Мыекъопэ къэралыгъо технологическэ университетым апшъэрэ еджапIэхэм азыфагукIэ я IX-рэ ЗэIухыгъэ чемпионатэу «Профессионал ныбжьыкIэхэр» зыфиIорэр щырагъэжьагъ, ар профессиональнэ IэпэIэсэныгъэм (WorldSkills Russia) и Агентствэ ишапхъэ илъэу зэхащэ.

Студент нэбгырэ 60-мэ яIэпэIэсэныгъэ лъэныкъуи 8-м къащагъэлъагъо, ахэмэ ащыщых: туризмэр, финансхэр, предпринимательствэр, флористикэр, бизнесымкIэ программнэ шIыкIэхэр, фармацевтикэр, тыкъэзыуцухьэрэ дунаим икъэухъумэн ыкIи урбанистикэр. Зэнэкъкоъум хэлажьэхэрэмэ уасэ афэзышIыхэрэр опытышхо зыIэкIэлъ экспертхэр ары.

Чемпионатыр хэушъхьафыкIыгъэ площадкэу МКъТУ-м къытыгъэм щырагъэкIокIы. Хэлажьэрэмэ кейсхэр, проектхэр къашIых, гукъэкIхэм лъэтегъэуцохэр афызэхащэх, сэнэхьатэу къыхахыгъэм зэрэфэшъыпкъэхэр къаушыхьаты. НахьыбэхэмкIэ — сэнэхьатым зыщагъэпытэнымкIэ апэрэ лъэубэкъоу ар щыт.

Зэнэкъокъум дакIоу IофшIэн программэри зэхащагъ, ар зэIукIэхэм ыкIи практикэм афытегъэпсыхьэгъэ сессиехэмкIэ баи.

Iэнэ хъураеу «КъычIатIупщыхэрэмэ шъолъырым IофшIэпIэ чIыпIэ къащыфэгъотыгъэныр: IофшIэн къязытырэмэ япредложениехэр ыкIи гумэкIыгъохэр» зыфиIорэр зэхащагъ, ащ хэлэжьагъэх МКъТУ-м къычIитIупщырэмэ IофшIапIэ ягъэгъотыгъэнымкIэ Гупчэм илIыкIохэр ыкIи Адыгэ Республикэм ихъызмэтшIапIэмэ япащэхэр. Ахэмэ ащыщыгъэх: ПАО «Россети Кубань» зыфиIорэм икъутамэ гъэIорышIэнымкIэ отделым ипащэ, Адыгэ электрическэ хъытыухэр; ООО «МПК Пивзавод Майкопский» зыфиIорэм иотдел ипащэ; Адыгэ Республикэм IофшIэн ягъэгъотыгъэнымкIэ къэралыгъо къулыкъум ипащэ; Федеральнэ казначействэм и ГъэIорышIапIэу АР-м щыIэм гражданскэ къулыкъумкIэ ыкIи кадрэхэмкIэ ипащэ; ПАО «Зарем», ООО «Даховская Слобода»,   ООО «ВОЛМА-Майкоп»; уцыщэ тучанхэм яхъытыоу «Здоровье» зыфиIохэрэм цIыфхэм Iоф адэшIэгъэнымкIэ яотделхэм яIэшъхьэтетхэр.

КъычIатIупщыхэрэр ясэнэхьаткIэ лъыкIотэнхэм фытегъэпсыхьэгъэ практическэ десэхэр агъэцэкIагъэх.

ЯмышIыкIэ гупшысакIэмкIэ тренингыр зезыщагъэр МКъТУ-м ипсихологическэ къулыкъу ипащэу Людмила Красновар ары.

Iэнэ хъураеу «Формула успеха» зыфиIорэм къыдыхэлъытагъэу МКъТУ-м къычIитIупщыгъэмэ гъэхъагъэу яIэхэмкIэ, яопыткIэ къадэгощагъэх, хъугъэ-шIэгъэ гъэшIэгъонэу зэолIагъэхэм ягугъу къашIыгъ. ЗэдэгущыIэгъум гуфэбагъэ хэлъэу кIуагъэ, студенческэ илъэсхэр лъэпсэ пытэ хъуным фэшI ашIэн фаехэм атегущыIагъэх.

ТимэкъэгъэIухэм шъуакъылъыплъэх, тыемэ шъуафэбан, джыри зэнэкъокъу мэфитIу тапэ илъ.