Урысые шIэныгъэм и Мафэ МКъТУ-м хигъэунэфыкIыгъ!
Урысые шIэныгъэм и Мафэ Мыекъопэ къэралыгъо технологическэ университетым непэ щыхагъэунэфыкIыгъ. МэфэкIым фэгъэхьыгъэ Iофтхьабзэхэр ащ щызэхащагъэх.
Мэкъу-мэщ продукцием ипроизводствэ технологиехэм якафедрэ Iофтхьабзэу зэхищагъэхэр: шIэныгъэ лекциеу «Органическэ мэкъу-мэщ хъызмэтыр» ыкIи «Мэкъу-мэщ хъызмэтыр непэрэ дунаим» зыфиIорэр, джащ фэдэу мастер-классэу «Джэнч лъэпкъ культурэр — шIогъэшхо къэзытырэ къэкIырэ белок» зыфиIорэр, ар джэнч культурэмэ я Дунэе мафэ ехъулIэу рагъэкIокIыгъ.
Iофтхьабзэм мэкъу-мэщымкIэ ШIэныгъэ ушэтэкIо институтэу МКъТУ-м хахьэрэм иIофышIэ шъхьаIэхэр, «Агрономия» ыкIи «Зоотехния» зыфиIорэ лъэныкъохэмкIэ еджэрэ студентхэр къырагъэблэгъагъэх. Зэхахьэмэ ахэлажьэхэрэм ашIогъэшIэгъоныгъ «технологие уцышъокIэ» зэджагъэхэм игъэпсэолъэн, чIыгулэжьынымкIэ мэкъу-мэщым щагъэфедэрэ Iэмэ-псымэхэр, цифрэ ыкIи ИТ-технологиехэу мэкъу-мэщ продукцием икъыдэгъэкIынкIэ къашъхьапэхэрэр, шапхъэу «Organic» зыфиIорэм диштэхэрэр.
МКъТУ-м модэм итеатрэу «K-Star» зыфиIорэм ипащэу, искусствоведением икандидатэу КIыдэкIое Нафсэт лекциеу «Креативнэ индустриер ыкIи культурнэ кIэныр» зыфиIорэм изещэкIуагъ. Iофтхьабзэм хэлэжьагъэх шIэныгъэлэжьхэр, магистрантхэр ыкIи тихэгъэгурэ Республикэу Беларусьрэ яапшъэрэ еджапIэхэм ястудентхэр.
Санкт-Петербургскэ къэралыгъо консерваториеу Н.А. Римскэ-Корсаковам ыцIэ зыхьырэм истуденткэу Амина Булгиевам къыIотагъ Кавказ илъэпкъ орэдхэм ямэкъамэхэр непэрэ балетмейстермэ агъэуцурэ балетнэ спектаклэмэ къазэрэхэщыхэрэр. Культурэм ыкIи искусствэм я Белорусскэ къэралыгъо университет искусствоведениемкIэ имагистрэу Наталья Линьковам идоклад къыщиIотагъ Белоруссием икультурнэ кIэн языгъэшIагъэхэм филателиемрэ нумизматикэмрэ зэращыщыр.
Цифрэ лъэхъаным рекламнэ дизайным чIыпIэу щиубытрэм ыкIи пшъэдэкIыжьэу ыхьырэм къытегущыIагъ «Архитектурэр ыкIи Дизайныр» зыфиIорэ кафедрэм икIэлэегъаджэу Алиса Савлучинскэр. Iофтхьабзэм икIэухым КIыдэкIое Нафсэт проектэу «Адыгэмэ яхудожественнэ хабзэхэр непэрэ дизайн шIыкIэхэм зэрахэщагъэхэр» зыфиIорэм лъэтегъэуцо къыфишIыгъ, щыгъынхэу адыгэ культурэр, тарихъыр, зыми имышIыкIэ технологиехэр, декоротивнэ шапхъэхэр зыщыгъэфедагъэхэр къыгъэлъэгъуагъэх, ахэр МКъТУ-м истудентхэм зэрашIыхэрэр къыIотагъэх.
Технологиехэм, машинэхэм ыкIи гъомлапхъэ къыдэгъэкIынымкIэ агъэфедэрэ Iэмэ-псымэхэм якафедрэ идоцентэу Ольга Мариненкэр шIэныгъэ лекциеу «Непэрэ лъэхъаным псэурэ цIыфымкIэ осэшхо иI псауныгъэм лъыплъэгъэныр» зыфиIорэм къеджагъ. НыбжьыкIэхэр, зыныбжь икъугъэхэр ыкIи нахьыжъхэр япсауныгъэ нахь фэсакъхэу аублагъ, обществэм хэхъухьэрэ зэхъокIыныгъэхэм адырагъэштэнхэм пылъых. Студентхэр чанэу мы темэм тегущыIагъэх ыкIи ящыIэкIэ-псэукIэ зэблахъунэу, ащ псауныгъэм фэсакъыгъэным нахь охътабэ тырагъэкIодэнэу щызэдаштагъ.
Технологиехэм, машинэхэм ыкIи гъомлапхъэ къыдэгъэкIынымкIэ агъэфедэрэ Iэмэ-псымэхэм якафедрэ идоцентэу Гаянэ Арутюновам зэхищэгъэ шIэныгъэ лекциеу «Гъэщым хэшIыкIыгъэ продукт нэпцIхэр ыкIи ахэр къызэрэхэбгъэщыщтхэр» зыфиIорэм къеджагъ. Щэм хэшIыкIыгъэ продукцием бэрэ нэпцIхэр къызэрэхэкIырэр, ар непэрэ лъэхъаным игумэкIыгъоу щыт, анахьэу къэкIыхэрэр агъэфедэ зэрэхъугъэм, ащ щэ ассортиментым зэрэхэхъуагъэм ар къахэкIы. Технологическэ факультетым икIэлэегъаджэхэмрэ студентхэмрэ лекцием едэIугъэх, нэужым а темэм фэгъэхьыгъэ лъэтегъэуцом нэIуасэ зыфашIыгъ, упчIэмэ джэуапхэр къаратыжьыгъэх.
Технологическэ факультетым иIофышIэхэу, техническэ шIэныгъэхэмкIэ докторэу Сихъу Хьазрэтрэ экспертэу, техническэ шIэныгъэхэмкIэ кандидатэу Блэгъожъ Аслъанрэ Iэнэ хъураеу «Тэрэзэу ушхэныр — псауныгъэм ылъапс» зыцIэр рагъэкIокIыгъ. Iофтхьабзэм ипшъэрылъыгъэр гъомлапхъэу цIыфмэ ашхырэм имэхьанэ, ахэр зэрэзэтефыгъэхэр ыкIи цIыфымкIэ ащ мэхьанэу иIэр къыраIотыкIыныр арыгъэ. Iэнэ хъураем хэлэжьагъэх кафедрэм ипрофессорскэ-кIэлэегъэджэ купымрэ студентхэмрэ.
Гъомлапхъэмэ якъэбзагъэ, цIыфым изытет, ащ игупсэфыгъэ ышхырэмэ бэкIэ зэрялъытыгъэр, УФ-м щыпсэурэмэ япсауныгъэ къэухъумэгъэным пае шIэгъэн фаехэр, нэмыкI гумэкIыгъохэри Iэнэ хъураем къыщаIэтыгъэх, ахэмэ яджэуапхэри ащ щагъотыгъэх. Непэрэ гъомлэпхъэ индустрием хэхъоныгъэхэр егъэшIыгъэнхэмкIэ предложениехэр зэхахьэм къыщахьыгъэх.
ЭкологиемкIэ факультетым Iэнэ хъураеу «Мэз хъызмэтыр зехьэгъэнымкIэ ыкIи гъэIорышIэгъэнымкIэ гумэкIыгъоу непэрэ мафэм къэуцухэрэр» зыфиIорэр щызэхащэгъагъ. Iофтхьабзэр зэрищагъ ыкIи шIуфэс гущыIэкIэ къызэIуихыгъ экологиемкIэ факультетым идеканэу Галина Коноваловам.
Экологием ыкIи тыкъэзыуцухьэрэ дунаим икъэухъумэн фэгъэхьыгъэ гумэкIыгъохэр зэрэщыIэхэр къыдэплъытэмэ, мы темэм мэхьанэшхо зэриIэр ащ игущыIэхэм къащыхигъэщыгъ. «Мыекъопэ мэзхэр» зыфиIорэ подразделением и Къурджыпс отдел ипащэу, мэкъу-мэщ шIэныгъэмкIэ кандидатэу, мэз Iофхэр зехьэгъэнхэмкIэ УФ-м изаслуженнэ IофышIэу Хьатикъое Мэджыдэ Темыр Кавказым имэзхэм ягъэIорышIэн гумэкIыгъоу къыхэкIыхэрэм къатегущыIагъ.
Ландшафтнэ архитектурэм ыкIи мэз Iофхэм якафедрэ идоцентэу, мэз Iофхэр зехьэгъэнхэмкIэ УФ-м изаслуженнэ IофышIэу Николай Алентьевыр, мэзхэм я ГъэIорышIапIэ ипащэ игуадзэу Сергей Гавришовыр, «Северо-Кавказская лесосеменная станция» зыфиIорэ отделым ипащэу Наталья Никишинар докладым едэIугъэх ыкIи дырагъэштагъ. Iофтхьабзэм хэлэжьэнхэу джащ фэдэу къырагъэблэгъагъэх Адыгэ Республикэм имэзхэм я ГъэIорышIапIэ илIыкIохэр, Адыгэ Республикэм имэзхэм якъэухъумэн и Гупчэ, экологием ифакультет хэхьэрэ профессорскэ-кIэлэегъэджэ купыр, «Мэз Iофыр» ыкIи «Ландшафтнэ архитектурэр» зыфаIорэ лъэныкъохэмкIэ еджэхэрэр, Апшеронскэ мэз-техникумым икIэлэегъаджэхэр ыкIи истудентхэр. ТапэкIэ ахэр зэрэзэдэлэжьэщтхэмкIэ ягупшысэхэр къыраIотыкIыгъэх, шIэныгъэ зэзэгъыныгъэхэр зэдашIыгъэх.
МэфэкI Iофтхьабзэхэр лъагъэкIуатэхэзэ студентхэр хэлэжьагъэх проектнэ-технологическэ марафонэу «От идеи к прототипу» зыфиIорэм. МКъТУ-м хэхъоныгъэ егъэшIыгъэнымкIэ программэу иIэм игъэцэкIэн къыдыхэлъытагъэу факультетым ащ фэдэ тематикэр къыхихыгъ. Апшъэрэ еджапIэм ыкIи техникумым ястудентхэр псынкIэу афэгъэнэфэгъэ IофшIэнхэр агъэцэкIагъэх, сыхьатитIум къыкIоцI командэу зэхащагъэхэм темэу хахыгъэхэмкIэ проектхэр зэхагъэуцуагъэх ыкIи къагъэлъэгъуагъэх. Креативнэ гупшысэным, экологием ыкIи ландшафтнэ архитектурэм алъэныкъокIэ шIэныгъакIэхэр агъотынхэм проектнэ марафоныр фэIорышIагъ. Iофтхьабзэм икIэухым текIоныгъэр къыдэзыхыгъэхэр агъэшIуагъэх, сертификатхэр аратыгъэх.