Мыекъопэ къэралыгъо технологическэ университетым Дунэе научнэ конференциеу «Шъолъырхэм языпкъитыныгъэ хэхъоныгъ: культурнэ, экономическэ ыкIи социальнэ-политическэ лъэныкъохэм ушэтын екIолIэкIэ зэфэшъхьафэу къафагъотыхэрэр» зыфиIорэр щыкIуагъ.  

Iофтхьабзэм изэхэщакIохэр: МКъТУ-р, Урысые культурологическэ обществэр, культурнэ ыкIи чIыопс кIэным и Урысые научнэ-ушэтэкIо институтэу Д.С. Лихачевым ыцIэ зыхьырэм и Къыблэ къутамэ, Барановскэ къэралыгъо университетыр. Конференцием шIэныгъэлэжь 300-м ехъу хэлэжьагъ, ахэр Урысыем ишъолъыр зэфэшъхьафхэм ыкIи IэкIыб къэралыгъохэм къарыкIыгъэх.

ШIуфэс псалъэу зэхахьэм хэлажьэрэмэ социологическэ шIэныгъэхэмкIэ докторэу, профессорэу, гъэсэныгъэмкIэ Урысые академием иакадемикэу, МКъТУ-м ипрезидентэу ТхьакIущынэ Аслъанэ къафишIыгъэр алъынигъэсыгъ философием, социологием ыкIи педагогикэм якафедрэ ипрофессорэу, культурологиемкIэ докторэу Сихъу Аминэт: «СиIофшIэгъухэр, ныбджэгъу лъапIэхэр! Мыекъопэ къэралыгъо технологическэ университетым зэхищэгъэ Дунэе научнэ конференциеу «Шъолъырхэм языпкъитыныгъэ хэхъоныгъ: культурнэ, экономическэ ыкIи социальнэ-политическэ лъэныкъохэм ушэтын екIолIэкIэ зэфэшъхьафэу къыфагъотыхэрэр» зыфиIорэм шъукъызэреблэгъагъэр тигуапэ хъугъэ, Iофтхьабзэм шъунаIэ къызэрэтешъудзагъэм пае тышъуфэраз. Мыщ фэдэ шапхъэм апшъэрэ еджапIэмэ ащылажьэрэ шIэныгъэлэжьхэу Урысыем ишъолъыр зэфэшъхьафхэм, Беларусым, Армением ыкIи Китаим ащыщхэр зэрепхых. IэкIыб политическэ Iофхэр дэгъум пэчыжьэх, тикъыблэ чIыпIэхэми ащызэхэтэшIэ. Шъолъырым изытет, игумэкIыгъохэм атегущыIэгъэнымкIэ непэрэ конференциер джыри зы амалышIоу щыт. Iофтхьабзэм культурнэ, экономическэ ыкIи социальнэ-политическэ лъэныкъохэр къызэлъеубытых. ЗытегущыIэщтхэм ащыщых гъэсэныгъэм, педагогикэм, цифровизацием япхыгъэ гумэкIыгъохэр. ЗэкIэхэми шIуагъэ къэзытырэ IофшIэныр жъугъэцэкIэнхэу сышъуфэлъаIо!»

Конференцием иIофшIэн секцииплIымэ ащызэхащэгъагъ: «Урысыем ишъолъырхэм яхэхъоныгъэхэр междисциплинарнэ научнэ анализым епхыгъэхэу», «Мэкъу-мэщ промышленнэ комплексым цифровизацием илъэхъан хэхъоныгъэхэр егъэшIыгъэнхэмкIэ иэкономическэ механизмэ», «Гъэсэныгъэр ыкIи цифровизациер шъолъырым хэхъоныгъэ егъэшIыгъэнымкIэ имэхьанэ», «Непэрэ обществэм социальнэ хэхъоныгъэ егъэшIыгъэнымкIэ культурнэ амалхэм мэхьанэу щыряIэр».

Конференцием къыдыхэлъытагъэу шъолъырым хэхъоныгъэ езыгъэшIыщт лъэныкъо пстэуми атегущыIагъэх. КъохьэпIэ санкциехэм язэрарэу шъолъырхэм ясоциальнэ-экономическэ зытет къыфахьырэм фэгъэхьыгъэ упчIэхэм анахьэу анаIэ тырадзагъ. Культурнэ кIэным ишIуагъэу къакIорэм, цифровизацием непэ чIыпIэу щыIэныгъэм щиубытырэм конференцием щытегущыIагъэх. Лъэпкъ зэфэшъхьафыбэ зыщыпсэурэ хэгъэгум социокультурнэ хабзэхэр къызэрэщыхагъэщыхэрэр, лъэпкъ зэфэмыдэныгъэр зэрагъэфедэрэр, нэмыкIхэр къаIэтыгъэх. ШIэныгъэлэжьхэм предложениехэр къахьыгъэх, стратегическэ екIолIакIэхэр къагъэлъэгъуагъэх, экономическэ зэхъокIыныгъэхэм шъолъырхэр афэхьазырынхэм пае ашIэщтхэр къыхагъэщыгъэх.

Урысыем икультурнэ кIэн тегущыIэгъэныр, ар социальнэ ыкIи экономическэ хэхъоныгъэмкIэ зы элементэу агъэунэфыгъ. Конференцием хэлэжьагъэмэ къыкIагъэтхъыгъ осэшхо зиIэ культурнэ кIэным икъэухъумэн ыкIи илъыгъэкIотэн, анахьэу хэгъэгум икъыблэ шъолъырхэмкIэ Iофыгъошхоу зэрэщытыр.

Зэфэхьысыжьэу ашIыгъэхэр ыкIи зытегущыIагъэхэр научнэ IофышIэхэм ыкIи къэралыгъо органхэм тапэкIэ агъэфедэнхэ алъэкIыщтых.