Зэнэкъокъоу «Стипендие Iушыр. Профессионалитетыр» зыфиIорэр зэхэзыщагъэр банкэу «Центр-Инвест», игъусагъэр капиталым и Фондэу «Гъэсэныгъэр ыкIи наукэр Къыблэ федеральнэ шъолъырым» зыфиIорэр ары.

Финалныкъом ихьагъэх зэнэкъокъум хэлэжьэрэ нэбгырэ 1395-рэ, ахэмэ бизнес-проектхэр лъэныкъуитфымкIэ къагъэлъэгъуагъэх: гъэсэныгъэр, наукэр ыкIи консалтингыр; медицинэр, экологиер, ЗОЖ-р; производствэр ыкIи къэлэ псэукIэр; финтех ыкIи IT-р; агропромышленнэ комплексыр ыкIи гастрономиер.

Мыекъопэ къэралыгъо технологичесэ университетым хэхьэрэ Политехническэ колледжым истудентхэр апэрэу ащ хэлэжьагъэх. Егъэджэн IофшIэнымкIэ проректорэу Людмила Задорожнэр яIэпыIэгъугъ ыкIи колледжым ипащэ игуадзэу СтIашъу Светланэ зэхэщэн Iофхэм афэгъэзэгъагъ. Зэнэкъокъум заявкэ 80 агъэхьыгъагъ. ЗэкIэ проектмэ экспертнэ уасэ къафашIыгъ: бизнесым, апшъэрэ еджапIэхэм, банкхэм илIыкIохэр жюрим хэхьагъэх.

Проекти 100-у анахь дэгъоу къыхагъэщыгъэхэмэ ахъщэ шIухьафтынхэр аратыгъэх. ТекIоныгъэ къыдэзыхыгъэмэ тистуденткэхэр ахэхьагъэх — ары пэпчъ зэтыгъо стипендиеу сомэ 30 000 аратыщт:

— Милена Удоденкэр (сэнэхьатыр «Дэхэныгъэм ииндустрие») — проектым ыцIэр: «Организация курсов и мастер-классов по макияжу для разных возрастных групп»;

— Маргарита Войновар (сэнэхьатыр «Фармациер») — проектым ыцIэр: «Приложение для вызова экстренных служб для глухонемых и людей с ОВЗ»;

— Дэгужъые Сабира (сэнэхьатыр «Лабораторнэ диагностикэр») — проектым ыцIэр: «Создание этнопродукта для туристов и жителей Республики Адыгея»;

— Ожъ Джэнэт (сэнэхьатыр «Лабораторнэ диагностикэр») — проектым ыцIэр: «Сервис по вывозу и переработке специфических отходов для малого и среднего бизнеса».

ТекIоныгъэ къыдэзыхыгъэмэ ыкIи ахэр зыгъэхьазырыгъэхэ кIэлэегъаджэхэу Политехническэ колледжым щылажьэхэрэм тафэгушIо! КIэлэегъаджэхэм яIахьышхо гъэсэныгъэм хэхъоныгъэ егъэшIыгъэным халъхьагъ.