Мыекъопэ къэралыгъо технологическэ университетым къеблэгъагъэх Юрий Долудиныр — ЦГБУ «ТерапиемкIэ ыкIи профилактическэ медицинэмкIэ Лъэпкъ медицинскэ ушэтэкIо гупчэм» биомедицинскэ технологиехэм хэхъоныгъэ ягъэшIыгъэнымкIэ илабораторие ипащэр ыкIи псауныгъэр къэухъумэгъэнымкIэ Адыгэ Республикэм и Министрэ игуадзэу Максим Коробкэр.

Iофтхьабзэм къыдыхэлъытагъэу Юрий Валерий ыкъомрэ  Максим Александр ыкъомрэ МКъТУ-м и Политехническэ колледж и Медицинскэ кластерэу ПрофиМед» зыфиIорэр зэрагъэлъэгъугъ. Мыщ ахэр колледжым иматериальнэ-техническэ базэ нэIуасэ щыфэхъугъэх: хэушъхьафыкIыгъэ лабораториехэм ыкIи егъэджэн кабинетхэм, непэрэ лъэхъаным диштэрэ Iэмэ-псымэхэр зычIэтхэм. Мы аудиториехэм студентмэ практическэ десэхэр щахьых, сымаджэмэ зэрапылъыщтхэр, врачым ыпэкIэ IэпыIэгъу зэрэрагъэкIыщтыр щызэрагъашIэ, цифрэ технологиехэр медицинскэ практикэм щагъэцакIэ.

Кластерыр зызэрагъэлъэгъу ужым хьакIэхэр университетым икорпус шъхьаIэ еблэгъагъэх, ащ МКъТУ-м и Научнэ-гъэсэныгъэ  лабораториеу биотехнологиехэм афэгъэзагъэр щызэрагъэлъэгъугъ, а чIыпIэр ары инновационнэ Iофхэр зыщыкIохэрэр, патентхэмкIэ ащыщхэр къаухъумагъэх.

Анахьэу ашIогъэшIэгъоныгъэр МКъТУ-м и «Точка кипение» — площадкэу студентхэр цифрэ лъэныкъом фэзыгъасэрэр, Лъэпкъ технологическэ гукъэкIхэм япхыгъэ проектхэр зыщызэхагъэуцохэрэр, Студ.Пространствэм иушэтэкIо Iофхэр зыщыкIохэрэр — непэрэ мафэм диштэрэ егъэджэпIэ чIыпI, команднэ IофшIэныр, творчествэр къебэкIыгъэх.

Экскурсием кIэухэу фэхъугъэр Аккредитационнэ-симуляционнэ гупчэр ары, ащ медицинэм щылэжьэщт специалистхэм яIэпэIэсэныгъэ щапсыхьэ, лъэныкъохэу реанимацием ыкIи интенсивнэ терапием, хирургием, акушерствэм ыкIи гинекологием, педиатрием, стоматологием, неврологием, фармацием ыкIи нэмыкIхэм.

Юрий Долудинымрэ  Максим Коробкэрэ университетым зэрэщыIагъэхэм мэхьанэшхо иIэу щыт, специалистэу щагъэхьазырхэрэм зэращыгугъыхэрэр, ахэмэ гъэсэныгъэ дэгъу дэдэ мыщ зэращагъотырэр къеушыхьаты, джащ фэдэу МКъТУ-м инаучнэ-гъэсэныгъэ базэ зыкъызэриIэтыгъэр, медицинэм ыкIи нэмыкI лъэныкъохэмкIэ егъэджэнхэр апшъэрэ лъэгапIэхэм анэсэу зэрэщызэхэщагъэхэр нэрылъэгъу хъугъэ.