Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ар зэрищагъ ректорэу Къуижъ Саидэ. Зэхэсыгъом хэлэжьагъ МКъТУ-м ипрезидентэу ТхьакIущынэ Аслъан.

Зэхэсыгъом иповесткэ тегущыIэнхэм ыпэкIэ, хабзэ зэрэхъугъэу профессорскэ-кIэлэегъэджэ купым щыщхэу зимэфэкIыгъэхэм афэгушIуагъэх, шIухьафтынхэр афашIыгъэх. Джащ фэдэу афэгушIуагъэх командэу «Динамо-МКъТУ-м», ащ текIоныгъэу я II-рэ едзыгъоу Мыекъопэ Баскетбольнэ Лигэм къыщыдихыгъэр къыхагъэщыгъ.

Ащ ыуж советым хэтхэр повесткэм иупчIэхэм язэхэфын фежьагъэх.

Докладэу «О реализации стратегии цифровой трансформации ФГБОУ ВО «Майкопский государственный технологический университет» до 2030 года» зыфиIорэр къышIыгъ цифровизациемкIэ проректорэу Дмитрий Игнатовым. Ащ игущыIэхэм къащыхигъэщыгъ университетым истратегие 2024-рэ илъэсым зэрэщагъэцэкIагъэр, а стратегиер Урысые Федерацием илъэпкъ пшъэрылъхэм хэхъоныгъэ 2036-рэ илъэсым нэс ягъэшIыгъэным къыдилъытэу зэхагъэуцогъагъ, 2030-рэ илъэсым ехъулIэу апшъэрэ еджапIэр цифрэ лъэныкъомкIэ зыпкъ иуцоным, цифрэ экосистемэр щыгъэпсыгъэным, проценти 100-м кIахьэу университетым ифэIо-фашIэхэр цифрэкIэ агъэцэкIэнхэм къыфэщэгъэнхэр ары ипшъэрылъыр. Цифрэ сервисхэм алъэныкъокIэ IофшIэнышхохэр ашIагъэх: Зэхагъэуцуагъ ыкIи Iоф арагъэшIагъ модуль 11-мэ, зыкI электроннэ информационнэ-гъэсэныгъэ системэм щыщы хъугъэх, уазэрэдэлэжьэщтымкIэ игъэкIотыгъэ (ЭИОС), WIKI-портал инструкциехэр ягъусэх, электроннэ шIыкIэм тетэу документхэр зэрагъэзекIощтхэр, «IС: Документооборот» зыфиIорэр атIупщыгъ. Ащ фэшъхьафэу, зыгъэфедэрэмэ техническэ IэпыIэгъу афэхъущт шIыкIэр агъэпсыгъ, каналыбэ хъурэ зэпхыныгъэр атIупщыгъ, проектэу кIэлэегъаджэхэм яIофшIэн къэзгъэпсынкIэрэр, расписанием изэхэгъэуцонкIэ системэу «IС: Университет» зыцIэр щыIэ хъугъэ. Инфраструктурэм хэхъоныгъэ егъэшIыгъэным къыдыхэлъытагъэу гъэсэныгъэ кластерэу «ПрофиМед» зыфиIорэм пае Iэмэ-псымакIэхэр ащэфыгъэх, видеолъыплъэнымкIэ ыкIи Wi-Fi зыцIэм зегъэушъомбгъугъэнымкIэ проектыр агъэцэкIагъ, пилот зэрымыс аппаратхэм Iоф зэрябгъэшIэщтым фытегъэпсыхьэгъэ техникэр къащэфыгъ, 3D-принтерхэр, сканерхэр, суперкомпьютерэу искусственнэ акъылым ипшъэрылъхэр зыгъэцэкIэщтыр зэрагъэгъотыгъэх. Кадрэхэм яIоф хэгъэкIыгъэным пае IэпэIэсэныгъэр хэгъэхъогъэнымкIэ курсхэр зэхащагъэх, лъэныкъоу искусственнэ акъылыр зэрэбгъэIорышIэщтыри ахэм ащыщыгъ, информацие щынэгъончъэным IофшIакIохэр джащ фэдэу фагъэсагъэх. Докладым икIэухым, тапэкIэ цифрэм хэхъоныгъэхэр егъэшIыгъэнхэмкIэ предложениехэр къыхьыгъэх.

МКъТУ-м имэкъу-мэщ IофшIэнкIэ Научнэ-ушэтэкIо институтыр 2023-2024-рэ илъэсхэм зэрэлэжьагъэм къытегущыIагъ институтым ипащэ ипшъэрылъхэр зыгъэцакIэрэ Хьаткъо Казбек. Ащ къызэриIуагъэмкIэ, НИИСХ МКъТУ-р хэушъхьафыкIыгъэ научнэ-производственнэ подразделениеу университетым иI, непэрэ уахътэм диштэрэ ресурснэ ыкIи лабораторнэ базэ IэкIэлъ, ахэмэ ушэтынхэр агробиотехнологиехэм, селекциехэм ыкIи семеноводствэм алъэныкъокIэ ащашIых, Адыгэ Республикэм иагропромышленнэ комплекс хэхъоныгъэ егъэшIыгъэным яIахьышхо халъхьэ. Ежьхэм къыдагъэкIырэ чылапхъэхэр IуагъэкIых, ащ лъэшэу анаIэ тырагъэты. Урысые ФедерациемкIэ мы институт закъор ары бжыхьэсэ хьэм ичылапхъэхэр къызщыдагъэкIырэр. Хьаткъо Казбек идоклад къыщыхигъэщыгъ 2023-2024-рэ илъэсхэм ащ фэдэ чылэпхъэ тонн 11 къызэратIупщыгъэр. Ащ фэшъхьафэу, а уахътэм къыкIоцI мэкъу-мэщ техникэр зэрагъэгъотыгъ, лабораторием пае Iэмэ-псымэхэр ащэфыгъэх, зэкIэмкIи сомэ миллиони 10 ахэм атефагъ. ШIэныгъэмрэ гъэсэныгъэмрэкIэ УФ-м и Министерствэ ахъщэ къахилъхьанымкIэ заявкэ атыгъэу щыт.

Научнэ-гъэсэныгъэ гупчэу «Инновационные образовательные технологии развития бережливых компетенций современного инженера («LeanSkills.Lab»)» зыфиIорэм ипащэу Сергей Чефрановым идоклад зыфэгъэхьыгъагъэр федеральнэ инновационнэ площадкэр ары. ЗэнэкъокъукIэм пае предложениехэр агъэхьазырых, ащ университетыр 2020-рэ илъэсым къыщегъэжьагъэу хэлажьэ. ШIэныгъэмрэ гъэсэныгъэмрэкIэ УФ-м и Министерствэ иунашъо елъытыгъэу а Iофыр зэшIуахы. Сергей Георгий ыкъор игъэкIотыгъэу проектэу «Инновационные образовательные технологии развития бережливых компетенций современного инженера» зыфиIорэм къытегущыIагъ, ар ФИП-м къыдыхэлъытагъэу агъэцакIэ. Пшъэрылъ шъхьаIэу ащ иIэр тираж ашIырэ моделэу специалистхэр зэрагъэхьазырырэ системэр ары, ащ ежь ифилософие иI, кIэугъоекIо производствэр, инженернэ IофшIэн зэфэшъхьафыбэ къыделъытэ. ФИП-р чанэу хэлажьэ федеральнэ ыкIи лъэпкъ проектхэм япхырыщын, «Гъэсэныгъэр», «Наукэр ыкIи университетхэр», «Цифрэ экономикэр», «Производительность труда и поддержка занятости», «Демография» зыфэпIощтхэр ыкIи нэмыкIхэр. Мы площадкэм цIыфхэр щырагъаджэх, ащ къыхеубытэ федеральнэ проектэу «Содействие занятости» зыфиIорэр. Къыхагъэщыгъ, зэкIэ Iофтхьабзэхэу 2021-2024-рэ илъэсхэм агъэнэфэгъагъэхэр дэгъу дэдэу агъэцэкIагъэх.

Зэхэсыгъом къыдыхэлъытагъэу Адыгэ Республикэм и Къэралыгъо премие къыфагъэшъошэным фэшI къагъэлъэгъуагъ тхылъэу «В поисках староадыгских сортов яблони и груши» зыфиIорэр, ащ иавторхэр МКъТУ-м инаучнэ IофышIэу Ирина Бандуркэр ыкIи МКъТУ-м и Политехническэ колледж икIэлэегъаджэу Кудаикъо Нурет. Тхылъым илъэс пчъагъэхэм къакIоцI ашIыгъэ ушэтынхэр, шъоф IофшIэнхэр, генофондэу адыгэ чъыг лъэпкъхэм яIагъэхэр щызэфэхьысыжьыгъэх. Мы IофшIагъэм научнэ, культурнэ ыкIи прикладной мэхьанэшхо иIэу щыт, ащ хэхьэ шъолъырым иагропромышленнэ комплекс хэхъоныгъэхэр егъэшIыгъэнхэр ыкIи биозэфэмыдэныгъэр къухъумэгъэныр

МКъТУ-м и Медицинскэ институт ипащэу НэмытIэкъо Хьазрэт къыIотагъ медицинскэ ыкIи фармацевтическэ химием якафедрэ фармацевтическэ факультетым къызэрэщызэIуахыгъэр. Институтым зэрэхахъорэм, научнэ ыкIи егъэджэн ухьазырыныгъэхэм къапкъырыкIыхэзэ а лъэубэкъур ашIыгъ, джащ фэдэу нахь куоу ушэтынхэр ашIынхэр ащ къыделъытэ. Кафедрэу къызэIуахыгъэм фармацевтическэ факультетым игъэсэныгъэ ыкIи инаучнэ базэ ыгъэпытэщт, студентхэм яухьазырыныгъэ нахь шэпхъэ лъагэхэм атетэу хъущт. Ащ фэшъхьафэу, Хьазрэт Аслъанэ ыкъом къыIопщыгъ кафедрэм ипащэу Ифрат Зилфикаровыр зэрагъэнэфагъэр — фармацевтическэ шIэныгъэхэмкIэ докторыр, наукэмкIэ Урысые академием ипрофессорыр, медицинскэ ыкIи фармацевтическэ химием куоу ахэзышIыкIырэр. Медицинскэ институтым ишIэныгъэлэжьхэм ясовет мы кандидатурэм дырагъэштэгъагъ.

ШIэныгъэлэжьхэм ясовет макIофэ мыщ фэдэ докладхэр къашIыгъэх: «ЗэдэгущыIэгъу шапхъэм илъэу чIэхьэгъу ушэтынхэр ягъэтыгъэнхэу гурыт еджапIэхэр Белгородскэ, Курскэ ыкIи Брянскэ хэкухэм 2025-рэ илъэсым къащызыухыгъэхэм, Урысыем гъэсэныгъэмкIэ и Министерствэ иунашъоу мэзаем и 17-м 2025-рэ илъэсым къыдэкIыгъэм № 107-м елъытыгъэу перечнем хэтхэр, джащ фэдэу апшъэрэ еджапIэм игъэсэныгъэ программэ зэхъокIныгъэ фэхъугъэхэр – программэхэу бакалавриатымкIэ, программэхэу специалитетымкIэ, программэхэу магистратурэмкIэ 2025/26 еджэгъу илъэсым»; «ЕджапкIэхэр гъэнэфэгъэнхэмкIэ студентхэу ВО ыкIи СПО-м, магистрантхэм, аспирантхэм апае»; «Къэралыгъо зэфэхьысыжь аттестацииер гъэсэныгъэ программэхэу СПО-кIэ медицинскэ ыкIи фармацевтическэ гъэсэныгъэмкIэ къэралыгъо ушэтыныр тыгъэнымкIэ шапхъэу щыIэр»; «АР-м иапшъэрэ стипендие къатынымкIэ АР-м и Правительствэ зыфэгъэзэгъэныр»; «Гъэсэныгъэ программэхэр 2025-кIэ штэгъэныр»; «ОрдинатурэмкIэ гъэсэныгъэ программэхэр 2025-кIэ штэгъэныр».

Зэхэсыгъом икIэухым ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэ университетым зэрэщеджэхэрэм ыпкIэ къегъэIыхыгъэным фэгъэхьыгъэ Iофыгъом къытегущыIагъ.

ШIэныгъэлэжьхэм ясовет щагъэнэфэгъэ упчIэхэр зэкIэ зэхафыгъэх.