Участниками мероприятия стали студенты МГТУ и Политехнического колледжа. Мыекъопэ къэралыгъо технологическэ университетым мастер-классэу «ТхылъыпIэ ахъщэмэ яшъыпкъагъэрэ уарыщэфэнымкIэ яамалхэмрэ гъэунэфыгъэнхэр» зыфиIорэр щыкIуагъ. Ар зэхищагъ Адыгэ Республикэм финансэ гъэсэныгъэмкIэ ишъолъыр гупчэ ипащэу Татьяна Паладовам.

Практическэ IофшIэныр зэрищагъ ахъщэ тамыгъэхэр ушэтыгъэнхэмкIэ АР-м и Лъэпкъ банк иэксперт шъхьаIэу Марина Дерюженкэм. Мастер-классым ащ къыщиIотагъ лъэпкъ валютэр нэпцIмэ ащыухъумэгъэным пае ашIэхэрэр. Iофтхьабзэм хэлажьэхэрэр щигъэгъозагъэх ахъщэ нэпцIыр къызэрэхэбгъэщыщт шIыкIэм, ащ физикэ-химическэ нэшанэу иIэр, Урысые Банкым къызэрэдимыгъэкIыгъэр къэзыгъэлъагъорэ зэтекIныгъэхэр. Экспертым анаIэ тыраригъэдзагъ фальшивомонетничествэм ишIыкIэ-амалхэм ыкIи къыIуагъ ахъщэхэр ренэу ууплъэкIужьхэзэ, тыдэ къыщыуамытыгъэхэми, зэрэпшIын фаер, ар кассэу, банкоматэу, е нэмыкI чIыпIэу хъугъэми. Анахьэу къыхигъэщыгъэр купюрэ нэпцIыр къызIэкIафэкIэ, цIыфым мылъкур зэрэчIинэрэм фэшъхьафэу, ар хэбзэухъумэкIо органхэм агъэмысэными Iофыр нэсын ылъэкIыщт.

Iофтхьабзэм къыдыхэлъытагъэу студентмэ практическэ шIэныгъэхэр агъотыгъэх, ахъщэ шъыпкъэхэмрэ нэпцIыхэмрэ зэхафыгъэх, ахэр къэзыухъумэхэрэ пкъыгъохэр зэрагъэшIагъэх.

ГущыIэм пае, игъэкIотыгъэу ухъумэкIо лъэнтхъойхэу банкнотым тешIыхьагъэхэр, псы тамыгъэхэу нэфым къыщыхэщыхэрэр зэхафыгъэх. Джащ фэдэу, полиграфическэ ухъумагъэхэр — микротекстхэр, графическэ зэкъодзапIэхэр ыкIи гъэбылъыгъэ сурэтхэр. Ащ фэшъхьафэу ахэм зэрагъэшIагъ физикэ-химическэ нэшанэхэр, люминесценциер хэтэу, метамериер ыкIи магнитнэ чIыпIэхэр, джащ фэдэу органолептическэ ыкIи машинэкIэ къызаджэхэрэ элементхэр, ахэр хэушъхьафыкIыгъэ Iэмэ-псымэхэмкIэ къыхагъэщыжьых.

Мастер-классым икIэухым Адыгэ Республикэм финансэ гъэсэныгъэмкIэ ишъолъыр гупчэ ипащэу Татьяна Паладовам къыIопщыгъ ахъщэ гъэтIылъыным ипрограммэ зыфэдэр (программа долгосрочных сбережений).

Къэралыгъор къыхэлажьэзэ, ор-орэу банкым ахъщэр иплъхьанышъ,  ащ ибгъэлъыныр, федэу уиIэм щыщ Iахьыр ащ бгъакIозэ пшIыныр программэм къыделъытэ.

Программэм къыхэлажьэ ыкIи ахъщэ къыхелъхьэ лъэпкъ Фондым ыкIи Урысыем и Социальнэ фонд иIэпэчIэгъанэ. Программэм хэлэжьэн фитых зыныбжь илъэс 18 хъугъэхэр, ахэмэ зэзэгъыныгъэ мыкъэралыгъо пенсионнэ фондхэм адашIынхэ алъэкIыщт. Анахь макIэу ащ узэрэхэлэжьэшъущтыр илъэс 15 зэрэхъурэр.

Мыщ фэдэ Iофтхьабзэмэ яшIуагъэ къэкIо, ныбжьыкIэхэр финанс Iофхэм нахь ащэгъуазэх, а лъэныкъомкIэ ягъэсэныгъэ зыкъеIэты.