Мыекъопэ къэралыгъо технологическэ университетыр зычIэт унэм научнэ-практическэ конференциеу «ЛIэуж псаур» зыфиIорэр щыкIуагъ.

Мы Iофтхьабзэм лъегъэкIуатэ медицинэм ылъэныкъокIэ зэпхыныгъэхэр гъэпсыгъэнхэмкIэ IофшIэныр. Конференциер зэхэзыщагъэхэр: псауныгъэр къэухъумэгъэнымкIэ Адыгэ Республикэм и Министерствэрэ шъолъыр общественнэ организациеу «Врачмэ я Хасэрэ».

ШIуфэс псалъэкIэ къэзэрэугъоигъэхэм закъыфагъэзагъ медицинэ шIэныгъэхэмкIэ докторэу, кIэлэцIыкIу хирургиемрэ травмотологиемрэ я Научнэ ушэтэкIо институтым нейрохирургиемкIэ ыкIи нейротравмэмкIэ иотделение ипащэу Жанна Семеновам, МКъТУ-м илечебнэ факультет идеканэу Беслъангъур Заремэ.

Научнэ программэм къыдыхэлъытагъэу специалист пэрытхэу Москва, Санкт-Петербург, Ставрополь, Краснодар, Омскэ ыкIи Мыекъуапэ ащыщыхэм докладхэр къашIыгъэх. Анахьэу анаIэ зытырадзагъэр непэрэ екIолIакIэу диагностикэм ыкIи Iэзэным фашIыхэрэр, медицинэм искусственнэ интеллектым чIыпIэу щиубытырэр ары. КъэгущыIагъэхэр:

— профессорэу Оксана Поздняковам (медицинэ шIэныгъэхэмкIэ доктор, псауныгъэр къэухъумэгъэнымкIэ УФ-м и Ставропольскэ къэралыгъо медицинскэ университетым иклиническэ фармакологие ипрофессор, Темыр-Кавказскэ Федеральнэ шъолъырым врачебнэ практикэмкIэ испециалист шъхьаI, Ставрополь краим ипульмонолог шъхьаI) коморбиднэ сымаджэхэм узэряIэзэнэу щыIэ шIыкIэхэр къыIотагъэх. Анахьэу ынаIэ зытыридзагъэр ошIэ-дэмышIэ Iофэу къафыкъокIыхэрэр ары, ащ фэдэхэр къызыхэкIыхэрэр ежь-ежьырэу загъэхъужьынэу зыфежьэхэкIэ е медикаментознэ терапие мыщынэгъончъэхэр агъэфедэхэ зыхъукIэ;

— профессорэу Наталья Ивановар (медицинэ шIэныгъэхэмкIэ доктор профессор, профессорэу А.Л. Поленовым ыцIэ зыхьырэ РНХИ-м инаучнэ отдел ипащ, Алмазовым игъэсэныгъэ Гупчэ и Институт неврологием ыкIи психиатрием якафедрэ ипрофессор, функциональнэ ыкIи ультразвуковой диагностикэм иврач, УФ-м изаслуженнэ врач) лекцие  темэу «Опухоль-ассоциированная эпилепсия и эпилепсия при нейрохирургической сосудистой патологии» зыфиIорэм къеджагъ;

— профессорэу Сергей Павленкэм (медицинэ шIэныгъэхэмкIэ доктор, профессор, Пшызэ медицинскэ институтым хирургиемкIэ икафедрэ ипащ, Мыекъопэ къэралыгъо технологическэ университетым ифакультетскэ хирургие икафедрэ ипащ) игущыIэхэм къащыкIигъэтхъыгъ узыр нахь псынкIэу гъэнэфэгъэным мэхьанэшхо зэриIэр, профилактическэ медицинэм исистемэкIэ зэрэIофыр;

— врач-психиатрэу Юлия Сидневам (медицинэ шIэныгъэхэмкIэ кандидат, апшъэрэ квалификационнэ категорие зиIэ врач психиатр-нейропсихиатр, медицинскэ реабилитациемкIэ Научнэ-ушэтэкIо институтым иотдел ипащ) кIэлэцIыкIумэ шъобжхэр атещагъэхэ хъумэ агу ихъыкIырэр, яэмоциональнэ зытет, психоэмоциональнэ лъэужэу ащ фэдэхэм къакIэлъыкIорэр, ахэм уазэрэдэIэпыIэщт шIыкIэхэр къыIотагъэх.

— профессорэу Жанна Семеновам докладэу къышIыгъэр шъхьэкуцI фыкъуагъэм мультидисциплинарнэ гумэкIыгъоу къыхэкIырэр къыIэтыгъ.

Джащ фэдэу атегущыIагъэх хирургием, гастроэнтерологием ыкIи стоматологием. Докладхэр къэзышIыгъэхэм ащыщыгъэх медицинэ шIэныгъэхэмкIэ докторэу, профессорэу Елена Лялюковар, ар холецистэктомием эффектэу къытырэм къытегущыIагъ, медицинэ шIэныгъэхэмкIэ докторэу, МКъТУ-м физиологиемкIэ ыкIи патологиемкIэ икафедрэ ипащэу Виктория Мясниковар — ИИ-р  диагностикэм зэрэщагъэфедэрэм къытегущыIагъ.

Конференцием икIэухым докладхэр къашIыгъэх МКъТУ-м иаспирантхэу Нэгъой Джантэмыр —  стоматологическэ Iофхэу ГЭРБ-м хэтхэр; Тимур Макаровыр — холецистэктомием эффектэу къытырэр; Хьалэщтэ Айдэмыркъан — шIум шэр зытехъокIэ зэрэбгъэхъужьыщтыр.

Медицинэм ылъэныкъокIэ зэпхыныгъэхэр гъэпсыгъэнхэм, специалист пэрытхэм научнэ ушэтынэу ашIыгъэхэм ашъхьэ къырахыным, тауж къэкIырэ лIэужмэ япсауныгъэ нахьышIу хъуным конференциер фэлэжьагъ.