Непэ Мыекъопэ къэралыгъо технологическэ университетым и «Точка кипение» зичэзыу Iофтхьабзэу ныбжьыкIэ проектхэм я Урысые зэнэкъокъу и гъэсэныгъэ программэу «Уигухэлъ факIу!» — «Лъэтегъэуцом иискусствэ» зыфиIорэр щыкIуагъ.

Iофтхьабзэм оффлайн шIыкIэм тетэу Адыгэ Республикэм игъэсэныгъэ учреждениехэм якIэлэегъаджэхэр, кIэлэеджакIохэр ыкIи студентхэр хэлэжьагъэх. Шъолъыр 28-мэ ащыщхэу зэнэкъокъум хэлажьэхэрэр онлайн шIыкIэмкIэ ащ къыхэхьагъэх, социальнэ хъытыухэу ВКонтакте агъэфедагъэх.

ШIуфэс псалъэкIэ зэхахьэм хэлажьэрэмэ закъыфигъэзагъ маркетингымкIэ, сервисымкIэ ыкIи туризмэмкIэ кафедрэм идоцентэу, экономикэ шIэныгъэхэмкIэ кандидатэу, МКъТУ-м и «Точка кипение» ипрограммнэ пащэу Светлана Новиковам. Ащ зещакIохэр къэзэрэугъоигъэхэм нэIуасэ къафишIыгъэх ыкIи къыIопщыгъ лъэтегъэуцохэр гъэцэкIэкIо комитетым зэрагъахьыгъахэхэр.

Iофтхьабзэм изещакIо хъугъэх лъэныкъохэу медиа, брендингым ыкIи визуальнэ коммуникациехэм яэкспертхэр: социальнэ проектхэм ялъыгъэкIотэн гупчэу «Медиарост» зыфиIорэм ипащэу, информационнэ политикэмкIэ ректорым иупчIэжьэгъоу Хьаджэрые Анастасие; гъэзетэу «АиФ-Адыгея» зыфиIорэм иредактор шъхьаIэу, ИА «Адыгея сегодня» зыфиIорэм ишеф-редакторэу Дмитрий Варава; дизайнерэу, брендингымкIэ ыкIи визуальнэ коммуникациехэмкIэ экспертэу Сергей Бабиныр; сурэтышIэу Александр Солодухиныр.

Iофтхьабзэм щызэхафыгъэх Iофыгъо шъхьаIэхэр, проектыр дэгъоу къэзэрэбгъэлъэгъощтыр, ащ пае ищыкIагъэхэр, лъэтегъэуцор гъэкIэрэкIэгъэнымкIэ пшIэн фаехэр, аудиториер къызэбгъэдэIунымкIэ амалэу щыIэхэр.

Мастер-классым зэрэхэлэжьагъэхэм ишIогъэшхо къэкIуагъ, ар опыт шIагъо хъугъэ командэхэмкIэ, проектым къепщэлIэнхэм пае шъэфэу щыIэхэр зэрагъэшIагъэх. Ар осэшIхэм, инвесторхэм, спонсорхэм, общественнэ IофышIэхэм апашъхьэ къызэриплъхьащтыр ары.

Лъэныкъохэу — «ГуфэкIоныгъэр», «Предпринимательствэр», «IT-р ыкIи цифрэ технологиехэр», «Псауныгъэр», «Зэтегъэпсыхьэгъэныр» зыфиIохэрэмкIэ текIуагъэхэм дипломхэмрэ балл тедзэхэмрэ къагъэхъэщтых. Ащ фэшъхьафэу, ахэмэ ацIэхэр УФ-м и Президент и Фондэу «Сэнаущыгъэр ыкIи гъэхъагъэхэр» зыфиIорэм и Къэралыгъо информационнэ ресурсым щатхыщтых.

НыбжьыкIэ проектхэм я Урысые зэнэкъокъоу «Уигухэлъ факIу» зыфиIорэр Мыекъопэ къэралыгъо технологическэ университетым щызэхащэ, ащ иIэпыIэгъухэр: Урысые Федерацием гъэсэныгъэмкIэ и Министерствэ, гъэсэныгъэмрэ шIэныгъэмрэкIэ АР-м и Министерствэ и «Точка кипениехэр» зэкIэ. 

Зэнэкъокъум иоператорыр — МКъТУ-м и «Точка кипение» икоманд: программнэ пащэр Светлана Новикова, администраторыр Мария Тамахина.