Мыекъопэ къэралыгъо технологическэ университетым и Политехническэ колледжым «Вакансиехэм яермэлыкъ» Адыгэ Республикэм имедицинскэ учреждениехэм афызэхащагъ.

ШIуфэс псалъэкIэ зэхахьэм хэлажьэрэмэ закъыфагъэзагъ псауныгъэр къэухъумэгъэнымкIэ АР-м и Министрэ игуадзэу Хьагъэуджэ Мариет, МКъТУ-м егъэджэн IофшIэнымкIэ ипроректорэу Людмила Задорожнаям, Политехническэ колледжым ипащэу ХъутIыжъ Заурбэч. Ахэмэ къыхагъэщыгъ мыщ фэдэ Iофтхьабзэхэм яшIуагъэкIэ къычIатIупщырэмэ IофшIэпIэ чIыпIэхэр зэрагъотыхэрэр, ясэнэхьаткIэ лэжьэнхэ амал яIэ зэрэхъурэр, гъэсэныгъэ организациехэмрэ медицинэ учреждениехэмрэ язэпхыныгъэ ыкIи язэдэлэжьэныгъэ ар къыкIэлъэкIо. Шъолъырым IэпэIэсэныгъэшхо зыхэлъ медицинэ кадрэхэр яIэнхэм зэу ар фэIорышIэ.

Iофтхьабзэм къыдыхэлъытагъэу колледжым имедицинскэ кластерэу— «ПрофиМед» зыфиIорэр къаплъыхьагъ. Экскурсиер зезыщагъэр медицинскэ ыкIи естественно-научнэ дисциплинэхэмкIэ предметно-цикловой комиссиехэм ятхьаматэу КIыржьынэ Аидэ. ХьакIэмэ хэушъхьафыкIыгъэ лабораториехэр ыкIи егъэджэн кабинетхэр зэрагъэлъэгъугъэх, ахэмэ ачIэтых непэрэ уахътэм диштэрэ симуляционнэ оборудованиехэр, студентхэм ахэм защагъасэ, сымаджэхэм зэряIэзэщтхэр, зэралъыплъэщтхэр, IэпыIэгъу зэрафэхъущтхэр ыкIи нэмыкIыбэхэр, цифрэ технологиехэр медицинэм рахьылIэх. ХьакIэмэ колледжым итехническэ базэ осэшхо къыфашIыгъ, егъэджэн процессымкIэ ащ мэхьанэу иIэр къыхагъэщыгъ.

Зэхахьэм хэлажьэрэмэ егъэджэн-методическэ IофшIэнымкIэ гуадзэу Флора Топольян къафиIотагъ зэфэхьысыжьэу мэкъэтыным фэхъугъэр, профессиональнэ къыхэхыгъэнэу студентмэ ашIыгъэм ышъхьэ къырихыгъ. Къэнэфагъэхэм ялъытыгъэу егъэджэныр, практикэр зэрэзэхащэщтхэр агъэнэфагъэх.

Iофтхьабзэм икIэухым республиканскэ клиническэ сымэджэщым иврач шъхьаIэу Чэужъ Нателлэрэ республиканскэ кIэлэцIыкIу клиническэ сымэджэщым сестринскэ персоналым дэлэжьэгъэнымкIэ врач шъхьаIэм игуадзэу Алла Курептарэ игъэкIотыгъэу студентмэ къафаIотагъ кадрэхэу сымэджэщхэр зыщыкIэхэрэр зыфэдэхэр, социальнэ IэпыIэгъоу специалист ныбжьыкIэмэ къаратышъущтхэр.