Хэгъэгу зэошхом ТекIоныгъэ къызщыдахыгъэр илъэс 80 зэрэхъугъэм фэгъэхьыгъэ форумэу «ЛIэужхэм яшIэжь — неущрэм икIэн» зыфиIорэм обществэу «ШIэныгъэм» зэхищагъ. Ащ къыдыхэлъытагъэу теле-лъэмыджэу рагъэкIокIыгъэм республикитIумэ яныбжьыкIэхэр ыкIи яэкспертхэр зэфищагъэх.

Форумым хэлэжьагъэмэ къыхагъэщыгъ тарихъым икъэухъумэн мэхьанэшхо зэриIэр, советскэ народым лIыхъужъыгъэу зэрихьагъэр, фронтовикхэм ыкIи тылым щыIэхэм яIахьышхоу къэралыгъом икъэухъумэн халъхьагъэр, джащ фэдэу хэушъхьафыкIыгъэ дзэ операцием хэлажьэхэрэр ащыгъупшэ зэрэмыхъущтыр къыраIотыкIыгъ.

Обществэу «ШIэныгъэм» икъутамэу Адыгеим щыIэм ипащэу Галина Измайловам ишIуфэс псалъэкIэ форумыр къызэIуахыгъ. Мыщ фэдэ зэIукIэмэ шIуагъэу къатырэр ащ къыкIигъэтхъыгъ: «ТиблэкIыгъэ, тикъэралыгъо гъэхъагъэу ышIыгъэхэм лъытэныгъэ афэтшIыжьыным мыщ фэдэ зэIукIэхэм тафащэ, тиныбжьыкIэхэм патриотизмагъэр ахалъхьэ, мамырныгъэу тятэжъ пIашъэмэ къытфахьыгъэм иухъумэн имэхьанэ зэхытагъашIэ».

Мыекъопэ къэралыгъо технологическэ университетым икъутамэу поселкэу Яблоновскэм дэтым истудентмэ къаIотагъ ятэжъ пIашъэмэ дзэ гъогоу къакIугъэр зыфэдагъэр, хэгъэгум итарихъ тхыгъэмэ ахэр зэращыщхэр.

ГущыIэм пае, Платон Архиповым къыIотагъ ятэжъ пIашъэу Архипов Иван Терентий ыкъом фэгъэхьыгъэу, Хэгъэгу зэошхом иорденэу ятIонэрэ шъуашэ ащ иI, Ушаковым имедаль, джащ фэдэу «Ленинград шъхьафит зэрашIыжьыгъэм фэшI» ыкIи «Германием зэрэтекIуагъэхэм фэшI» зыфиIорэ медальхэр къыратыгъагъэх.

Владимир Рудь ыкIи Нэхэе Азамат ятэжъхэу Советскэ Союзым и ЛIыхъужъ хъугъэхэм къатегущыIагъэх, хъишъэу апылъхэмкIэ форумым хэлажьэрэмэ къадэгощагъэх.

Элиста икIэлэеджакIомэ ушэтын IофшIэнэу ашIыгъэхэм ягугъу къашIыгъ. Къалмыкъ лъэпкъым итхьамыкIэгъо лъэхъан къытегущыIагъэх. Джащ фэдэу якъэлэ шъхьаIэ иурамхэм ацIэхэр зыхьырэ лIыхъужъмэ якъэбархэр ахэм зэрагъэшIагъэх.

— Сэ мы темэр сшIогъэшIэгъон, къалэм иурамхэм цIэу ахьыхэрэм, ахэр зыфаусыгъэмэ гъэхъагъэу ашIыгъэхэр зыфэдэхэр, къэбарэу апылъхэр, зэо гъогоу къакIугъэр, тихэгъэгу къагъэгъунэзэ лIыхъужъыгъэу зэрахьагъэр нэбгырэ пэпчъ ышIэн фаеу сэлъытэ, – къыIотагъ Баин Цеденовым.

Шъугу къэдгъэкIыжьын, Хэгъэгу зэошхом ТекIоныгъэ къызщыдахыгъэр илъэс 80 зэрэхъугъэм фэгъэхьыгъэ акцие обществэу «ШIэныгъэм» ытIупщыгъ, ащ Урысыем ишъолъыр 89-рэ хэлажьэ. Гъэсэныгъэ учреждениемэ Хэгъэгу зэошхом фэгъэхьыгъэ документальнэ фильмэхэр ыкIи тарихъ фильмэхэр къащагъэлъагъох, зэIухыгъэ зэдэгущыIэгъу шIыкIэмкIэ экспертхэр кIэлэеджакIомэ адэгущыIэщтых, советскэ народым лIыхъужъыгъэу зэрахьагъэр къизыIотыкIырэ тарихъ хъугъэ-шIагъэхэмкIэ адэгощэщтых.