ проектыр ыкIи лъэныкъуабэ къызэдэзыубытырэ хъоур а чIыпIэм щыгъэпсыгъэныр;

— МУП «Культурэмрэ зыгъэпсэфынымрэкIэ къэлэ паркыр» зыфиIорэм ипащэ игуадзэу Андрей Тришиныр, — къэлэ паркыр едзыгъо-едзыгъоу хэгъэхъогъэным истратегие.

Iэнэ хъураем зэфэхьысыжьэу фэхъугъэмкIэ къыхагъэщыгъ тапэкIэ МКъТУ-р ландшафтнэ архитектурэм ылъэныкъокIэ профильнэ организациехэм адэлэжьэн зэрэфаер ыкIи ныбджэгъуныгъэ зэпхыныгъэхэм зэрафэхьазырыр.

Адыгеим иархитектурнэ теплъэ нахьышIу зэрэхъурэр кIэухым къыкIагъэтхъыгъ, ащ ишIуагъэкIэ шъолъырым къеблагъэхэрэм япчъагъэ хэхъо.