Мыекъопэ къэралыгъо технологическэ университетым Iэнэ хъураеу «ТекIоныгъэм и Маф. Хэгъэгу зэошхор тарихъ шIэжьым икъэухъумэн ыкIи непэрэ екIолIакIэу щыIэхэр» зыфиIорэр щыкIуагъ, ащ шъолъыр зэфэшъхьафхэр хэлэжьагъэх. Iофтхьабзэр зэхэзыщагъэр Урысые обществэу «ШIэныгъэр» ары.

Лъэпкъ дипломатием ыкIи МКъТУ-м икультурнэ зэпхыныгъэхэм я Гупчэ ипащэу, тарихъ шIэныгъэхэмкIэ кандидатэу Саид Мусхаджиевыр шIуфэс псалъэкIэ Iэнэ хъураем хэлажьэрэмэ закъыфигъэзагъ. Ащ игущыIэхэм къахигъэщыгъ Хэгъэгу зэошхом фэгъэхьыгъэ тарихъ шIэжьыр гъэлъэпIэгъэн зэрэфаер, ныбжьыкIэхэр патриотизмэм фэпIугъэнхэмкIэ, непэрэ уахътэм къыздихьырэ IофыгъуакIэ-гумэкIыгъохэм апэуцужьыгъэнхэмкIэ ащ мэхьанэшхо зэриIэр.

ХьакIэмэ ахэтыгъэх — Гуманитар ушэтынхэмкIэ Адыгэ республикэ институтым тарихъымкIэ иотдел ипащэу, тарихъ шIэныгъэхэмкIэ докторэу, Адыгеим ыкIи Пшызэ наукэмкIэ язаслуженнэ IофышIэу Ацумыжъ Казбек, ащ Хэгъэгу зэошхом фэгъэхьыгъэ упчIэу къэуцухэрэмкIэ зэхэугуфыкIыгъэ доклад къышIыгъ. Джащ фэдэу къырагъэблэгъагъэх Адыгэ Республикэм иветеранхэм я Совет итхьаматэу Къуаджэ Аслъан, «Адыгеим иныбжьыкIэхэм» япащэу Мыгу Бислъан. ПэIудзыгъэ шIыкIэмкIэ Iэнэ хъураем иIофшIэн къыхэлэжьагъэх Урысые Федерацием и Правительствэ и Финансовэ университет идоцентэу, тарихъ шIэныгъэхэмкIэ кандидатэу Наталия Гаража, ащ Новороссийскэ истудентхэр игъусагъэх ыкIи тарихъ шIэныгъэхэмкIэ кандидатэу, Къыблэ федеральнэ университетым идоцентэу, Ростов хэкум и Къэралыгъо хъарзынэщ ипащэу Николай Трапш.

Гупчэм истудентхэр чанэу зэхэгущыIэжьым хэлэжьагъэх, тарихъ шIэжьым икъэухъумэн епхыгъэ Iофыгъохэр зэхафыгъэх, урысые лъэпкъ зыкIыныгъэм игъэпсын дэлэжьэгъэн зэрэфаер къыхагъэщыгъ. Iэнэ хъураем къыщыхагъэщыгъ Хэгъэгу зэошхом фэгъэхьыгъэ хъугъэ-шIагъэхэмкIэ шIэныгъэу зэрагъэгъотырэм ныбжьыкIэхэм я Хэгъэгу шIу алъэгъоу пIугъэнхэмкIэ мэхьанэ зэриIэр.

Тарихъыр зэблахъунэу аужырэ уахътэм зэрэфежьагъэхэр, къохьапIэ хэгъэгухэр анахьэу ащ зэрэпылъхэр, Советскэ Союзым иIахьышхоу Хэгъэгу зэошхом хэлъыр зэраушъэфырэр къаIотагъ. Ащ пэуцужьыгъэным фэшI шъыпкъэр къэIогъэныр зэдаштагъ. Адыгеим ицIыфхэм яIахьэу ТекIоныгъэм халъхьагъэми шъхьафэу тегущыIагъэх.