Гъэсэныгъэ екIолIакIэу «Къулыкъу ахьызэ егъэджэгъэнхэр» зыфиIорэм къыдыхэлъытагэу Мыекъопэ къэралыгъо технологическэ университетым и ВСКС и ДПО игуфэкIо командэ тематическэ мастер-классэу «Апэрэ IэпыIэгъур» зыфиIорэр В. Солдатенкэм ыцIэ зыхьырэ гурыт еджапIэу №8-рэ кадетскэ классэу гъэсэныгъэ гупчэу №10-рэ апае зэхащагъ.

Iофтхьабзэм пшъэрылъ шъхьаIэу фэхъугъэр кIэлэеджакIомэ апэрэ IэпыIэгъур зэрарагъэкIыщтымкIэ, ошIэ-дэмышIэ чIыпIэ ифэхэмэ зэрэзекIощтхэмкIэ, цIыфым ипсауныгъэ икъэгъэнэжьынкIэ ашIэн фаехэм нэIуасэ афэшIыгъэнхэр арыгъэ.

Псауныгъэр къэухъумэгъэнымкIэ Урысые Федерацием и Унашъоу жъоныгъуакIэм и 3-м 2024-рэ илъэсым къыдэкIыгъэ №220-м «Апэрэ IэпыIэгъур зэрябгъэкIыщтымкIэ хэбзэ гъэнэфагъэхэр» зыфиIоу Iоныгъом и 1-м 2024-рэ илъэсым кIуачIэ зиIэ хъугъэм елъытыгъэу егъэджэнхэр рагъэкIокIыгъэх.

Десэр зыщыкIорэ уахътэм кIэлэеджакIохэр щыгъозагъэх цIыфым апэрэ IэпыIэгъур ебгъэкIыныр къызщысырэ уахътэр, ащ методикэу ыкIи шапхъэу пылъхэр. Анахьэу анаIэ зытырагъэтыгъэр нэбгырэ пэпчъ шъхьафэу Iоф дэшIэгъэныр ары:  гуфакIомэ шIыкIэу щыIэхэр къагъэлъэгъуагъэх, кIэлэеджакIомэ ахэр кIарагъэшIыкIыжьыгъэх. ЦIыфым жьы къымыщэжьы хъумэ, гур къэузыгъэмэ, къызэхэфагъэмэ, ащ фэдэхэр къызыхэкIырэм узэрэзекIощтыр, апэрэ шIыкIэу бгъэфедэщтхэр къыраIотыкIыгъэх ыкIи къагъэлъэгъуагъэх.

Практическэ Iахьым кIэухэу фэхъугъэр  флешмобэу къашIыгъэр ары, сымаджэу IэпыIэгъу зищыкIагъэр бгъунджэу агъэгъолъыгъ, медицинэ къулыкъушIэхэр къэсыфэ ары зэрашIырэр.

Программэ шъхьаIэм игъусэу МКъТУ-м истуденткэу Дара Ираник зэIухыгъэ десэр зэрищагъ, ар зыфэгъэхьыгъагъэр Урысыем имэшIо къулыкъу къэухъумэгъэныр зыщыIэр илъэс 376-рэ зэрэхъугъэр ары. КIэлэеджакIомэ ащ щызэрагъэшIагъ мэшIогъэкIосэ къулыкъум итарихъ, мэхьанэу яIэр, непэрэ мафэм шIуагъэу къахьырэр.