Мыекъопэ къэралыгъо технологическэ университетым Урысые научнэ-практическэ конференциеу аспирантхэр, докторантхэр ыкIи МКъТУ-м ишIэныгъэлэжь ныбжьыкIэхэр зыхэлэжьагъэхэр щызэфашIыжьыгъ.

ЗэхэщэкIо комитетым иIэшъхьэтетыгъ научнэ IофшIэнымкIэ ыкIи инновационнэ хэхъоныгъэмкIэ проректорэу, философие шIэныгъэхэмкIэ докторэу, профессорэу Татьяна Овсянниковар.

МэфитIум къыкIоцI МКъТУ-м аспирантурэм ыкIи магистратурэм, джащ фэдэу фэшъхьаф научнэ-гъэсэныгъэ учреждениехэм ащеджэрэмэ илъэсым аушэтыгъэхэмкIэ докладхэр къашIыгъэх. Зэхэсыгъохэр секциймэ ащыкIуагъэх, ахэмэ университетым ишIэныгъэлэжь пэрытхэр япащагъэх техническэ шIэныгъэхэмкIэ докторхэу Сихъу Хьазрэт, Хьаткъо Зурет, медицинэ шIэныгъэхэмкIэ докторхэу  Артур Арутюновыр ыкIи Елена Лялюковар; мэкъу-мэщ шIэныгъэхэмкIэ докторэу Мамсыр Нурбый, экномикэ шIэныгъэхэмкIэ докторэу Iэшъынэ Марин, культурологиемкIэ докторэу Сихъу Аминат, шIэныгъэхэмкIэ кандидатхэу Оксана Борсук, Любовь Вавиловар.

Конференцием къыдыхэлъытагъэу, технологиехэм, машинэхэм ыкIи гъомлапхъэ производствэм иIэмэ-псымэхэм якафедрэ ипащэу, техническэ шIэныгъэхэмкIэ докторэу Сихъу Хьазрэт япащэу секциеу «Зыпкъитыныгъэ хэхъоныгъэр: неущрэ гъомлапхъэхэм якIурэ гъогур» зыфиIорэр щыIагъ, Iофыгъо шъхьаIэхэу обществэм ыпашъхьэ итхэм ар зэу ащыщ.

Кафедрэмэ яаспирантмэ сэнэхьатэу зыфеджэхэрэмэ ялъытыгъэу докладхэр къашIыгъэх, ахэмэ ушэтын Iофыбэ зэлъаубытыгъ. Ащ хэтыгъэх шъолъыр экономикэм, инновационнэ технологиехэм ыкIи агропромышленнэ комплексым языпкъитныгъэрэ хэхъоныгъэу ашIыхэрэмрэ, медицинэм ыкIи фармацием алъэныкъокIэ непэрэ Iофхэм язытет, къалэмрэ промышленнэ псэукIэмрэ язэфэхьысыжьхэр, тыкъэузыуцухьэрэ дунаим, экологием ягумэкIыгъохэр, гуманитарнэ шIэныгъэхэр шъолъырым зэрэщагъэфедэхэрэр ыкIи нэмыкIыбэхэр.

Научнэ-практическэ конференцием зэкIэмкIи доклад 80 къыщашIыгъ, ахэр научнэ темэ зэфэшъхьафхэм афэгъэхьыгъагъэх ыкIи очнэ шIыкIэуи онлайн шIыкIэуи рагъэкIокIыгъэх. Конференцием зэфэхьысыжьэу фэхъущтымкIэ научнэ статьяхэр зыдэт тхылъ къыдагъэкIыжьыщт, ащ университетым итхылъеджапIэ фаем нэIуасэ зыщыфишIышъущт. ф