Непэ Мыекъопэ къэралыгъо технологическэ университетым ыкIи Политехническэ колледжым якIэлэегъаджэхэмрэ ястудентхэмрэ республикэ Iофтхьабзэхэу ТекIоныгъэшхор къызщыдахыгъэр илъэс 80 зэрэхъурэм фэгъэхьыгъэхэм ахэлэжьагъэх.

«ЕгъэшIэрэ МашIом» имемориалэу Хэгъэгу зэошхом хэкIодагъэхэм афэгъэхьыгъэм къэгъагъэхэр пчэдыжьым кIэралъхьагъэх. Ащ хэлэжьагъэх Адыгэ Республикэм и ЛIышъхьэу КъумпIыл Мурат, ветеранхэр, ухъумэкIо органхэр, гуфакIохэр, студентхэр ыкIи Мыекъуапэ щыпсэухэрэр. Бэмэ ятэжъхэм ясурэтхэр зэрыт портретхэр аIыгъыгъэх.

Торжественнэ зэхахьэр Лениным ыцIэ зыхьырэ пчэгум щылъагъэкIотагъ. ТекIоныгъэм ибыракъ, джащ фэдэу Урысые Федерацием ыкIи Къэралыгъо Совет-Хасэм ябыракъхэр къычIахыгъэх. Ащ еплъыгъэхэм ахэтыгъэх МКъТУ-м истудентхэр.

МКъТУ-м и Дзэ егъэджэн гупчэ икурсантхэр зыхэлэжьэгъэхэ торжественнэ маршым мэфэкIыр къыгъэдэхагъ. Ащ къыкIэлъыкIоу МКъТУ-м иректорэу Къуижъ Саидэ курсантмэ афэгушIуагъ, чанэу мэфэкI Iофтхьабзэмэ зэрэхэлажьэхэрэм пае зэрафэразэр ариIуагъ.
 МэфэкI программэм къыдыхэлъытагъэу МКъТУ-м и Дзэ егъэджэн гупчэ иIофышIэхэмрэ икурсантхэмрэ дзэ техникэм аужырэ уахътэм хэхъоныгъэу ышIыгъэхэр къагъэлъэгъуагъэх. Анахьэу анаIэ зытырагъэдзагъэр пилот зэрымыс быбырэ аппаратхэр ары. Ар зыфэдэр, зэратIупщырэр, хэгъэгум иухъумэнкIэ мэхьанэу иIэр цIыфхэм къафаIотагъ. Экспозициер лъэш дэдэу ныбжьыкIэхэм агу рихьыгъ.
 Мэфэ реным мэфэкI Iофтхьабзэхэм ахэтыгъэх, яIахьышхо халъхьагъ МКъТУ-м игуфакIохэм. Акциеу
 «Георгиевскэ лентэм» хэлэжьагъэх, ТекIоныгъэм итамыгъэхэр агощыгъэх. Ар абгъэгухэм ахалъхьанхэмкIэ, сурэт зытырахынхэмкIэ цIыфхэм адэIэпыIэщтыгъэх, шIэжьыр пстэуми адагъэлъэпIагъ.

ШIэжьыр. Пэгэныгъэр. ЗыкIыныгъэр. А гущыIэхэр мы мафэмкIэ шъхьаIэ хъугъэх — ТекIоныгъэм и Мафэ Адыгеим щыхэзыгъэунэфыкIыгъэ пэпчъкIэ.