Мыекъопэ къэралыгъо технологическэ университетым икIэлэегъаджэу Павел Винограденко къэгъэлъэгъон-конференцие анахь инэу информационнэ щынэгъончъэнымкIэ «AMPIRE360» алъытэрэм хэлажьэ, ар зэхэзыщагъэр Москва дэт компаниеу «Перспективный мониторинг» зыфиIорэр ары.

Iофтхьабзэм отраслэм испециалист шъхьаIэхэр, къэралыгъо органхэм, бизнесым, гъэсэныгъэ организациехэм ялIыкIохэр ыкIи студентхэр зэрипхыгъэх. Конференцием къыдыхэлъытагъэу финалэу Ampire Trophy рагъэкIокIыгъ — апшъэрэ еджапIэхэр зыхэлэжьэгъэхэ студенческэ зэнэкъокъухэу киберполигонхэу Ampire зыцIэмкIэ зэтегъэпсыхьагъэхэр. Практическэ киберегъэджэнхэм хэлажьэхэрэр хилъэсагъэх: чIыпIэ хъыбэйхэр къыхагъэщыщтыгъэх ыкIи кибератакэмэ къахэкIыгъэ гумэкIыгъохэр дагъэзыжьыщтыгъэ, а зэкIэри къэлэ цифрэ инфраструктурэм къыдыхэлъытагъэу агъэцэкIагъ.

Iофтхьабзэм ипрограммэ джащ фэдэу хахьэщтыгъэх: мастер-классхэр ыкIи практическэ тренингхэр, информационнэ щынэгъончъэным ехьылIагъэхэр зэхэщэгъэнхэр, платформэу Ampire ишIыкIэ хэушъхьафыкIыгъэхэр къагъэлъэгъонхэр, проектыкIэхэм лъэтегъэуцохэр афэшIыгъэнхэр, джащ фэдэу тематическэ секциехэр регъэкIокIыгъэнхэр. Ахэмэ яшIуагъэкIэ специалист ныбжьыкIэхэр агъэхьазырых, IэпэIэсэныгъэр къаIэты. КибербщынэгъончъэнымкIэ упчIэу къэуцухэрэм атегущыаIгъэх; практическэ десэхэр зыфэгъэхьыгъагъэхэр компьютернэ атакэхэм апэшIуекIогъэнхэр, щынагъоу къыкъокIыхэрэр зыфэдэхэр ашIэнхэр ары.

Конференцием хэлажьэхэрэмкIэ мы Iофтхьабзэр лъэубэкъушIу хъугъэ япрофессиональнэ амалхэм ахагъэхъонхэмкIэ, япрактическэ опыт зырагъэушъомбгъунымкIэ, информационнэ щынэгъончъэным пылъмэ зэпхыныгъэ адыряIэнымкIэ.