Проектэу «Азбука финансов для лиц серебряного возраста» зыфиIорэм къыдыхэлъытагъэу МКъТУ-м иплощадкэ зэдэгущыIэгъоу «Шъузфэсакъыжь, гъэпцIакIохэр! Нэбгырэ пэпчъ мы шапхъэхэр ышIэнхэ фае!» зыфиIорэр щыкIуагъ.

ПАО «Сбербанкым» и адыгэ къутамэу №8620-р ыкIи финансовэ гъэсэныгъэмкIэ Шъолъыр Гупчэр зэгъусэхэу мы Iофтхьабзэр зэхащагъ. 

Банкым иIофышIэхэм къаIотагъ анахь гъэпцIэкIо шIыкIэу бзэджашIэмэ агъэфедэрэр, ащ зызэрэщыухъумэщт шIыкIэхэр. ЗэкIэмэ анахь лъэшэу агъэфедэрэр — бзэджашIэхэр «финансовэ разведкэм» иIофышIэхэу зыкъызэрагъэлъагъорэр ары, ахъщэу яIэр зэкIэ къырахынышъ фэшъхьаф счетым рагъэхьан фаеу къараIо, ар «бзэджашIэхэм» аIэкIэмыхьаным фэшI.

Шъугу къэкIыжьын фае: Росфинмониторингым (официальнэу финансовэ разведкэм) цIыфхэм афытеорэп, адэлажьэрэп, ахъщэ ыухъумэнэу къаIихырэп.

«Программа долгосрочных сбережений» (ПДС) зыфиIорэ темэм анаIэ тырадзагъ, игъэкIотыгъэу иугъу ашIыгъ, ащ къытегущыIагъэр РЦФГ-м ипащэу Татьяна Паладовар ары.

— «Программа долгосрочных сбережений» зыфиIорэр — ар щынэгъончъэ финансовэ шъхьантэу щыт, тапэкIэ федэ къырыпхьынэу гугъапIэ къеты. Къэралыгъом иахъщэ къыхигъэхъощт, гъэсэныгъэм, медицинэм алъэныкъокIэ, жъыгъо дэгъум пэгъокIынхэмкIэ къадэIэпыIэщт,— къыIотагъ Татьяна Паладовам. 

Ныбджэгъу лъапIэхэр!

Шъугу къэтэгъэкIыжьы, зэпымыоу социальнэ хъытыухэм рубрикэу «МКъТУ-м къеIопщы!» зыфиIорэр арытэгъахьэ, ащ бзэджэшIэ-гъэпцIэкIо схемэхэр зыфэдэхэр къащытэIуатэ, зызэращыухъумэщт шIыкIэм ышъхьэ къащитэхы. Мыщ фэдэ хэштегхэм ащыжъугъотыщтых: #ОсторожноМошенники #ЗащитиСебя #БезопасностьСтудента.

Шъузфэсакъыжь, хъурэр зэжъугъашI — джары шъукъэзыухъумэщтыр!