Непэ Мыекъопэ къэралыгъо технологическэ университетым и Дзэ егъэджэн гупчэ пчъэ зэIухыгъэхэм ямафэ щыкIуагъ, ащ хэлэжьагъэх Адыгэ Республикэм икIэлэеджакIохэр.

Iофтхьабзэм хьэкIэ лъапIэхэр хэлэжьагъэх. Ахэмэ ащыщых: Ф-м и УIэшыгъэ КIуачIэхэм я Генеральнэ штаб и ЗэхэщэкIо-мобилизационнэ гъэIорышIэпIэ шъхьаIэ ипащэ игуадзэу Владимир Цимлянскэр; Урысые кIэлэцIыкIу гупчэу «Смена» зыфиIорэм ипащэ игуадзэу Алексей Резникыр; ушэтэкIо-гъэсэныгъэ IофшIэнымкIэ ГъэIорышIапIэу «Роспатриотцентр» зыцIэм иотдел ипащэу Дарья Матрешинар; Урысые общественнэ-къэралыгъо организациеу «ДОСААФ-м» итхаматэ иIэпыIэгъоу Амангильды Караменовыр; дзэ-патриотическэ IофшIэнымкIэ ыкIи общественнэ объедениехэм адэлэжьэгъэнымкIэ организацием иотдел иупчIэжьэгъоу Вячеслав Зелепукиныр, УФ-м игенеральнэ штаб зэхэщэкIо-мобилизационнэ гъэIорышIэпIэ ШъхьаIэу иIэм ия 4-рэ гъэIорышIапIэ ия 4-рэ лъэныкъо ипащэу, полковникэу Павел Неклюдовыр ыкIи УФ-м игенеральнэ штаб и УIэшыгъэ КIуачIэхэм якупхэм япащэу, полковникэу Сергей Волковыр.

Iофтхьабзэр хъугъэ-шIагъэхэмкIэ баигъэ, хьакIэмэ арагъэлъэгъугъ непэрэ уахътэм диштэрэ дзэ ыкIи хэушъхьафыкIыгъэ техникэу щагъэфедэрэр, пилот зэрымыс аппаратхэр, робототехническэ комплексхэр, Iашэ зэфэшъхьафхэр.

Ащ фэшъхьафэу апэрэ IэпыIэгъур зэрарагъэкIырэр, учебнэ-тренировочнэ шIыкIэхэу авиационнэ симуляторхэмкIэ ашIыхэрэр арагъэлъэгъугъэх. Джащ фэдэу Дзэ егъэджэн гупчэм иаудиториехэр ыкIи илабораториехэр къарагъэплъыхьагъэх. Анахьэу анаIэ зытырадзагъэр пилот зэрымыс аппаратхэу пыймэ агъэфедэрэмэ зэрапэуцужьхэрэр ары.

ХьакIэмэ алъэгъугъэм осэшхо къыфашIыгъ, техническэ базэр уахътэм диштэу зэрэгъэпсыгъэр, курсантмэ IэпэIэсэныгъэшхо зэрахэлъыр къыхагъэщыгъ.

Мыекъопэ къэралыгъо технологическэ университетым и Дзэ егъэджэн гупчэ пчъэ зэIухыгъэхэм ямафэу щыкIуагъэм джыри зэ къыгъэшъыпкъэжьыгъ мыщ истатус, Урысые Федерацием и УIэшыгъэ КIуачIэхэм кадрэхэр афэгъэхьазырыгъэнымкIэ шъолъыр системэм зэрэщыщыр.