Мыекъуапэ Урысые гъэсэныгъэ фестивалэу «Сириус. Гъэмафэр: уипроект егъажь» зыфиIорэм изэфэхьысыжь Iофтхьабзэ щырагъэжьагъ, ар шъолъыр программэм икоординаторэу «Полярис-Адыгея» зыцIэм зэхищагъ.

Фестивалым шапхъэу иIэм амал къытыгъ Iофэу ашIагъэмкIэ зэфэхьысыжь ашIыныр ыкIи научнэ-технологическэ ушэтынхэу яIэхэр игъэкIотыгъэу къагъэлъэгъуагъэх.

Мыекъопэ къэралыгъо технологическэ университетыр Iофтхьабзэм нахь чанэу хэлэжьагъэхэм ащыщ, ежь ипроектнэ пшъэрылъхэу лъэныкъуабэ къызэдэзыубытыхэрэр къыхалъхьагъэх:

— агропромышленнэм ыкIи биотехнологием;

— пилот зэрымыс транспортыр ыкIи логистическэ системэр;

— генетикэр ыкIи биомедицинэр;

— когнитивнэ ушэтынхэр;

— материалыкIэхэр;

— акъылыгъэ зыхэлъ къалэр ыкIи щынэгъончъэныр;

— экологиер ыкIи климатыр.

МКъТУ-м ыцIэкIэ фестивалым проектнэ командэ 30 къыщатыгъ, ахэмэ ащыщэу 28-мэ тиуниверситет истудентхэр гъэсакIоу хэлэжьагъэх. Джыри команди 2-р зезыщагъэр студентхэу нэмыкI апшъэрэ еджапIэмэ ащеджэхэрэр ары — Къыблэ-Уральскэ къэралыгъо университетым (лъэпкъ ушэтэкIо университет) ыкIи Петрозаводскэ къэралыгъо университетым.

Фестивалым хэлэжьэнхэм ыпэкIэ, зы илъэсым къыкIоцI япроектхэм Iоф адашIагъ, экспертмэ, кIэлэегъаджэмэ ыкIи кIэлэеджакIомэ апашъхьэкIэ къаухъумагъэх. Проектхэр стендмэ къащагъэлъагъоуи хъугъэ, ащ инфографикэр ыкIи физическэ пэчIынатIэхэри щагъэфедэщтыгъэх.

Проектым шъолъырыбэ зэлъеубыты: ащ хэлэжьагъэх кIэлэеджакIохэу ыкIи студентхэу Адыгеим, Якутием, Иркутскэ, Новосибирскэ, Калининградскэ, Кемеровскэ, Костромской, Самарскэ ыкIи Удмуртскэ хэкухэм, Краснодарскэ ыкIи Челябинскэ крайхэм, джащ фэдэу Республикэу Къырым ыкIи Карелием ащыщхэр.

ГъэсэкIо IофшIэныр — гъэхъагъэм екIурэ гъогу. Мыекъопэ къэралыгъо технологическэ университетыр имагистранткэу Елена Тарарыкинар ыкIи аспирантэу Денис Шишкаловыр бэмэ щысэ афэхъугъэх: мыщ фэдэ проектмэ уахэлажьэ хъумэ, наукэм, инновациехэм ыкIи гъэсэныгъэм ягъогу зэIухыгъэ мэхъу. 

Хэхъоныгъэхэр ашIынхэмкIэ, шIэныгъэхэмкIэ зэхъожьынхэмкIэ фестивалыр платформэ шIагъоу щытыгъ. Хэлажьэрэмэ яIофшIагъэхэр къаухъумагъэхэ къодыеп, ахэмэ къагурыIуагъ янеущрэ сэнэхьат зырапхыщт лъэныкъор.