Непэ Мыекъопэ къэралыгъо технологическэ университетым ПАО КБ «Центр-инвест» зыфиIорэм ялIыкIохэр зыхэлэжьагъэхэ зэIукIэгъу щыкIуагъ.

Университетымрэ банкымрэ зэрэзэдэлэжьэщтхэм фэгъэхьыгъэ зэзэгъыныгъэм зэрэкIэтхагъэхэр ары зэIукIэм зэфэхьысыжь шъхьаIэу фэхъугъэр. Ащ къыделъытэ студентхэм IофшIэпIэ чIыпIэ ягъэгъотыгъэныр, практикэ ахьызэ загъэсэныр, зэгъусэхэу экономикэм ыкIи цифрэм яхэхъоныгъэмэ япхыгъэ проектхэр зэдагъэцэкIэнхэр.

ПАО КБ «Центр-инвест» зыфиIорэм ыцIэкIэ зэIукIэм хэлэжьагъэхэр: Правлением итхьаматэу Лидия Симоновар, тхьаматэм игуадзэу Сергей Скрипка, къалэу Мыекъуапэ дэт офисым ипащэу Игорь Тращеевыр.

МКъТУ-м ылъэныкъокIэ хэлэжьагъэхэр: МКъТУ-м иректорэу Къуижъ Саид, цифрэмкIэ проректорэу Дмитрий Игнатовыр, бухгалтер шъхьаIэу Нэныжъ Зарем, егъэджэн-методическэ гъэIорышIэным ипащэу Наталья Чудесовар, экономикэм ыкIи гъэIорышIэным ифакультет идеканэу Ешыгоо Светлан, финансхэм ыкIи кредитым якафедрэ ипащэу Людмила Пригодар, финансовэ гъэсэныгъэмкIэ МКъТУ-м и Шъолъыр гупчэ ипащэу, доцентэу Татьяна Паладовар, хьисапым, физикэм ыкIи системнэ анализым якафедрэ ипащэу Татьяна Дёминар, МКъТУ-м истудентхэм ыкIи къычIитIупщыхэрэм IофшIэпIэ чIыпIэ ягъэгъотыгъэнымкIэ МКъТУ-м и Гупчэ ипащэу Темзэкъо Азамат.

Зэзэгъыныгъэм бгъухэм алъэныкъохэу зыдэлэжьэщтхэр къегъэнафэх:

— зэхэт Iофтхьабзэхэр зэхэщэгъэнхэр, мастер-классхэр, тренингхэр ыкIи стажировкэхэр регъэкIокIыгъэнхэр;

— банкыр апшъэрэ еджапIэм иегъэджэн процесс къыхэгъэлэжьэгъэныр, методическэ материалхэм язэхэгъэуцон, гъэсэныгъэм уасэ фэшIыгъэныр;

— зэхэт программэхэу гъэсэныгъэ тедзэм епхыгъэхэр зэхэщэгъэнхэр, IэпэIэсэныгъэр хэгъэхъогъэныр;

— студентхэр проектэу «Стипендие Iушыр» зыфиIорэм ыкIи нэмыкIхэм ахэгъэлэжьэгъэнхэр;

— университетым къычIитIупщыхэрэр IофшIапIэхэм аIугъэхьэгъэнхэмкIэ адеIэнхэр;

— цифровизациемкIэ, информатизациемкIэ ыкIи информационнэ зэхъожьынымкIэ зэхэт IофшIэнхэр шIэгъэнхэр.

Гъэсэныгъэ программэхэмкIэ лъэныкъохэу «Экономикэр», «Финансхэр ыкIи кредитхэр» зыфиIохэрэм апае гъогу картэр зэхагъэуцо, ащ хэхьащтых магистерскэ программэу «Искусственнэ интеллектыр финансовэ-экономическэ системэхэм» зыфиIорэр, акселерационнэ программэхэм ахэлэжьэнхэр, уасэу ашIыщтхэр, МКъТУ-м истудентхэу стартапхэр зыгъэцакIэхэрэр. Джащ фэдэу адэлэжьэщтых финансовэ гъэсэныгъэм шъолъырым зыкъыщегъэIэтыгъэным, ар МКъТУ-м и Шъолъыр гупчэу финансхэм афэгъэзагъэм игъусэхэу зэшIуахыщт.

Зэзэгъыныгъэу зыкIэтхагъэхэр гъэсэныгъэм ылъэныкъокIэ лъэубэкъу дэгъу хъущт, академическэ сообществэмрэ бизнесымрэ шъолъырым яIофхэр щылъэгъэкIотэнхэмкIэ зэзыпхырэ Iофтхьабзэ шIагъо хъущт.

Официальнэ Iахьыр заухым ыуж, университетым иректорэу Къуижъ Саидэ зэхахьэм хэлажьэхэрэмэ апае экскурсие зэхищагъ, корпус шъхьаIэр аригъэлъэгъугъ, техническэ ыкIи методическэ зэтегъэпсыхьаныгъэу апшъэрэ еджапIэм иIэр зыфэдэр хьакIэмэ алъэгъугъ.