Мыекъопэ къэралыгъо технологическэ университетым иныбжьыкIэ политикэ хэхъоныгъэ егъэшIыгъэнымкIэ программэу 2025–2026-рэ илъэсхэм ателъытагъэр щаштагъ. Лъэтегъэуцор зэрищагъ ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Муратэ.

Программэм иджэпсэлъэ шъхьаIэр — «Хэгъагъу, гъэпсы, зыдэлэжьэжь!» — ащ къегъэлъагъо университетым мы лъэныкъомкIэ курсэу иIэр, студенческэ шIоигъоныгъэхэм, гукъэкIхэм, пэрытныгъэм ыкIи гуфэкIо Iофхэм, технологическэ предпринимательствэм зэрадыригъаштэрэр.

Лъэтегъэуцом къыдыхэлъытагъэу программэм хэхьащт проект шъхьаIэхэр къагъэнэфагъэх:

— Форумэу «БАС: пространство для возможностей и развития 2» зыфиIорэр — ар научнэ-технологическэ хъугъэ-шIэгъэшху, пилот зэрымыс системэхэм ныбжьыкIэхэр афэгъэнэIосэгъэнхэм, хэхъоныгъэ ащкIэ ягъэшIыгъэным тегъэпсыхьагъ.

— Акселерационнэ программэу «Инновектор» зыфиIорэр — студенческэ стартапхэм адегъэштэгъэныр ыкIи технологическэ предпринимательствэм икультурэ гъэпсыгъэныр.

— Комплекснэ программэу гуфакIохэр зэрэрагъаджэхэрэу «По зову сердца» зыфиIорэр — студенческэ сообществэр гуфакIохэм къапкъырыкIыхэзэ зэтырагъэпсыхьаныр.

— Проектэу «Студенческэ парламентыр» — зыгъэIорышIэжьыным исистемэ ахэлъхьэгъэныр ыкIи студентмэ пэрытхэр къахэгъэщыгъэныр.

— Шъолъыр медиа-форумэу «Адыгея зовёт» зыфиIорэр — IэкIоцI туризмэр лъыгъэкIотэгъэныр ыкIи ныбжьыкIэ медиа-чаныгъэм хэхъоныгъэхэр егъэшIыгъэнхэр.

— Социальнэ проектэу «Шаг в профессию» зыфиIорэр — практическэ IофшIэнымкIэ сэкъатныгъэ зиIэ сабыйхэр щыIэныгъэм хэгъэгъозэжьыгъэнхэр.

Проект пэпчъ ныбжьыкIэмэ ясэнаущыгъэ якъызэIухын, хэхъоныгъэ ягъэшIыгъэным фэгъэхьыгъэх, общественнэ, научнэ ыкIи профессиональнэ щыIакIэ яIэным фэузэнкIыгъэх.

БрантIэ Муратэ къызэрэхигъэщыгъэмкIэ, программэм игъэцэкIэн университетым ныбжьыкIэ политикэр щыгъэпытэгъэныр къыкIэлъыкIощт, студенческэ сообществэу зыпкъитыныгъэ зиIэщтым игъэпсын лъагъэк1отэщт.