Адыгэ Республикэм и ЛIышъхьэу КъумпIыл Мурат зыхэлэжьэгъэ игъэкIотыгъэ зэхэсыгъо АР-м и Къэралыгъо Совет-Хасэ ригъэкIокIыгъ. АР-м и Министрэхэм я Кабинет 2024-рэ илъэсым Iофэу ышIагъэм изэфэхьысыжьхэр ащ Адыгеим и ЛIышъхьэ къыщыфишIыгъэх.

Зэхэсыгъор парламентым итхьаматэу Владимир Нарожнэм зэрищагъ. Ащ хэлэжьагъэх республикэм икъэралыгъо органхэм, общественнэ ыкIи лъэпкъ-культурнэ организациехэм ялIыкIохэр, зэо зэфэшъхьафхэм ыкIи хэушъхьафыкIыгъэ дзэ операцием яветеранхэр.

Мыекъопэ къэралыгъо технологическэ университетым ыцIэкIэ зэхэсыгъом хэлэжьагъэх МКъТУ-м иректорэу Къуижъ Саидэ, проректорхэу Людмила Задорожнаяр, Татьяна Овсянниковар, Дмитрий Игнатовыр, БрантIэ Мурат, Пэрэныкъо Аслъан, ректоратым упчIэжьэгъоу щылажьэрэ Сергей Чефрановыр, бухгалтер шъхьаIэу Наныжъ Зарем, Медицинскэ институтым ипащэу НэмытIэкъо Хьазрэт, Дзэ егъэджэн гупчэм ипащэу Нурлан Самадьяновыр, МКъТУ-м и НИИСХ ипащэу Хьаткъо Казбек, Политехническэ колледжым ипащэ игуадзэхэу Флора Топольян ыкIи Галина Ковалевар.

Адыгэ Республикэм и ЛIышъхьэу КъумпIыл Мурат докладэу къышIыгъэм къыщыхигъэщыгъ ыкIи осэшхо къыфишIыгъ Мыекъопэ къэралыгъо технологическэ университетым иIахьэу кадрэ Iофхэм, научнэ ыкIи инновационнэ амалэу шъолъырым иIэхэм ахилъхьагъэм.

Анахьэу ынаIэ зытыридзагъэр медицинскэ кластерэу «ПрофиМед» зыцIэу, МКъТУ-м 2024-рэ илъэсым федеральнэ проектэу «Профессионалитетым» къыдыхэлъытагъэу къызэIуахыгъэр ары. Кластерыр непэрэ уахътэм диштэрэ гъэсэныгъэ ыкIи практикэ-ориентированнэ платформэ хъугъэ, IэпэIэсэныгъэшхо зыхэлъ медицинскэ кадрэхэу гурыт звеном фытегъэпсыхьагъэхэр щагъэхьазыры.

ЛIышъхьэм джащ фэдэу къыхигъэщыгъ Шъолъыр общественнэ организациеу «Врачмэ я Хасэ (совет)». 2022-рэ илъэсым МКъТУ-м ибазэ ар къыщызэIуахыгъ, медицинскэ сообществэр профессиональнэу зэхэгущыIэжьыным, научнэ Iофхэр лъыгъэкIотэгъэным ыкIи ныбжьыкIэ кадрэхэр гъэхьазырыгъэнхэм афытегъэпсыхьагъэу зэхащагъ.

МКъТУ-м хэхьэрэ Дзэ егъэджэн гупчэм иIофшIэн лIышъхьэм игугъу къышIыгъ. 2024-рэ илъэсым къыщыублагъэу Урысыем и УIэшыгъэ КIуачIэхэм кадрэхэр фэгъэхьазырыгъэнхэм ащ иIахьышхо хелъхьэ. ХэушъхьафыкIыгъэ дзэ операциер зыщыкIорэ уахътэм  гупчэм иIофшIэн нахь агъэфедэнэу мэхъу, хэгъэгумкIэ IэпыIэгъушIоу зэрэщытыр гъэнэфагъэ, имэхьанэ зыкъыIэтыгъ. 

КъумпIыл Муратэ къыIотагъ МКъТУ-м щагъэцакIэрэ проектэу «Мэкъу-мэщ классхэр» зыфиIорэм фэгъэхьыгъэу, ар кIэлэеджакIохэу къуаджэхэм ащыпсэухэрэм сэнэхьатыр къыхахыным фэшI агъэцакIэ. 2022-рэ илъэсым къырахьыжьэгъэ проектыр мэкъу-мэщ технологиехэм якафедрэ къызэIуихыгъагъ, ныбжьыкIэмэ адэIэпыIэ сэнэхьатыр къыхахынымкIэ. проектыр агъэцакIэфэ кIэлэеджакIо 28-рэ я 10-11-рэ классхэм арысхэу ащ хэлэжьагъэх, лъэныкъохэр «Агротехнологиер» ыкIи «Бжьэхъуныр». Мэкъу-мэщ сэнэхьатхэм зягъэушъомбгъугъэнымкIэ ишIогъэшхо къэкIо.

МКъТУ-м илIыкIохэр зэхэсыгъом зэрэхэлэжьагъэхэм къыгъэлъэгъуагъ университетыр чанэу зэрэхэлажьэрэр шъолъырым социальнэ-экономическэ пшъэрылъхэр ыгъэцэкIэнхэм, хэхъоныгъэхэр ышIынхэм. Апшъэрэ еджапIэр къэралыгъо структурэхэм ягъусэу IэпэIэсэныгъэ зыхэлъ кадрэхэр зэригъэхьазырхэрэр ащ къеушэты.