Мыекъопэ къэралыгъо технологическэ университетым очнэ шIыкIэм тетэу я II-рэ ЗэIухыгъэ зэнэкъокъу социальнэ проектхэу «Къулыкъу ахьызэ егъэджэгъэнхэр» зыфиIорэмкIэ щэкIо, ащ апшъэрэ еджапIэхэр ары хэлажьэхэрэр.

Зэнэкъокъум иапэрэ мафэ проектхэр къаухъумагъэх лъэныкъоу «Тарихъ кIэныр» зыфиIорэмкIэ. Экспертнэ жюрим пащэу фэхъугъэр къалэу Мыекъуапэ иадминистрацие культурэм и ГъэIорышIапIэу иIэм итхьаматэу Цэй Роз ары. Комиссием хэхьагъэх: МКъТУ-м тарихъым ыкIи фитныгъэмкIэ икафедрэ ипащэу, тарихъ шIэныгъэхэмкIэ докторэу, профессорэу Кудаикъо Светлан; философием, социологием ыкIи педагогикэм якафедрэ ипрофессорэу, культурологиемкIэ докторэу Сихъу Аминэт.

Зэнэкъокъум хэлажьэрэмэ инновационнэ социальнэ проектхэр къагъэлъэгъуагъэх, ахэр фытегъэпсыхьагъэх социальнэ пшъэдэкIыжьым хэгъэхъогъэным ыкIи ныбжьыкIэхэр ащ хэгъэлэжьэгъэнхэм. Анахьэу анаIэ зытырадзагъэр общественнэ гумэкIыгъохэр ары, ахэр шъолъыр общественностым зэрепхыгъэхэм.

Лъэныкъоу «Тарихъ кIэныр» зыфиIорэмкIэ мыщ фэдэ проектхэр къырахьылIагъэх:

— Евгений Шварцым идневниккIэ Мыекъуапэ революцием ыпэкIэ зэрэщытыгъэр видеоэкскурсие шIыгъэу (урысыбзэкIэ ыкIи арапыбзэкIэ къеIуатэ);

— Тхыпхъэ хабзэхэр — лъэпкъ декоративнэ-прикладной искусствэр ушэтыгъэныр;

— «Гъэсэныгъэ революциер»: къулыкъу ахьызэ егъэджэгъэнхэм иметодик — инновационнэ екIолIакIэу гъэсэныгъэ процессым фашIырэр;

— Этно-видеоджэгукIэу «Нарт эпосыр: Кавказ икIэн» — непэрэ уахътэм диштэу кавказскэ фольклорым нэIуасэ зыфэшIыгъэныр;

— Telegram-ботэу «Финансхэр лIэшIэгъухэм апхырыщыгъэу» — ахъщэ къегъэкIокIыгъэным итарихъ гъэсэныгъэ проектымкIэ;

— «ШIэжьым игъогу» — тарихъ-патриотическэ проект;

— «Хэгъэгу зэошхор тарихъым ыкIи народым ишIэжь къызэрэхэнагъэр» – зэо илъэсхэр ушэтыгъэнхэр.

ТекIоныгъэ къыдэзыхыгъэхэр:

а 1-рэ чIыпIэр — Лъэустэнджэл Дариет «Тхыпхъэ хабзэхэр» (гъэсакIор — КIэдэкIое Нафсэт ыкIи Ольга Шакула «Хэгъэгу зэошхор тарихъым ыкIи народым ишIэжь къызэрэхэнагъэр» (гъэсакIор — Кудаикъо Светлан).

я 2-рэ чIыпIэр — Артем Верескуновыр «ШIэжьым игъогу» (гъэсакIор — КIыржьын Светлан)

я 3-рэ чIыпIэр — «Этно-видеоджэгукIэу «Нарт эпосыр: Кавказ икIэн» — Дана Киятовар (гъэсакIор — Iэшъынэ Марин).

Проектэу къагъэлъэгъуагъэмэ социальнэ мэхьанэшхо зэряIэр комиссием хэтхэм къыхагъэщыгъ ыкIи къыкIагъэтхъыгъ ахэмкIэ общественнэ Iофыгъуабэ зэрэзэшIопхышъущтыр, гражданскэ пшъэдэкIыжьыр зэхашIэу ныбжьыкIэхэр пIунхэ зэрэплъэкIыщтхэр. Зэнэкъокъум хэлажьэхэрэр социальнэ куп зэфэшъхьафмэ адэлажьэх ыкIи тыкъэзыуцухьэрэ дунаир нахьышIу шIыгъэным яIахьышхо халъхьэ.