Мыекъопэ къэралыгъо технологическэ университетым я II-рэ ЗэIухыгъэ зэнэкъокъоу социальнэ проектхэу «Къулыкъу ахьызэ егъэджэгъэнхэр» зыфиIорэмкIэ щыкIуагъ, ащ апшъэрэ еджапIэхэр ары хэлажьэхэрэр. Iофтхьабзэр лъэныкъуитIумкIэ кIуагъэ: «Урысыем щыпсэурэ лъэпкъхэм якультурэрэ яшэн-хабзэхэмрэ якъэухъумэн» ыкIи «ГъэшIэ кIыхьэм укъыфэкIоныр».

Лъэныкъоу «Урысыем щыпсуэрэ лъэпкъхэм якультурэрэ яшэн-хабзэхэмрэ якъэухъумэн» зыфиIорэмкIэ экспертнэ комиссием иIэшъхьэтетыгъ къалэу Мыекъуапэ иадминистрацие культурэм и ГъэIорышIапIэу иIэм итхьаматэу Цэй Розэ. Жюрим хэхьагъэх: гъомлапхъэхэм ятехнологие ыкIи шхыныгъохэм язэхэщэнкIэ кафедрэм ипащэу, техническэ шIэныгъэхэмкIэ докторэу, МКъТУ-м идоцентэу Хьаткъо Зурет; стандартизацием, метрологием ыкIи товарнэ экспертизэм якафедрэ икIэлэегъэджэ шъхьаIэу, МКъТУ-м искусствоведениемкIэ икандидатэу КIэдэкIое Нафсэт.

ГъэIорышIэнымкIэ Дальневосточнэ институтым истудентхэр Iофтхьабзэм хэлажьэх. (РАНХиГС-м икъутам, къ.Хабаровск).

Зэнэкъокъум зэфэхьысыжьэу фэхъугъэхэмкIэ мыщ фэдэ чIыпIэхэр къыдахыгъэх:

а 1-рэ чIыпIэр — Иныхъу Изабелла «Адыгэ мэкъамэмэ яIункIыбз» (гъэсакIор — Ламэ Бэл); Анна Горковенко «Джэныкъу» (гъэсакIор — КIэдэкIое Нафсэт)

я 2-рэ чIыпIэр — Лъэцэр Амина, Денис Колтунов, София Резникова, Кристина Функ «Профессиональнэ тхылъ мэкIаер» (гъэсакIор — Оксана Борсук); Мерэм Мурат «Лъапсэу уиIэм ыкIуачIэ» (гъэсакIор — Ирина Селиванова)

я 3-рэ чIыпIэр — Дарья Смышляева, Дарья Малышева «Тызэфэдэхэп, ау тызэкIыгъух: нэмыкIхэр лъытэх, о зылъытэжь!» (ДВИУ РАНХиГС, къ. Хабаровск); Къэрдэнэ Дана, Делэкъо Марина, Индрысэ Замира «Адыгабзэм изэгъэшIэнкIэ приложениеу «Circas.lang» (гъэсакIор — Татьяна Паладова)

Лъэныкъоу «ГъэшIэ кIыхьэм укъыфэкIоныр» зыфиIорэм ижюри ипэщагъ «Урысыем ипенсионерхэм я Союз» и Адыгэ шъолъыр къутамэ итхьаматэу Валентина Дагамук. Комиссием хэхьагъэх: АНО «Физическэ культурэм ыкIи спортым хэхъоныгъэ егъэшIыгъэнымкIэ Гупчэм» итхьаматэу Галина Каташевскаяр; Адыгэ республикэ клиническэ сымэджэщым сестринскэ персоналым Iоф дэшIэгъэнымкIэ врач шъхьаIэм игуадзэу Светлана Строкань.

Зэфэхьысыжьхэм къагъэлъэгъуагъэхэр:

а 1-рэ чIыпIэр — Ольга Астаховар «Узэгъусэмэ нахь фаб!» (гъэсакIор — Ирина Селиванова); Мэрэтыкъо Бэлла, Виктория Чернобай «ГъэшIэ кIыхьэм фэзыщэрэ еджапI» (гъэсакIохэр — Беслъангъур Зарем, Нэгъой Джэнэт)

я 2-рэ чIыпIэр — Дечэ Ариана, Дыхъу Диана, Ахэджэго Мэджыд, Нэгъэрэкъо Залина «Къушъхьэм шъобжьхэр хэмыхыным фэшI (гъэсакIор — Нурета Шевкуева); Денис Колтунов, Роман Муллер, «ЯтIонэрэ гъатхэр» (гъэсакIор — Вера Киселева)

я 3-рэ чIыпIэр — Пщыпый Дариет  «Сымаджэу щылъмэ уалъыплъэныр» (гъэсакIор — Нурета Шевкуева); Делэкъо Марина, Къэрдэнэ Дана, Индрысэ Замир «ЛIэужхэм язэдэгущыIэгъу» (гъэсакIор — Татьяна Паладова)

Проектхэу мы лъэныкъомкIэ къагъэлъэгъуагъэхэр зыфытегъэпсыхьагъэхэр социальнэ Iофыгъохэм язэшIохын ары: нахьыжъмэ ящыIэкIэ-псэукIэ къэIэтыгъэныр, зэдеIэжьыныгъэм къыфэщэгъэнхэр, ныбжьыкIэхэм япшъэдэкIыжь зэхягъэшIэгъэныр.

Университетым ипрезидентэу ТхьакIущынэ Аслъан ишIоигъоныгъэкIэ зэнэкъокъум хэлэжьагъэхэмэ музеир зэрагъэлъэгъугъ. Музеим зэфэхьысыжьхэр щашIыгъэх ыкIи лъэныкъоу «ГъэшIэ кIыхьэм укъыфэкIоныр» зыфиIорэм щытекIуагъэхэр къыщаIопщыгъэх.