Мыекъопэ къэралыгъо технологическэ университетым Урысые научнэ-практическэ конференциеу «Фармациер непэ: хабзэмэ къащегъэжьагъэу инновациемэ анэсэу» зыфиIорэр щыкIуагъ. Фармацевтическэ отраслым испециалист пэрытхэр, гъэсэныгъэм ыкIи наукэм ялIыкIохэр, джащ фэдэу ныбжьыкIэ ушэтакIохэу хэгъэгум ичIыпIэ зэфэшъхьафхэм ащыщхэр ащ хэлэжьагъэх.

Фармацевтическэ факультетым идеканэу Артур Арутюновым шIуфэс псалъэ пэублэм къышIыгъ. Ащ къыкIигъэтхъыгъ конференциер площадкэ дэгъу зэрэхъурэр профессиональнэ зэдэгущыIэгъум зэрэфытегъэпсыхьагъэр ыкIи наукэмрэ бизнесымрэ ащылажьэхэрэр яопытхэмкIэ зэхъожьынхэмкIэ амалышIоу зэрэщытыр.

Конференцием хьакIэу къеблэгъагъэхэр: ООО «ВИТАУКТ-ПРОМ» зыфиIорэм производствэмкIэ ипащэу, фармацевтическэ шIэныгъэхэмкIэ кандидатэу Алексей Корочинскэр; Росздравнадзоым икъутамэу Адыгэ Республикэм щыIэм уцхэм якъегъэкIокIын ыкIи якъэухъумэн лъыплъэрэ отделым иэкспертэу, специалист шъхьаIэу, фармацевтическэ шIэныгъэхэмкIэ кандидатэу Борис Бочкаревыр; къалэу Краснодар «Псауныгъ» зыфиIорэ ГК-м аналитикэмкIэ иотдел ипащэу Владислав Слеповыр.

Iофтхьабзэм хэлажьэхэрэр фармацевтическэ IофшIэным епхыгъэ Iофыгъо шъхьаIэхэм атегущыIагъэх, ащ пылъ тарихъыр агу къагъэкIыжьыгъ, непэрэ лъэхъаным уцхэм ягъэзекIонкIэ екIолIакIэу щыIэхэр зэхафыгъэх. Джащ фэдэу фармацевтическэ гъэсэныгъэм хэхъоныгъэ егъэшIыгъэнымкIэ шIэгъэн фаехэм, чIыопсыр агъэфедэзэ уцэу ашIыхэрэм ыкIи нэмыкIыбэхэм атегущыIагъэх. Анахьэу анаIэ зытырадзагъэр инновациехэмрэ научнэ ушэтынэу ашIыгъэхэмрэ фармацием ипрактикэ зэрэхагъэхьащт шIыкIэр ары.

Конференциер зэхэпхъагъэу щытыгъ — очнэ шIыкIэм тетэуи пэIудзыгъэ шIыкIэмкIи ухэлэжьэшъущтыгъэ. Ащ ишIуагъэкIэ конференцием хэлажьэрэмэ ягеографие зиушъомбгъугъ, фармацевтическэ отрасым епхыгъэ нахь гумэкIыгъуабэ зэхафыгъ.