Мыекъопэ къэралыгъо технологическэ университетым икIэлэегъаджэхэу Цундышк Вячеславрэ Любовь Вавиловамрэ сэнэхьат тедзэ-гъэсэныгъэ программэмкIэ еджэх, сэнэхьатэу «Трекер технологических стартапов 2.0» зыфиIорэр зэрагъэгъоты. Мы программэм игъэцэкIэн организациеу «Фирон» зыцIэр пылъ, иIэпыIэгъур президентскэ грантхэмкIэ проектэу «Къыблэ Урысыем иинновационнэ хаб» зыфиIорэр ары.

Гъэсэныгъэ программэм модулиблыхэмкIэ лекцие курсыр къыделъытэ, ахэр  стартап-проектхэм яедзыгъо зэфэшъхьафхэм афэгъэхьыгъэх. Хэлажьэрэмэ коучинговэ Iэмэ-псымэхэр зэрагъашIэх, технологическэ гукъэкIэу щыIэхэр зэхафых, инвестициехэр стартапмэ къящэлIэгъэнхэмкIэ шIыкIэхэм защагъэгъуазэ. Теоретическэ Iахьыр закIурэ ужым, тестовэ гъэцэкIэнхэр ашIыщтых, трекер рольхэм арытхэу практикэр акIущт.

Мы мафэхэм Ростов-на-Дону Iофтхьабзэу щыкIуагъэм Къыблэ урысыем ишъолъыр зэфэшъхьафхэм къарыкIыгъэхэр зэрищэлIагъэх. ШIуфэс псалъэкIэ ащ хэлажьэрэмэ закъыфигъэзагъ АНО «Фирон» зыцIэм ипащэу Инна Шенгоф. Ащ сессием ипрограммэ зыфэдэр игъэкIотыгъэу къыIотагъ, зэкIэхэри сэнэхьатэу трекер технологическэ стартапхэм ахищагъэх — хэгъэгу инновационнэ бэдзэрымкIэ IофыгъуакIэр зыфэдэм грант Iофхэр экспертизэ шIыгъэнхэмкIэ Гупчэм ипащэу Лиана Волобуевар къатегущыIагъ, стартап щысэу къыхьыгъэр —АНО «Фироным» ирезидентхэр ары.

Трекермэ япрактическэ лъэныкъохэм анахьэу анаIэ тырадзагъ. Интерактивнэ шапхъэм илъэу стартап-проектхэр зыфэдэхэр зэхафыгъэх. Ахэмэ ащыщыгъэх — «WinJob», ар Никита Парменовым къыгъэхьазырыгъ, фрилансерхэм апае заказхэр социальнэ хъытыум къыредзэх, джащ фэдэу проектэу «YouchipTech» — навигационнэ системэу унэ кIоцIым итыр ыкIи «Дронмэ апэшIуекIорэ Iашэм игъэфедэн симуляторымкIэ» зыфиIорэр агъэцакIэ.

Технологическэ стартапхэм хэхъоныгъэ ягъэшIыгъэным пае ашIэрэмкIэ къадэгощагъэх зэлъашIэрэ практикхэр — Василий Чохели ыкIи Арам Петросян. Неущырэ трекерхэм ахэмэ къаIотагъэр къашъхьэпэщт.

Программэу «Трекер технологических стартапов 2.0» зыфиIорэр гъэсэныгъэ дэгъу зыщагъотырэ площадкэ хъугъэ, апшъэрэ еджапIэхэр тапэкIэ мы лъэныкъомкIэ нахь чанэу зэдэлэжьэщтых, Къыблэ Урысыем технологическэ предпринимательствэр щылъагъэкIотэщт.