Мыекъопэ къэралыгъо технологическэ университетым ШIум и Хакатон щыкIуагъ, ар программэу «Къулыкъу ахьызэ егъэджэгъэнхэр» зыфиIорэм къыдыхэлъытагъэу зэхащагъ.

Iофтхьабзэм студентхэр ыкIи университетым исообществэ, НКО-м, бюджетнэ учреждениехэм, хабзэм ялIыкIохэр зэхиугъоягъэх, социальнэ мэхьанэ зиIэ проектхэр зэхагъэуцуагъэх.

Хакатоныр макIофэ командиплIымэ ахэхьэрэ студентмэ социальнэ гъэцэкIэнмэ Iоф адашIагъ, ахэмэ опыт зиIэ экспертхэу, гъэсакIохэу университетым исоциальнэ гъусэгъухэр яIэшъхьэтетыгъэх. Зэнэкъокъум хэлажьэрэмэ лъэныкъо ыкIи сэнэхьат зэфэшъхьафхэр къагъэлъагъощтыгъэх, ащ ишIуагъэкIэ пшъэрылъхэр Iо хэмылъэу агъэцэкIэным пае шIыкIэхэр къагъотыгъэх.

Командамэ социальнэ мэхьанэ зиIэ мыщ фэдэ пшъэрылъхэр афашIыгъагъэх:

I.     Къалэм щыпсэухэрэр анахьэу зыгъэгумэкIыхэрэр къыхэгъэщыгъэнхэр ыкIи ахэр зэкIэ гъэунэфыгъэнхэр (къэзгъэлъэгъуагъэр Бэрзэдж Саида Аслъанэ ыпхъур, чIыпIэ зыгъэIорышIэжьыным иорганхэм адэлэжьэгъэнымкIэ Адыгэ Республикэм и Комитет иупчIэжьэгъу).

2.     Гу-лъынтфэ узхэр зиIэхэр шъолъырым щыпсэухэрэм къахэгъэщыгъэныр, псауныгъэм икъэухъумэн фэгъэхьыгъэ къэбармэ ащыгъэгъозэгъэнхэр (къэзгъэлъэгъуагъэр Строкань Светлана Степан ыпхъур, Адыгэ республикэ клиническэ сымэджэщым исестринскэ персоналымкIэ врач шъхьаIэм игуадз).

3.     Сабыйхэм япкъышъолкIи язытеткIи хэхъоныгъэхэр ягъэшIыгъэнхэмкIэ гукъэкIхэм кIуачIэ ятыгъэныр (къэзгъэлъэгъуагъэхэр мэкъу-мэщ технологиехэм яфакультет икIэлэегъаджэхэр ыкIи сэкъатныгъэ зиIэ сабыйхэр зыщеджэхэрэ еджапIэм ипащэ ыцIэкIэ Нестеренко Ирина Евгений ыпхъур).

4.     Сабыйхэр мэкъу-мэщым щаIыгъ былымхэм ыкIи унэе псэушъхьэхэм апылъынхэм къыфэгъэущыгъэнхэм фэгъэхьыгъ (къэзгъэлъэгъуагъэхэр мэкъу-мэщ технологиехэм яфакультет икIэлэегъаджэхэр ыкIи сэкъатныгъэ зиIэ сабыйхэр зыщеджэхэрэ еджапIэм ипащэ ыцIэкIэ Нестеренко Ирина Евгений ыпхъур).

Проектым иедзыгъо пэпчъ командэмэ экспертнэ IэпыIэгъу агъотыгъ, ар къафэзгъэпсыгъэр профессорэу Iэшъынэ Марин Казбек ыпхъур ары.

Проектнэ гукъэкIхэмкIэ ыкIи IофшIагъэ ухыгъэхэмкIэ Хакатоныр зэфашIыжьыгъ. Ащ ыуж ащ хэтыгъэхэр командэмэ адеIэнхэм фэшI онлайн-мэкъэтыным хэлэжьагъэх, социальнэ пшъэрылъхэу анахь мэхьанэ зиIэхэр ащ тетэу къыхахыгъэх. ЗэкIэ командэмэ дипломхэмрэ шIухьафтынхэмрэ аратыгъэх.

Студентмэ яшIэныгъэхэр ушэтыгъэнхэмкIэ, шъолъырым илъ гумэкIыгъохэр зэшIохыгъэнхэм къыхэгъэлэжьэгъэнхэмкIэ Iофтхьабзэр IофыгъошIу хъугъэ.