Мыекъопэ къэралыгъо технологическэ университетымрэ автономнэ мыкоммерческэ организациеу «ГъэIорышIэкIо компаниеу Селекционнэ-чылэпхъэ гупчэу «Джаджэ» зыфиIорэмрэ зэрэзэдэлэжьэщтхэмкIэ зэзэгъыныгъэм зэдыкIэтхагъэх.

Мыекъопэ къэралыгъо технологическэ университетымрэ автономнэ мыкоммерческэ организациеу «ГъэIорышIэкIо компаниеу Селекционнэ-чылэпхъэ гупчэу «Джаджэ» зыфиIорэмрэ зэрэзэдэлэжьэщтхэмкIэ зэзэгъыныгъэм зэдыкIэтхагъэх.

Университетым официальнэу Агробиотехнопаркым ирезидент статусыр иIэ хъугъэ, ар Адыгэ Республикэм и ЛIышъхьэу КъумпIыл Мурат яIэпыIэгъоу агъэцакIэ.

Агробиотехнопаркэу «Джаджэр» — УрысыемкIэ апэрэ проект, наукэр, промышленностыр ыкIи агробизнесыр селекцием ылъэныкъо хэщэгъэнхэр, НИОКР-р, реинжинирингыр шIыгъэнхэр къыделъытэ. Ащ ипшъэрылъыр — къэугупшысыгъэнхэр ыкIи хэгъэхьэгъэнхэр апшъэкIэ щыIэ лъэпкъхэмрэ гибридхэмрэ, ахэр климатэу зэхъокIырэм хэгъэгъозэгъэнхэр, мэкъу-мэщышIэхэм чылапхъэ дэгъухэр аIэкIэгъэхьэгъэнхэр.

IофшIэгъу зэIукIэгъум хэлэжьагъэх гъэцэкIэкIо пащэу Иван Аристарховыр, университетым иректорэу Къуижъ Саидэ, проректорхэр, МКъТУ-м и НИИСХ-м иIофышIэхэр, шIэныгъэлэжьхэр, профильнэ факультетхэм ядеканхэр.

ЗыщызэхэгущыIэжьхэрэ уахътэм Иван Аристарховым проектэу Агробиотехнопаркэу «Джаджэм» лъэтегъэуцо къыфишIыгъ, ащ ипшъэрылъхэр къыIотагъэх: инновациехэр, технологиехэр кIэу хэгъэхьэгъэнхэр, джащ фэдэу мэкъу-мэщ секторыр зыгъэлъэшыщт лъэныкъохэм, наукэм ыкIи бизнесым Iоф адэшIэгъэныр.

МКъТУ-м иректорэу Къуижъ Саидэ зэдэлэжьэныгъэм имэхьанэ къыкIигъэтхъыгъ: «Тызэгъусэхэу  Агробиотехнопаркымрэ тэрырэ тызэрэзэдэлажьэрэм ишIуагъэкIэ, тишIэныгъэлэжьмэ рагъэкIокIырэ ушэтынхэм ахэдгъэхъон тлъэкIыщт, апшъэрэ технологиехэр АПК-м хэдгъэхьашъущтых, ащ Адыгэ Республикэм ыкIи хэгъэгум яэкономикэ мэкъу-мэщым ылъэныкъокIэ зэхапшIэу къыIэтыщт».  

БгъуитIуми илъэсыбэрэ Iоф зэрэзэдашIэщтыр къаIуагъ. Зэзэгъыныгъэм къыдыхэлъытагъэу университетым научнэ-техническэ, гъэсэныгъэ ыкIи производственнэ проектхэр ыгъэцэкIэщтых,  ащ хэхьащтых лъэныкъохэу агроинженериер, селекциер ыкIи семеноводствэр, консалтингыр, Iофтхьабзэхэр зэхэщэгъэнхэр, кадрэхэм ягъэхьазырын ыкIи нэмыкIыбэхэр.

Мыщ фэдэ проектым университетыр зэрэхэлажьэрэм ишIуагъэкIэ шъолъырым имэкъу-мэщ инновационнэ хэхъоныгъэхэр егъэшIыгъэнхэмкIэ, наукэмрэ бизнесымрэ зэпхыгъэнхэмкIэ алъапсэу мэхъу.