Непэ Мыекъопэ къэралыгъо технологическэ университетым Iофтхьабзэ инэу «Врач ныбжьыкIэмэ яеджапI—2025-рэ. Сэнэхьатым хэщэгъэнхэр» зыфиIорэр щызэфашIыжьыгъ, ащ МКъТУ-м и Медицинскэ институт истудент 80 хэлэжьагъ.

Проектыр федеральнэ программэу «Наставничество» зыфиIорэм къыдыхэлъытагъэу зэхащэ, ар медицинэ апшъэрэ еджапIэмэ ястудентмэ афэгъэхьыгъ, зещакIоу иIэр Урысые Федерацием исенаторэу Хьопсэрыкъо Мурат. ЗэхэщакIоу фэхъугъэхэр Мыекъопэ къэралыгъо технологическэ университетымрэ шъолъыр общественнэ  организациеу «Врачмэ я Хасэрэ». Iофтхьабзэм анаIэ къытырагъэты, ахэмэ яшIэ хэлъэу зэхащэ организациеу «Врачмэ я Хасэ» итхьаматэу, кIэлэцIыкIу хирургиемрэ травмотологиемрэ я Научнэ ушэтэкIо институтым нейрохирургиемкIэ ыкIи нейротравмэмкIэ иотделение ипащэу Жанна Семеновам ыкIи научнэ IофышIэу, кIэлэцIыкIу хирургиемрэ травмотологиемрэ я Научнэ ушэтэкIо институтым иврач психиатр-нейропсихиатрэу Юлия Сидневам.

Программэу «Врач ныбжьыкIэмэ яеджапI—2025-рэ. Сэнэхьатым хэщэгъэнхэр» зыфиIорэм къыдыхэлъытагъэу специалистхэр лекциемэ къяджагъэх, научнэ темэ зэфэшъхьафхэмкIэ. Ахэмэ ащыщыгъэх: «Сэ сэнэхьатыр къызэрэхэсхыгъэр», «Генеалогиер. Сэнэхьатым хэщэгъэнхэр», «Медицинскэ наукэм хэщэгъэнхэр», «Нейропсихиатрием хэщэгъэнхэр», «Офтальмологиер. Сэнэхьатым екIурэ сигъогур», «Лучевой диагностикэр. КъекIурэр ыкIи къемыкIурэр» ыкIи нэмыкIхэр.

Проектым осэшхо къезытырэр специалистхэмрэ студентхэмрэ зэрэзэдэлажьэхэрэр ары, экспертхэу опытышхо зыIэкIэлъхэр ныбжьыкIэхэм яIэпэIэсэныгъэкIэ къадэгуащэх, хэгъэгум имедицинскэ сообществэ ащ фэдэ амалышIухэр къареты, сэнэхьатым нахь куоу хэхьашъух.

Шъугу къэдгъэкIыжьын, «Врач ныбжьыкIэмэ яеджапIэ» МКъТУ-м ренэ къэс щырагъэкIокIы, ащ къегъэлъагъо университетым зэкIэлъыкIокIэ шIыкIэр щагъэфедэзэ неущрэ врачхэр ыкIи медицинскэ кадрэхэр зэрэщагъэхьазырхэрэр.