Мыекъопэ къэралыгъо технологическэ университетым иIофышIэхэр чанэу яшIэныгъэхэмкIэ ыкIи яопыткIэ адэгуащэх къыткIэхъухьэрэ лIэужхэм.

Мызыгъэгум зэIукIэхэр Мыекъуапэ игимназиитIумэ ащыкIуагъэх, кIэлэеджакIохэр пэрыохъоу зэуалIэхэрэмэ ядэгъэзыжьын ахэр афэгъэхьыгъагъэх.

Iофтхьабзэм изэхэщакIор лъэныкъуабэ зэдэзыубытырэ Шъолъыр ныбжьыкIэ гупчэу «Адыгеим иныбжьыкIэхэр» ары.

Евгений Шварцым ыцIэ зыхьырэ Мыекъопэ еджапIэу №5-м зэIукIэу щашIыгъэм итемагъэр: «Кибербуллингыр ныбжьыкIэхэм азыфагукIэ». Информационнэ щынэгъончъэнымкIэ МКъТУ-м икафедрэ ипащэу Цундышк Вячеслав кIэлэеджакIохэм къафиIотагъ:

— сыда цIыфхэр агрессорэу хъытыум щыхъухэра ыкIи кибербуллингым икъежьапIэ къызэрэпшIэщтыр;

— ащ щымыухъумагъэхэр ыкIи гумэкIыгъом уизакъоу укъыфэмынэныр;

— щынэгъончъагъэм узэрэфэкIощтыр, зыкъэуухъумэжьыным пае зэпыутхэр ыкIи психологическэ приёмхэр зэрэбгъэфедэщтхэр;

— хэбзэгъэуцум диштэу узекIозэ уауж къихьагъэм узэрэшIокIыщтыр.

КIэлэеджакIохэм теоретическэ информацие къодыеп агъотыгъэр, интернетым щылажьэхэзэ къин чIыпIэ ифэхэмэ ащ къызэрэхэкIыжьышъущтхэри зэрагъэшIагъэх.

Гимназиеу №22-м тренинг щыкIуагъ, ащ ыцIагъэр: «Ушэтынхэм яхъулIэу щтэм узэрэтекIощтыр», аригъэхьыгъ психологическэ шIэныгъэхэмкIэ кандидатэу, МКъТУ-м ипсихологическэ къулыкъу ипащэу Людмила Красновам.

Я 9–11-рэ классхэм арыс кIэлэеджакIохэм зэрагъэшIагъ стресс чIыпIэм ифэхэмэ, щтагъор къатебанэмэ зэрэзекIощтхэр, зыпкъитыныгъэм къызэрэфэкIожьыщтхэр, паникэм уримыхьыжьэным пае пшIэн фаехэр, анахьэу ушэтынхэр зыщыптыщтхэ мафэхэм яхъулIэу.

МКъТУ-м иэкспертмэ яшIуагъэкIэ кIэлэеджакIохэм шIэныгъакIэхэр яIэхэ хъугъэ, яцыхьэ зытелъыжьэу, къиныгъохэм апэшIуекIонхэмкIэ ашIэщтым щыгъуазэхэу зэбгырыкIыжьыгъэх.

Адыгэ Республикэм иныбжьыкIэхэм гъэсэныгъэм ылъэныкъокIэ Iоф адэшIэгъэнымкIэ МКъТУ-р гъусэшIоу щыт, шъолырым щыпсэурэ кIэлакIэмэ уахътэм къафихьрэ пэрыохъухэм апхырыкIынхэмкIэ адэIэпыIэ.