БлэкIыгъэ тхьэмафэм Республикэу Беларусь икъэлэ шъхьаIэу Минскэ Союзнэ къэралыгъохэм я IV-рэ Дунэе экологическэ гъэсэныгъэ форум щыкIуагъ. Ащ хэлэжьагъэх урысые апшъэрэ еджапIэ 11-рэ белорусскэу 3-рэ.

ШIуфэс псалъэкIэ форумым хэлажьэрэмэ закъыфагъэзагъ Белорусскэ къэралыгъо технологическэ университетым иректорэу Игорь Войтовым, Россотрудничествэм илIыкIо ипащэу Юрий Макушиным, Урысые Федерацием и Чрезвычайнэ ыкIи Полномочнэ ЛIыкIоу Республикэу Беларусь щыIэу Борис Грызловым, СНГ-м и Генеральнэ секретарэу Сергей Лебедевым, чIыопс къэкIуапIэхэмкIэ ыкIи тыкъэзыуцухьэрэ дунаим икъэухъумэнкIэ Республикэу Беларусь иминистрэ игуадзэу Иван Приходько.

Форумым ипрограммэ гъэшIэгъоныгъэ ыкIи баигъэ — экологическэ щынэгъончъэным, тыкъэзыуцухьэрэ дунаим икъэухъумэн, гъэсэныгъэм, культурэм, спортым ыкIи туризмэм афэгъэхьыгъэ упчIэмэ атегущыIагъэх.

Мыекъопэ къэралыгъо технологическэ университетыр форумым къыщагъэлъэгъуагъ экологическэ факультетым истудентмэ якомандэ (Вероника Шафранович, Анастасия Сотникова, Анастасия Бугаева), япэщагъэр факультетым идеканэу Галина Коноваловар ары.

Студентмэ научнэ докладхэр къашIыгъэх, экспертнэ сообщестэм ахэр лъэшэу шIогъэшIэгъоныгъэх. Вероника Шафранович идоклад  темэу иIагъэр: «Формирование экологической грамотности с помощью информационно-образовательных продуктов». Анастасия Сотниковам иIофшIагъэ ыцIагъэр: «Современное состояние туризма и методы оценки рекреационного воздействия на территории Кавказского биосферного заповедника». Форумым къыдыхэлъытагъэу щэрыонымкIэ электроннэ тирым зэнэкъокъухэр щыкIуагъэх. Вероникэ ятIонэрэ чIыпIэр къыдихыгъ, МКъТУ-р дэгъоу къыгъэлъэгъуагъ.

Форумыр апшъэрэ еджапIэхэм ащеджэхэрэр опытхэмкIэ зэхъожьынхэмкIэ площадкэ шIагъо хъугъэ. Хэлэжьагъэмэ амал яIагъ пэрытныгъэ зиIэ практикэхэу мэз хъызмэтым, биотехнологиехэм, биозэфэмыдэныгъэм нэIуасэ зэфашIынэу, Урысыемрэ Беларусымрэ агъэцакIэрэ лъэныкъохэу чIыопсым икъэухъумэн фытегъэпсыхьагъэхэм защагъэгъозэнэу.

Культурнэ программэм къыдыхэлъытагъэу МКъТУ-м илIыкIо Брестскэ пытапIэм итарихъ щагъэгъозагъ ыкIи Хэгъэгу зэошхом имузей чIэхьагъэх.