Непэ Мыекъопэ къэралыгъо технологическэ университетым иактовэ зал торжественнэ шIыкIэм тетэу апшъэрэ еджапIэхэр зыхэлэжьэхэрэ я  IX-рэ чемпионатэу «Профессионал ныбжьыкIэхэр» зыфиIорэр къызэIуахыгъ, ар  профессиональнэ IэпэIэсэныгъэм (WorldSkills Russia) хэхъоныгъэ егъэшIыгъэнымкIэ Агентствэм ишапхъэ илъэу зэхащэ.

Чемпионатнэ движениеу МКъТУ-м 2017-рэ илъэсым къыщыхъугъэм лъэныкъуиплI зэлъеубыты, зыгъэхьазырынымкIэ лъэныкъуий хэхьэ, ахэмэ тиапшъэрэ еджапIэ истудент закъохэр арэп ахэлажьэхэрэр, нэфэшъхьаф гъэсэныгъэ организациехэри къыхэхьэх. Мыгъэ къыдгохьагъэхэм ащыщых Пшызэ къэралыгъо медицинскэ университетым истудентхэр.

Егъэджэн IофшIэнымкIэ МКъТУ-м ипроректорэу Людмила Задорожнаям шIуфэс псалъэ хэлажьэрэмэ къафишIыгъ, ащ къыкIигъэтхъыгъ чемпионатым мэхьанэшхо зэриIэр — студентмэ яIэпэIэсэныгъэ къэIэтыгъэнымкIи, ягъэсэныгъэ хэгъэхъогъэнымкIи.

Экономикэм ыкIи юриспруденцием яинформационнэ системэхэм яфакультет идеканэу Дэргушао Асиет, экологическэ факультетым идеканэу Галина Коноваловам ыкIи фармацевтическэ факультетым идеканэу Артур Арутюновым зэнэкъокъум хэлаэжьэрэ студентмэ джащ фэдэу закъыфагъэзагъ, гуфэбагъэ зыхэлъ гущыIэхэр къапагъохыгъэх.

Торжественнэ зэхахьэр творческэ купмэ лъагъэкIотагъ: ансамблэу «He Beatles» МКъТУ-м игимн къыIуагъ, вокальнэ ансамблэу «Акцент» орэдэу «Вперёд, Россия!» ыкIи къэшъокIо дуэтэу ДШИ №1-м къыгъэхьазырыгъэр номерэу «Кавказская сюита» зыфиIорэмкIэ къагъэлъэгъуагъ.

Хабзэ зэрэхъугъэу, церемонием хэтхэр парадэу къырыкIуагъэх, экспертмэ ыкIи зэнэкъокъум хэлажьэрэмэ ацIэкIэ тхьэлъанэ атыгъ.

Мыгъэ зэнэкъокъумэ студент нэбгырэ 60 ахэлажьэ, эксперт 45-мэ ахэмэ уасэ къафашIы мыщ фэдэ лъэныкъохэмкIэ:

— Предпринимательствэр

— Туризмэр

— Флористикэр

— БизнесымкIэ программнэ хэкIыпIэр

— Финансхэр

— Тыкъэзыуцухьэрэ дунаим икъэухъумэн

— Урбанистикэр ыкIи къэлэ псэолъэшIыныр

— Фармацевтикэр

ХэушъхьафыкIыгъэ площадкэхэу университетым иIэхэм мэфищым къыкIоцI зэнэкъокъухэр ащыкIощтых. Мы едзыгъом щытекIохэрэмэ амал яIэщт Москва щыкIощт чемпионатым МКъТУ-р къыщагъэлъэгъонэу, джащ фэдэу

отраслевой чемпионатхэу дунэе платформэм щызэхащэщтхэм акIуачIэ щаушэтын алъэкIыщт.

Зэфэгъэ зэнэкъокъуныгъэ ыкIи шъыпкъагъэ зыхэлъ текIоныгъэхэм тыкъяжэ, зэкIэхэми ягухэлъхэр къадэхъунхэу тафэлъаIо!