Мыекъопэ къэралыгъо технологическэ университетыр Урысыем иапшъэрэ еджэпIитф анахь дэгъоу федеральнэ проектэу «IофшIэным ыкIуачIэхэм яхэгъэхъон» зыфиIорэр зыщагъэцэкIэщтхэм ащыщ хъугъэ. Ар лъэпкъ проектэу «Эффект къэзытырэ ыкIи янэкъокъурэ экономикэр» зыфиIорэм къыдыхэлъытагъ.

Наукэмрэ апшъэрэ гъэсэныгъэмрэкIэ Урысые Федерацием и Министерствэ игукъэкIыкIэ ыкIи УФ-м экономикэмкIэ и Министерствэ яIэпыIэгъоу мы Iофтхьабзэу рагъэкIокIырэр зыфытегъэпсыхьагъэр университетхэм яамалхэр къэIэтыгъэныр ары, ащ пае практикэ анахь дэгъухэр рахьылIэщтых, процессхэр агъэкIэжьыщтых, ренэ къэс нахьышIу шIыгъэнымкIэ культурэ ахэлъэу агъэпсыщтых.

Мы тхьэмафэу блэкIыгъэм МКъТУ-м щыIагъэх наукэмрэ апшъэрэ гъэсэныгъэмрэкIэ Урысые Федерацием и Министерствэ илIыкIохэр — гъэсэныгъэ организациехэм Iоф адэшIэгъэнымкIэ Департаментым иотдел ипащэу Алёна Петренкэр ыкIи ФГАНУ «Социоцентр» зыфиIорэм и Отраслевой гупчэ ипащэу Руслан Долженкэр.

МКъТУ-р площадкэу къыхахыгъ апэрэ унашъохэр щагъэцэкIэнхэу, ащ ыуж фэшъхьаф апшъэрэ еджапIэмэ а практикэр ащагъэфедэгъэным пае. Ар щыIэ хъугъэ технологиехэм афэсакъыгъэнымкIэ опыт дэгъоу иIэм, методологическэ базэ лъэшэу егъэджэн гупчэу «Процессхэм яфабрикэ» къапкъырыкIыхэзэ ыкIи IофшIэнымкIэ къэгъэлъэгъонышIухэр къызэратыхэрэм афэшI.

Программэм пленарнэ зэхэсыгъохэр, лъэтегъэуцохэр, ыкIи экспертнэ сессиехэр къыдыхэлъытэгъагъэх. МКъТУ-м иректорэу Къуижъ Саидэ университетым сакъыныгъэ гъэIорышIэнэу щагъэцакIэрэм шIуагъэу къытыгъэхэр къыIотагъэх. ХьакIэхэр егъэджэпIэ гупчэу «Процессхэм яфабрикэ» ыкIи проектнэ офисэу «Сакъыныгъэ апшъэрэ еджапI — МКъТУ» зыфиIохэрэр зэрагъэлъэгъугъэх. IофшIэныр зэрэгъэпсыгъэр, проектэу агъэцэкIагъэхэр ащ нэрылъэгъу къащыфэхъугъэх. Джащ фэдэу экспертнэ сессиер рагъэкIокIыгъ, ащ хэлэжьагъэх проектнэ командэхэр, темэу яIагъэр: «IофшIэныр университетхэм зэрэщыгъэпсыгъэр: гумэкIыгъохэр ыкIи системнэ екIолIакIэхэр».

МКъТУ — УрысыемкIэ апэрэ апшъэрэ еджапIэу щыт сэкъыныгъэ шIыкIэр зыщагъэфедэу, а статусыр 2018-рэ илъэсым официальнэу иIэ хъугъэ, IэпыIэгъу къыфэхъугъэх ГК «Росатомыр» ыкIи Адыгэ Республикэм и ЛIышъхьэу КъумпIыл Муратэ. Университетыр пилотнэ проектэу «Бережливое правительство» зыфиIорэм (джырэкIэ — «Эффект къэзытырэ шъолъырым») хэлэжьэгъагъ. Университетым щэлажьэ федеральнэ инновационнэ площадкэу «LeanSkills.lab», ар 2021-рэ илъэсым къыщегъэжьагъэу агъэцакIэ, зыхэхьэрэ проектыр «Инновационные образовательные технологии развития бережливых компетенций современного инженера» зыфиIорэр ары.

МКъТУ-м иегъэджэн гупчэу «Процессхэм яфабрикэ» Урысыем ишъолъыр 25-мэ къарыкIыгъэ нэбгырэ мини 4-м ехъу щагъэхьазырыгъ, ахэр студентых, МКъТУ-м иIофышIэх, хабзэм, социальнэ сферэм ыкIи бизнесым ялIыкIох. «Ассоциация бережливых вузов» зыфиIорэ проектым университетыр чанэу хэлажьэ, ащ щагъэцакIэрэ проектэу «Бережливый вуз — МГТУ» зыфиIорэм IофшIэным епхыгъэ лъэныкъор зэкIэ къызэдеубыты, егъэджэныри, научнэ ыкIи административнэ IофшIэнхэри къыдыхэлъытагъэхэу.

Проектнэ офисым иIэхэр:

- Сакъыныгъэ шIыкIэм тетэу университетым игъэIорышIэн системэр;

- мульти-проектэу «Эффект къэзытырэ деканат», «Эффект къэзытырэ кафедрэр»;

- сакъыныгъэ проект 50-у агъэцэкIэгъахэр, IофшIэнхэр, документ зехьанхэр ахэм къагъэпсынкIэ, IофшIакIомэ рэзэныгъэу хагъуатэрэм хагъахъо;

- егъэджэн планхэм ахэхьэрэ дисциплинэхэу сакъыныгъэ производствэмкIэ агъэнэфэгъэ лъэныкъо 29-рэ, магистерскэ Iофэу «Сакъыныгъэ гъэIорышIэн».

Наукэмрэ апшъэрэ гъэсэныгъэмрэкIэ Урысые Федерацием и Министерствэ илIыкIомэ осэшхо къыфашIыгъ Мыекъопэ къэралыгъо технологическэ университетым опытэу ыкIи гъэхъагъэу иIэхэм, сакъыныгъэ технологиехэр производствэм щыгъэфедэгъэнхэмкIэ екIолIакIэу къыфагъотыгъэхэр апшъэрэ еджапIэхэмкIэ щысэтехыпIэ зэрэхъухэрэр къыхагъэщыгъ. Ащ къыкIэлъыкIорэ лъэубэкъоу хъущт тапэкIэ зэрэзэдэлэжьэщтхэмкIэ зэзэгъыныгъэу зыкIэтхэщтхэр, ащ къыдилъытэщт апшъэрэ еджапIэм Iоф зэрадашIэщтыр ыкIи федеральнэ проектэу «IофшIэным ыкIуачIэхэм яхэгъэхъон» зыфиIорэр зэрагъэцэкIэщтыр.