Мыекъопэ къэралыгъо технологическэ университетым Дунэе научнэ-практическэ я VIII-рэ конференцие IофшIэныр щыригъэжьагъ, ащ ыцIэр: «Непэрэ информационнэ технологиехэр агъэфедэхэзэ геологием, геофизикэм ыкIи геоэкологием фундаментальнэ ыкIи прикладной лъапсэу иIэхэр».

Мы Iофтхьабзэр рагъэкIокIыныр хабзэ хъугъэ, 2009-рэ илъэсым къыщыублагъэу университетым зэхещэ, мызыгъэгуми ащ специалистхэу геофизикэм ыкIи геоэкологием алъэныкъохэм ащылажьэхэрэр къыугъоигъэх. Конференциер джыри зы лъэубэкъу хъугъэ чIыопсыр зэрагъэфедэрэм инепэрэ гумэкIыгъохэмкIэ. Апэрэ Iофтхьабзэхэр зигукъэкIыгъэхэр МКъТУМ-м иинженернэ-экономическэ факультет ары, ар Дунэе научнэ-практическэ семинарэу «Экологическэ гумэкIыгъоу тилъэхъанэ щыIэхэр» зыфиIорэм икIэщэкIуагъ. А темэу нэбгырэ пэпчъ лъыIэсырэм тиобществэ осэшхо къыфишIыгъагъ. Конференцием хэлажьэхэрэмэ ягеографие ины —  Москва къыщегъэжьагъэу  Таганрог ыкIи  Вьетнам, Китай, Кубэм, Мексикэм, Казахстан, Германием,  Беларусым анэсы — зытегущыIэхэрэм мэхьанэшхо зэряIэр ащ къеушыхьаты.

2025-рэ илъэсым конференцием икIэщакIохэр: Мыекъопэ къэралыгъо технологическэ университетыр, Адыгэ къэралыгъо университетыр, Абхъазым   экологиемкIэ и Институт наукэмкIэ и Академие. КъадэIэпыIэх:

РАН-м атмосферэм ифизикэ и Институтэу А.М. Обуховым ыцIэ зыхьырэр, РАН-м и Геофизическэ гупчэу М.В. Ломоносовым ыцIэ зыхьырэр, консорциумэу «Устойчивое развитие» зыфиIоу Московскэ университетэу С.Ю. Витте ыцIэ зыхьырэр, Адыгэ Республикэм иведомствэхэр — тыкъэзыуцухьэрэ дунаир къэухъумэгъэнымкIэ ыкIи чIыопсым икъэкIуапIэхэмкIэ ГъэIорышIапIэр, Къыблэ федеральнэ шъолъырымкIэ чIыопсыр гъэфедэгъэнымкIэ геологием ыкIи лицензированием и Департамент. Зэхэщэн Iофхэм ахэлажьэ Урысые географическэ обществэм и Адыгэ шъолъыр къутамэ.

Конференциер секцииплIэу зэтефыгъ:

1. Геоэкологиер, тыкъэзыуцухьэрэ дунаим икъэухъумэн ыкIи биозэфэмыдэныгъэр

2. Инженернэ-экологическэ гумэкIхэу геологием ыкIи геофизикэм хэлъхэр

3. Климатыр зэрэзэхъокIырэр ыкIи ащ къыкIэлъыкIорэ Iофхэр

4. Атмосферэр зэрэзэхэтыр ыкIи зызэрэзэблихъурэр

Конференцием ипрограммэ научнэ доклад 92-рэ хэхьагъ. Урысыем ишъолъыр 14-мэ, джащ фэдэу Абхъазым ыкIи Вьетнам къарыкIыгъэхэр хэлажьэх.

Торжественнэ зэхахьэм ректорэу Къуижъ Саидэ шIуфэс псалъэ къыщишIыгъ. Ащ къыхигъэщыгъ конференцием темэу къыхихыгъэхэмэ мэхьанэшхо зэряIэр. Джащ фэдэу ащ агу къыгъэкIыжьыгъ Беданэкъо Мурат зипэщэ шIэныгъэлэжь купмэ научнэ IофшIагъэу къагъэхьазырыгъэр, ар Адыгэ Республикэм иэкологие изытет фэгъэхьыгъэу щытыгъ, 2020-рэ илъэсым Германием  щыIэ тхылъеджапIэу Springer къыщыдагъэкIыгъагъ, 2021-рэ илъэсым Адыгэ Республикэм икъэралыгъо премие къыфагъэшъошагъ.

ШIуфэс псалъэкIэ конференцием хэлажьэрэмэ джащ фэдэу закъыфагъэзагъ Адыгэ къэралыгъо университетым иректорэу Мамый Даутэ, Абхъазым шIэныгъэмкIэ и Академие ивице-президентэу Январби Экба, РАН-м и Геофизическэ гупчэу М.В. Ломоносовым ыцIэ зыхьырэм илабораторие инаучнэ IофышIэу Софья Киселёвар, ООО «Лэгъо-Накъэ» игенеральнэ пащэу Къэлэшъэо Инвер, конференциер зигукъэкIэу, профессорэу Беданэкъо Мурат.

Торжественнэ Iахьым ыуж пленарнэ зэхэсыгъор рагъэкIокIыгъ, ащ урысые шIэныгъэлэжьмэ ядокладхэр къыщашIыгъэх:

— Ирина Репинам, РАН-м атмосферэм ифизикэ и Институтэу А.М. Обуховым ыцIэ зыхьырэм ипащэ игуадз, РАН-м ипрофессор, физикэ-хьисап шIэныгъэхэмкIэ доктор, МКъТУ-м иIофышIэ пэрыт — «Естественные и искусственные водные объекты в условиях современных климатических изменений: воздействие и адаптация»;

— Сергей Лебедевыр, РАН-м и Геофизическэ гупчэ инаучнэ IофышIэ шъхьаI, физикэ-хьисап шIэныгъэхэмкIэ доктор, МКъТУ-м иIофышIэ пэрыт — «Спутниковая океанология. Современное состояние и перспективы развития»;

— Константин Кисловыр, РАН-м и Институтэу чIыгусысыныр пэшIорыгъэшъэу къэшIэгъэнымрэ хьисап геофизикэмрэ афэгъэзэгъэ  научнэ IофышIэ шъхьаI, физикэ-хьисап шIэныгъэхэмкIэ кандидат — «Исследование характеристик ледового покрова с помощью распределённого акустического зондирования (DAS)».

Ащ ыуж секциитIумэ IофшIэныр рагъэжьагъ — «Геоэкологиер, тыкъэзыуцухьэрэ дунаим икъэухъумэн ыкIи биозэфэмыдэныгъэр» зыфиIорэр зэрищагъ техническэ шIэныгъэхэмкIэ кандидатэу, доцентэу Мэрэтыкъо Муратэ ыкIи «Климатыр зэрэзэхъокIырэр ыкIи ащ къыкIэлъыкIорэ Iофхэр» зыфиIорэр зэрищагъ географическэ шIэныгъэхэмкIэ кандидатэу Екатерина Горбаренкэм.

Конференцием иIофшIэн неущ падзэжьыщт. Хэлажьэрэмэ секциитIум Iофыгъуабэхэр къащаIэтыщтых: «Инженернэ-экологическэ гумэкIхэу геологием ыкIи геофизикэм хэлъхэр» зыфиIорэм ыкIи «Атмосферэр зэрэзэхэтыр ыкIи зызэрэзэблихъурэр» зыфиIорэм.

ЗэкIэ хэлажьэрэмэ япшъэрылъхэр агъэцэкIэнхэу, научнэ IофыгъуакIэхэр къызэIуахынхэу тафэлъаIо!