Москва щыкIуагъ я XII-рэ Урысые зэнэкъокъум ифинал, ар студенческэ лигэм апэрэ ыкIи психологическэ IэпыIэгъур ягъэкIыгъэным фэгъэхьыгъэу регъэкIокIы. Урысыем и МЧС мэшIогъэкIосэ къулыкъумкIэ и Къэралыгъо гъэIорышIапIэ и Академие ыкIи МЧС-м психологическэ IэпыIэгъу ягъэгъотыгъэнымкIэ и Гупчэ яIэпыIэгъоу Iофтхьабзэр зэхащагъ.

Апэрэ едзыгъом командэ 719-рэ шъолъыр 88-мэ ащыщхэу хэлэжьагъэх. Финалым ихьагъэхэр командэ 16 ныIэп. Ахэр шъолъырхэм ащытекIуагъэхэр ары, зэу ащыщ Мыекъопэ къэралыгъо технологическэ университетым икомандэу «ВСКС-р», Къыблэ федеральнэ шъолъырым защытекIохэ ужым ащ фэдэ фитныгъэ иIэ хъугъэ.

Тистудентхэр — капитанэу Екатерина Кореевар, джащ фэдэу Дара Ираник ыкIи Денис Пахарчук — пэрыохъуищмэ апхырыкIыгъэх, шIэныгъэ куухэр ыкIи практическэ амалышIухэр къагъэлъэгъуагъэх, я 7-рэ чIыпIэ  урысые финалым къыщахьыгъ.

Десэмэ ахэтыгъэхэр:

I. Викторинэр — теоретическэ шIэныгъэхэм яуплъэкIун.

2. Ситуационнэ десэр — нэбгырищэу   физическэ ыкIи психологическэ шъобжьхэр зытещагъэмэ IэпыIэгъу ягъэгъотыгъэныр.

3. Хэукъоныгъэхэр къыхэгъэщыгъэныр — анализ фэшIыгъэныр апэрэ IэпыIэгъоу арагъэгъотыгъэм. 

Зэнэкъокъум хэлажьэрэмэ уасэ къафэзышIыгъэ экспертхэр  МЧС-м, псауныгъэр къэухъумэгъэнымкIэ министерствэм, РАНХиГС-м ыкIи нэмыкIхэм къарыкIыгъагъэх. Апэрэ IэпыIэгъур егъэкIыгъэнымкIэ Урысые обществэм ихьыкум шъхьаIэу щытыгъэр  Леонид Дежурнэр ары.

Шъугу къэдгъэкIыжьын, МКъТУ-м икомандэ мы зэнэкъокъушхом апэрэу 2022-рэ илъэсым хэлэжьагъ, охътэ кIэкIым къыкIоцI хэгъэгум иапшъэрэ еджэпIэ анахь дэгъухэм ясатыр хэуцуагъ!

МКъТУ-м икомандэу «ВСКС-м» тыфэгушIо IэпэIэсэныгъэшхо ыкIи шIэныгъэ куухэр къызэрагъэлъэгъуагъэхэм афэшI. Университетым шъо шъуегъэлъапIэ!