Мыекъопэ къэралыгъо технологическэ университетымрэ кIэлэцIыкIу хирургиемрэ травмотологиемрэ я Научнэ ушэтэкIо институтэу — докторэу Рошалым и Клиникэрэ (къалэу Москва) зэрэзэдэлэжьэщтхэмкIэ стратегическэ зэзэгъыныгъэм зэдыкIэтхагъэх.

Зэзэгъыныгъэм ипшъэрылъыр — медицинэ гъэсэныгъэмкIэ, научнэ IофшIэнымкIэ ыкIи IэпэIэсэныгъэшхо зыхэлъ специалистхэм ягъэхьазырынкIэ яамалхэр бгъуитIумэ зэхалъхьанхэр ары.

Зэзэгъыныгъэм икIэтхэн ыкIи пшъэрылъхэм ятегущыIэнкIэ зэхащэгъэ зэхахьэм хэлэжьагъэхэр: МКъТУ-м иректорэу Къуижъ Саид, кIэлэцIыкIу хирургиемрэ травмотологиемрэ я Научнэ ушэтэкIо институтым нейрохирургиемкIэ ыкIи нейротравмэмкIэ иотделение ипащэу Жанна Семеновар, научнэ IофышIэу, кIэлэцIыкIу хирургиемрэ травмотологиемрэ я Научнэ ушэтэкIо институтым иврач психиатр-нейропсихиатрэу Юлия Сидневар, егъэджэн IофшIэнымкIэ МКъТУ-м ипроректорэу Людмила Задорожнаяр, научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар, МКъТУ-м и Медицинскэ институт ипащэу НэмытIэкъо Хьазрэт, лечебнэ факультетым идеканэу Беслъангъурэ Зарем, фармацевтическэ факультетым идеканэу Артур Арутюновыр, апшъэрэ гъэсэныгъэ ужым ипрофессиональнэ гъэсэныгъэ идеканэу Инна Бочкарёвар.

Зэзэгъыныгъэм лъэныкъо зэфэшъхьафыбэ къыделъытэ:

— Студентмэ яIэпэIэсэныгъэ хэгъэхъогъэныр, ординаторхэм ыкIи ныбжьыкIэ специалистхэм, практикэ шIыкIэр къызфагъэфедэныр.

— Зэхэт организациехэр ыкIи научнэ ушэтынхэр регъэкIокIыгъэнхэр, научнэ-практическэ Iофтхьабзэхэр зэхэщэгъэнхэр, диагностикэмкIэ пэрыт методикэхэр гъэфедэгъэнхэр, Iэзэныр ыкIи реабилитациер.

— Медицинэ наукэм ылъэныкъокIэ ушэтын Iофтхьабзэхэр регъэкIокIыгъэнхэр.

— АпшъэкIэ кIорэ медицинскэ аппаратурэр зэгъэшIэгъэныр ыкIи студентхэр научнэ ыкIи ушэтын проектхэм ахэгъэлэжьэгъэнхэр.

— Пэрыт медицинэ технологиехэр ыкIи научнэ IофыгъуакIэхэр гъэсэныгъэ процессым хэгъэлэжьэгъэнхэр.

— Научнэ-методическэ материалхэм язэхэгъэуцон зэгъусэхэу дэлэжьэнхэр информациемкIэ зэхъожьынхэр, непэрэ цифрэ технологиехэри зэрахэтэу.

Фэдэ зэдэлэжьэныгъэм ишIуагъэкIэ МКъТУ-м и Медицинскэ институт истудентхэм стажировкэхэр ыкIи практикэхэр Урысыем иклиникэ пэрытмэ ащахьын амал яIэщт. Ащ университетым изытети къыIэтыщт, студентхэм янеущрэ мафэ къыгъэнэфэщт, научнэ Iофхэми IэпэIэсэныгъэ зыхэлъ медицинэ IофшIэнхэми закъыщагъотын алъэкIыщт.

Къыхэгъэщыгъэн фае, мыщ фэдэ амалыр къэзытыгъэр 2022-р илъэсым МКъТУ-м Шъолъыр общественнэ организациеу «Врачмэ я Хасэ» зэрэщызэхащагъэр ары. Ащ зэрипхыгъэх гъэсэныгъэ, научнэ ыкIи практическэ лъэныкъохэр, гъусэгъухэр нахьыбэ ышIыгъэх, IэпэIэсэныгъэшхо зыхэлъ медицинскэ специалистхэр егъэджэн процессым  къыхигъэлэжьэшъугъэх, шъолъыр зэдэлэжьэныгъэр ыгъэлъэшыгъ.