Мыекъопэ къэралыгъо технологическэ университетым и «Точка кипение» Лъэпкъ технологическэ гукъэкIэу «ТехноГТО-м» и Кружковэ движение ифедеральнэ проект лъэтегъэуцо щыфашIыгъ, ар Адыгэ Республикэм истудентхэмрэ икIэлэеджакIохэмрэ афэгъэхьыгъагъ. Зэхэт шIыкIэм тетэу Iофтхьабзэр рагъэкIокIыгъ.

Iофтхьабзэм изещэкIуагъэх маркетингым, сервисым ыкIи туризмэм якафедрэ идоцентэу, МКъТУ-м и «Точка кипение» ипрограммнэ пащэу Светлана Новиковар, информационнэ щынэгъончъэным ыкIи прикладной информатикэм якафедрэ ипащэу, лъэныкъоу «Аэронет» зыфиIорэм икоординаторэу Цундышк Вячеслав. Ахэм ягущыIэхэм къащыхагъэщыгъ проектэу «ТехноГТО» зыфиIорэм амалэу къытыхэрэр, ащ епхыгъэ нормативхэу агъэцакIэхэрэр, хэушъхьафыкIыгъэу университетым щагъэхьазырыгъэ площадкэмэ ушэтынхэр зэращатыхэрэр. ЛъэныкъуитIу анахьэу анаIэ зытырадзагъэр — «Киберщынэгъончъэныр» ыкIи «Пилот зэрымысхэр гъэбыбыгъэнхэр», абитуриентхэмкIэ ахэмэ мэхьанэшхо яIэу щыт. Дэгъоу а нормативхэр зытыхэрэмэ Зэтыгъо къэралыгъо ушэтынхэмкIэ къахьыхэрэм балл тедзэхэр афашIыжьых.

Ащ фэшъхьафэу, Вячеслав Юрий ыкъом игъэкIотыгъэу къыIотагъ нормативхэм ятын изыфэгъэхьазырын Iофхэр зэрэзэхэщагъэхэр, дэгъоу феджэнхэмкIэ шIыкIэ-амалыкIэхэм ашъхьэ къырихыгъ. Светлана Константин ыпхъум  къыIотагъ балл тедзэхэр къызэрэпхьынхэ плъэкIыщтхэр, технологическэ гъэсэныгъэм ылъэныкъокIэ хэхъоныгъэхэр зэрашIыхэрэр.

Iофтхьабзэм хэлажьэрэмэ амал агъотыгъ практикэмкIэ пилот зэрымыс аппаратхэр агъэIорышIэнхэу, трассэхэу киберфизическэ платформэу «Берлога» зыфиIорэм къыщатыхэрэм, ар теоретическэ Iахьэу лъэтегъэуцом фашIыгъэм щыщэу хъугъэ.

«ТехноГТО-м» инормативхэм якомплекс зыфытегъэпсыхьагъэр я 7-11-рэ классхэм ащеджэхэрэмэ ыкIи апэрэ курсым ис студентхэмрэ ятехнологическэ гъэсэныгъэ къэIэтыгъэныр ары. Сыд фэдэ ныбжь зиIи Урысыем амал щыряI мы проектым хэлэжьэнхэу ыкIи зыщаушэтынэу, непэрэ техонологиехэм хэшIыкIэу фыряIэр хагъэхъонэу.

Шъугу къэдгъэкIыжьын, кIэлэеджакIохэм ыкIи студентхэм МКъТУ-м мыщ фэдэ нормативхэр щатын алъэкIыщт: «Пилот зэрымысхэр гъэфедэгъэнхэр», «Къэбарэу щыIэм елъытыгъэу унашъо шIыгъэныр», «Фактчекингыр», «Кибербщынэгъончъэр», «Блогингыр ыкIи цифрэ медиар», «Цифрэ моделированиер ыкIи производствэр», «Зэпхыныгъэм итехнологиехэр».

Проектэу «ТехноГТО-р» къыткIэлъыкIорэ лIэужым технологическэ культурэ хэлъхьэгъэнымкIэ амалышIоу щыт, научнэ-техническэ творчествэм зырегъэушъомбгъу ыкIи яамалхэм ахегъэгъахъо.