Мыекъопэ къэралыгъо технологическэ университетым и «Точка кипение» щыкIуагъ кIэлэеджакIохэм янаучнэ-техническэ творчествэ и Урысые зэнэкъокъу ишъолъыр едзыгъоу «ШУСТРИК» — проектышхоу ныбжьыкIэхэр инженернэ ыкIи изобретательскэ творчествэм хэщэгъэнхэм фэгъэхьыгъэр.

УФ-м и Президент иунашъо елъытыгъэу зэнэкъокъур рагъэкIокIы ыкIи лъэпкъ стратегиехэм ягъэцэкIэн  гъэсэныгъэмкIэ, цифрэ ыкIи научнэ-технологическэ прогрессымкIэ хэхъоныгъэхэр шIыгъэнхэм фытегъэпсыхьагъ. ЗэхэщакIор — научнэ-техническэ сферэм хэхьэрэ предприятие цIыкIухэм адэлэжьэгъэнымкIэ Фондыр ары. 2023-рэ илъэсым къыщыублагъэу МКъТУ-м Адыгэ Республикэр зэнэкъокъум къыщегъэлъагъо.

ШIуфэс псалъэ къышIыгъ инновациехэм адэлэжьэгъэнымкIэ шъолъыр Фондым итхьаматэу, научнэ IофшIэнымкIэ ыкIи  инновационнэ хэхъоныгъэмкIэ проректорэу Татьяна Овсянниковам. КIэлэцIыкIухэм ятворчествэ лъыгъэкIотэгъэным, ягукъэкIхэм тамэ къагогъэкIэгъэныр IофыгъошIоу зэрэщытыр ащ къыхигъэщыгъ.

Мыгъэ шъолъыр едзыгъом хэлэжьэнхэу заявки 6 къатыгъ:

— Проекти 2 десэу «Бактериер къэгъот» зыфиIорэмкIэ (команднэу ыкIи изакъоу);

— Шъхьаф-шъхьафхэу проекти 2-у «Марсоход»;

— 1 шъхьаф проектэу — «Помощь в изучении школьных предметов»;

— 1 проектэу «Очищаем планету».

Iофэу агъэцэкIагъэм кIэухэу фэхъущтыр хэушъхьафыкIыгъэ техническэ екIолIакIэхэр, инновационнэ проектхэр, моделэу къагъэлъэгъуагъэхэр, макетхэр, пэчIынатIэхэр ыкIи нэмыкIхэр арых.

Хэлажьэрэ пэпчъ ипроект къыгъэлъэгъуагъ, осэшIмэ яупчIэмэ джэуапхэр къаратыжьыгъэх, хагъэхъожьынэу щытхэр къараIожьыгъэх. ЗэкIэ IофшIагъэхэр лъэгапIэхэм анэсхэу гъэцэкIагъэх, шъолъыр едзыгъом щытекIуагъэхэр федеральнэхэм ахэлэжьэнхэ алъэкIыщт, финалист хъущтых.

Iофтхьабзэм икIэухым, МКъТУ-м иректорэу Къуижъ Саидэ торт IэшIу кIэлэцIыкIумэ шIухьафтынэу къафишIыгъ. 

КIэлэцIыкIу техническэ творчествэм хэхъоныгъэ егъэшIыгъэныр — гъэсэныгъэ политикэм мэхьанэ зэратырэ и зы лъэныкъу. ЗэкIэ хэлэжьагъэхэм, гъэсакIохэм лъэшэу тафэраз!