Мыекъопэ къэралыгъо технологическэ университетым игъэкIотыгъэу Урысые научнэ-практическэ конференциеу «Студенческэ наукэр — ныбжьыкIэмэ яеплъыкI» зыфиIорэр щыкIуагъ.

Тхьэмафэм къыкIоцI факультетхэм IофшIэнышхохэр ащагъэцэкIагъэх, кIэлэегъаджэхэмрэ студентхэмрэ макIэп ашIагъэр. Конференцием хэлажьэрэмэ лъэныкъо зэфэшъхьафхэм афэгъэхьыгъэ докладхэр къашIыгъэх, опытхэмкIэ зэхъожьыгъэх, зэхэгущыIэгъухэр зэхащагъэх.

Мэкъу-мэщ продукцием икъыдэгъэкIынкIэ кафедрэм секциищмэ язэхэсыгъохэр щыкIуагъэх:

— «Инновационнэ технологиехэмкIэ агропромышленнэ комплексым хэгъэхъогъэныр» ыкIи «Непэрэ гумэкIыгъохэу былым продукцием епхыгъэхэр ыкIи аквакультурэм» зыфиIохэрэр, яIэшъхьэтетыр Мамсыр Нурбый;

— «АгроНовациехэр: лIэужыкIэм игукъэкIхэр» (пащэр — Шъао Жанна).

Iофтхьабзэхэр зыфэгъэхьыгъагъэхэр ныбжьыкIэхэм ягукъэкIхэу агрономием ыкIи зоотехнием япхыгъэхэр ары, мэкъу-мэщым игумэкIыгъохэм анаIэ тырягъэдзэгъэныр, МКъТУ-м, Къэбэрэтэ-Бэлъкъар къэралыгъо ГАУ-м, Ингушскэ къэралыгъо университетым, Абхъаз къэралыгъо университетым ястудентхэр ягукъэкIхэмкIэ зэгъэхъожьыгъэнхэр. Гъэсэныгъэ гупчэу «Полярис-Адыгея» зыфиIорэм икIэлэеджакIомэ япроектхэр къагъэлъэгъуагъэх, программэу «Сириус.Гъэмаф: уипроект егъажь» зыфиIорэм хэлажьэхэрэри къагъэнэфагъэх. Докладмэ ятемэ шъхьаIэу щытыгъэхэр псэушъхьэхэр зыгъэсымэджагъэхэр, ушъхьагъэу фэхъугъэхэр къыхэгъэщыгъэныр непэрэ методикэхэмкIэ гъэпсыгъэныр ары.

Секциеу «Психологием ыкIи педагогикэм япхыгъэ упчIэ шъхьаIэхэр» зыфиIорэм щытегущыIагъэх цIыфыр IофшIэным пыужьыныр къызыхэкIырэм игъэунэфын, врачым цыхьэ фэшIыгъэныр, психосоматикэр ыкIи хэушъхьафыкIыгъэ шэныр. Доклад дэгъухэр къэзышIыгъэхэу къыхагъэщыгъэ студентхэр: Яна Ермаковар, Олег Бредихиныр ыкIи Пафифэ Айтэч.

Профессорскэ-кIэлэегъэджэ купэу информационнэ щынэгъончъэнымкIэ ыкIи прикладной информатикэмкIэ кафедрэм иIэр, экономикэм ыкIи юриспруденцием яинформационнэ системэхэм яфакультет идеканэу Дэргушэо Асият япащэу секциеу «Информационные технологии в развитии современного общества» зыфиIорэр зэхащагъ. Бизнесым ицифрэ трансформацие, гъэсэныгъэм ыкIи медицинэм афэгъэхьыгъэ докладхэр студентмэ къашIыгъэх. Абрэдж Сабинэ зэхигъэуцуагъэм лъэтегъэуцоу фашIыгъэм итемагъэр «Бизнесым ицифрэ трансформацие: стратегиер ыкIи тенденциер».

Секциеу «Экономикэм ыкIи гъэIорышIэным афэгъэхьыгъэ упчIэхэр» зыфиIорэм инновационнэ екIолIакIэхэу хъызмэтшIапIэмэ афашIырэмэ яхьылIагъэу щытыгъ. IофшIэн анахь дэгъухэр — Тао Самирэ идокладхэу «Экономика впечатлений в менеджменте» (научнэ пащэр — кIэлэегъэджэ шъхьаIэу Хьаджгъэрые Анастасие) ыкIи Алыбэрд СултIан идокладэу «Искусственный интеллект в условиях новой экономики» (научнэ пащэр — кIэлэегъэджэ шъхьаIэу Сергей Бабиныр).

ЧIыдэгъэ Iофым ыкIи энергетикэм якафедрэ ипащэу Мэрэтыкъо Муратэ яIэшъхьэтетэу секциеу чIыдэгъэ отраслэм фэгъэхьыгъэр зэхащагъ, ащ щытегущыIагъэх магистральнэ трубэхэм япроектированиерэ яшIынрэ япхыгъэ Iофхэм, джащ фэдэу пилот зэрымыс аппаратмэ янеущрэ мафэ зыфэдэщтым ыкIи нэмыкIыбэхэм. Анахь доклад дэгъур — студентэу Виталий Ильиным иер ары: «Гармонизация тока и человека» зыфиIорэр (научнэ пащэр — ЧIыдэгъэ Iофым ыкIи энергетикэм якафедрэ идоцентэу, техническэ шIэныгъэхэмкIэ кандидатэу Николай Старковыр).

Хьисапым, физикэм ыкIи системнэ анализым якафедрэ зэхэсыгъо щызэхащагъ, ащ иIэшъхьэтетыгъэхэр доцентхэу ХъокIон И.М. ыкIи Шевякова О.П. Студентмэ прикладной пшъэрылъхэр чIыдэгъэ IофымкIэ, машинэшIымкIэ ыкIи нэмыкI отраслэхэмкIэ къашIыгъэх. Ащ фэшъхьафэу, научнэ тхьамафэм къыдыхэлъытагъэу университетым истудентмэ апае физикэмкIэ ыкIи хьисапымкIэ олимпиадэхэр зэхащагъэх.

Автомобильнэ транспортым икафедрэ зэхищэгъэ конференцием инженернэ факультетым истудентхэр, МКъТУ-м и Политехническэ колледж, транспортымкIэ Донецкэ академием ялIыкIохэр, джащ фэдэу Мыекъуапэ икIэлэеджакIохэр хэлэжьагъэх. Секцием ипащагъэр доцентэу Инна Ахуновар ары. ШIуфэс псалъэкIэ ушэтэкIо ныбжьыкIэмэ закъыфигъэзагъ транспортымкIэ Донецкэ академием научнэ-педагогическэ IофшIэнымкIэ ипроректорэу Никита Володарец. Конференцием къыщаIэтыгъэх гъогухэм яшIын, общественнэ транспортым иIофшIэн, цифровизацие логистикэр ыкIи инклюзивнэ туризмэр шIыгъэнхэр.

Технологическэ факультетым зэхэсыгъоу «Перспективы развития легкой промышленности в России» зыфиIорэр щыкIуагъ, ар зэрищагъ доцентэу КIэдэкIое Нафсэт. Промышленность псынкIэм инепэрэ зытет, ащ епхыгъэ гумэкIыгъохэр, сэкъатныгъэ зиIэ цIыфхэм апае щыгъынхэр дыгъэнхэр ыкIи нэмыкIыбэхэр ащ къыщаIэтыгъэх. Башкирскэ кIакIомэ яхудожественнэ шапхъэхэр къагъэлъэгъуагъэх, ар нысхъап-шIухьафтынымкIэ къатыгъэу хъугъэ. ЗэкIэмкIи доклади 8 къыщашIыгъ. ЗэкIэмэ анахь дэгъоу къыхахыгъэр студенткэу ТхьакIущынэ Рузанэ идокладэу  «Апсайклинг в мире моды: новый вектор осознанного потребления» зыфиIорэр ары.

Стоматологие кафедрэм икIэлэегъэджэ шъхьаIэхэу МэфэгъэлI Ф.А. ыкIи Былымгъот Ф.А. Iэнэ хъураер зэращагъ, ащ стоматолог ныбжьыкIэмэ сымаджэхэм зэряIазэхэрэ технологиякIэхэр къыщыраIотыкIыгъэх. 

ХьакIэу къырагъэблэгъагъэмэ ащыщых — врач-стоматологхэр, факультетым икIэлэегъаджэхэр ыкIи истудентхэр.

Техническэ шIэныгъэхэмкIэ кандидатэу Гаяна Арутюновар секциеу «Технологическэ, экологическэ ыкIи экономическэ лъэныкъохэу производствэм иIэхэр ыкIи гъомлапхъэм ищынэгъончъагъэ» зыфиIорэр зэрищагъ. Мэкъу-мэщыр зыпкъ итэу щытыным, гъомлапхъэхэр дэгъухэу ыкIи щынэгъончъэхэу, IофыгъуакIэхэр къащыдалъытэхэу агъэпсыным афэгъэхьыгъэ докладхэр ащ къыщашIыгъэх. Iофтхьабзэм икIэухым технологическэ, экологическэ ыкIи экономическэ лъэныкъохэр производственнэ процессхэм ащыгъэфедэгъэнхэмкIэ унашъохэр ашIыгъэх.

Информационнэ щынэгъончъэным ыкIи прикладной информатикэм икафедрэ ипащэу Цундышк Вячеслав зиIэшъхьэтетыгъэ секциер «Кибербезопасность, беспилотный транспорт и технологии машинного обучения» зыфиIорэр ары, студентхэмрэ кIэлэеджакIохэмрэ афэгъэхьыгъагъ. Докладэу къашIыгъэхэр пэIудзыгъэ гъэпцIакIохэм, хъытыум бзэджэшIагъэу щашIэхэрэм, блокчейныр  медицинэм ыкIи пилот зэрымыс аппаратхэмкIэ зэрагъэфедэхэрэм яхьылIэгъагъэх. IофшIэн анахь дэгъоу къыхахыгъэхэр: Глеб Вихровыр («Этические проблемы использования искусственного интеллекта в беспилотном транспорте») ыкIи кIэлэеджэкIо купэу Нестеренко Н., Торосян А., Василишин Н. ятемэр: «Разработка БПЛА с мехатронным захватом» зыфиIорэр.

Урысые научнэ-практическэ конференциеу «Студенческэ наукэр — ныбжьыкIэмэ яеплъыкI» зыфиIорэм иIахь цIыкIу мы къитIотыкIыгъэр. ТапэкIэ джыри хъугъэ-шIагъэ инхэр ыкIи доклад гъэшIэгъонхэр къэтых.