Мыекъопэ къэралыгъо технологическэ университетым игуфакIо-медикхэр акциеу «Урысыем истоматологическэ псауныгъ» зыфиIорэм хэлэжьагъэх, А.И. Макаренкэм ыцIэ зыхьырэ гурыт еджапIэу №3-м десэ щарагъэхьыгъ.

Мыекъопэ къэралыгъо техническэ колледжым истудентхэри Iофтхьабзэм хэлэжьагъэх, зэхэтэу рагъэкIокIыгъ. лекциеу «Тутыныр машIохэм яушъхьагъу ыкIи жэ кIоцIыр ыкIи зэрэпкъышъолэу зыгъэузыхэрэм ащыщ» зыфиIорэм едэIугъэхэр я 7-рэ классым щеджэхэрэр ары.

Тутыныр зыгъэстырэмэ мэшIо щынэгъончъэныр икъоу къызэрэдамылъытэрэр, машIо хъурэмэ янахьыбэрэр ахэмэ къазэрэпкъырыкIырэр, тутыным игъэкIосэн Iофэу пылъхэр, нэмыкIыбэхэр студентмэ къаIотагъэх.

Мыекъопэ къэралыгъо технологическэ университетым игуфакIо-медикхэм тутыным пкъышъолым зэрарэу къыфихьырэр, жэ кIоцIыр пштэмэ узхэу кариесыр, гингивитыр ыкIи пародонтитыр къызэрэхэкIырэр, уIагъэхэр кIыжьыгъуае зэрэхъухэрэр, цэхэм атехъорэ шIойхэр, жэ кIоцIым мэ Iае къызэрэдэурэр къаIотагъэх.

— КIэлэ атахъохэр щыIэныгъэм хэхъухьэрэ къиныгъохэм зэрэфаехэу апекIошъухэрэп. Тутыныр агъэстмэ, ащкIэ япкъышъол агъэланлэу, гумэкIыгъор зытырахынэу бэмэ къащэхъу. МымакIэу ялэгъумэ зэрагъапшэ, запашIыжьы. Джащ пае пэшIорыгъэшъэу ащ зэрарэу къыхьырэр ябгъэшIэным мэхьанэшхо иI, анахьэу я 7-11-рэ классхэм ащеджэхэрэм,— къыIотагъ акцием икоординаторэу, АР-м иобщественнэ движениеу «гуфакIохэр-медикхэр» зыфиIорэм хэтэу Лилия Елистарховам.

Мы Iофтхьабзэр псауныгъэм икъэухъумэн екIурэ апэрэ лъэубэкъу. Шъугу къэтэгъэкIыжьы, тутынэу шъумыгъэкIосагъэм машIо къыхэкIын ылъэкIыщт, гъунэгъу унэмэ алъыIэсышъущт. МашIо хъумэ къэухъумэным и ЗыкI къулыкъу шъутеу — 01 (мобильнхэмкIэ — 101 е 112).